Fordham University

 

Home | Ancient History Sourcebook | Medieval SourcebookModern History Sourcebook | Byzantine Studies Page
Other History Sourcebooks: African | East Asian | Global | Indian | IslamicJewishLesbian and Gay | Science | Women's


IHSP


MainAncientMedievalModern


Subsidiary SourcebooksAfricanEastern AsianGlobalIndianJewishIslamicLesbian/GayScienceWomen


Special ResourcesByzantiumMedieval WebMedieval NYC
Medieval MusicSaints' Lives
Ancient Law
Medieval Law
Film: Ancient
Film: Medieval
Film: Modern
Film: Saints


About IHSPIJSP Credits

Medieval Sourcebook:
Guillame de Tyr (William of Tyre):
Historia rerum in partibus transmarinis gestarum
[History of Deeds Done Beyond the Sea]


Books 1-9 | Books 10-16 | Books 17-22 | Books 23-34 | Chronique du Templier

This is the Old French version of William of Tyre, with continuations. It is
something of a mongrel: (1) the translation of William, from the edition of Paulin Paris; (2) the continuation, from the Recueil des historiens des croisades; and (3) the Chronique du Templier de Tyr, from Les gestes des Chiprois as edited by Gaston Raynaud. The etext was supplied by Michael Tanksley of JHU. It leaves out the diacritical marks and the commas.

Bibliography

Source of (1)

Guilelmus, Abp. of Tyre, ca. 1130 - ca. 1190.  Guillaume de Tyr et ses continuateurs, texte francais du XIIIe siecle, revu et annote par M. Paulin (Paris ... Paris, Firmin Didot et cie, 1879-80.)

Source of  (2)

Recueil des historiens des Croisades : Historiens occidentaux / publie par les soins de l'Academie royale des inscriptions et belles-lettres. 5 Vols.  (Paris : Imprimerie Royale, 1844-95.)

Source of (3)

Les Gestes des Chiprois : recueil de chroniques francaises ecrites en Orient au XIIIe & XIVe siecles (Philippe de Navarre & Gerard de Monteal [sic]) / publie pour la premiere fois pour la Societe de l'Orient latin. par Gaston Raynaud. (1887) [Reprinted, Osnabruck : Zeller, 1968.]

For an early English version, see

William, of Tyre, Archbishop of Tyre, ca. 1130-ca. 1190. Godeffroy of Boloyne; or, The siege and conqueste of Jerusalem, by William, Archbishop of Tyre. Translated from the French by William Caxton, and printed by him in 1481. Edited from the copy in the British... London, Pub. for the Early English Text Society by K. Paul, Trench, Trubner & Co., 1893. [reprinted, Millwood, N.Y., Kraus Reprint Co., 1973]

For a partial modern English translation of Latin text, see

William, of Tyre, Archbishop of Tyre, ca. 1130-ca. 1190. A history of deeds done beyond the sea, by William, archbishop of Tyre... Translated and annotated by Emily Atwater Babcock and A. C. Krey. (New York, Columbia University Press, 1943),  Records of civilization, sources and studies no. 35.

For a modern critical edition of William, see

William, of Tyre, Archbishop of Tyre, ca. 1130-ca. 1190.  Chronique, edition critique par R.B.C. Huygens; identification des sources historiques et determination des dates par H.E. Mayer et G. Rosch. (Turnholt : Brepols, 1986)

For a partial English translation of the Old French version, see

The conquest of Jerusalem and the Third Crusade  sources in translation / Peter W. Edbury. (Aldershot, Hants, England : Scolar Press ; Brookfield, Vt. : Ashgate Pub. Co., c1996.)

Contents



Chronique du Templier de Tyr

237. Depuis que vos aves oy retraire tous les erremens quy sont avenus de sa la mer en Surie et en Chipre quy apartient soulement de lempereor a siaus de Chipre si vos viaus retraire plussors autres chozes quy sont avenues en Surie et en Chipre et en aucuns leus as parties doutremer des choses quy a tourner font.

238. Entre tant con seste guerre dura entre siaus de Chipre et la gent de lempereor si com vos aves oy le dit empereor entendi coment les Jeneves abondoneement aveent aydes les Chiprois contre sa gent et aveent meismes este contre luy. Quant il fu a Acre en laye dou seignor de Baruth et pour ce il vost grant mal a Jeneves et comanda par tous les leus de sa seignorie que Jeneves ne demorast en peine de la teste a un terme quy lor mist et defendy que forment ni autre vitaille ne deust aler de sa terre en Jenne sous une grant peine; et por ce devint le froment si cher en Jenne que la mine valut .c. sos de sele monee et la cite de Jenne se peut bien soustenir de tout se que mestier ly est sauf que de fourment.

239. Dedens se le pape Selestin de Milan avoit mande a plusors perlas de venir a luy a Rome; et pour ce que les perlas nozerent passer par la terre de lempereor ny par Pize si vindrent en Jenne et firent armer plusors guallees pour passer en Rome. Dont le dit enperor entendy coment ses perlas devoient passer osses guallies de Jenne: si fist armer en Pize .xl. guallees; et alerent ses gualees et ses perlas. Et ce fu por mau que il voloit as Jeneus et por descorde que il avoit a liglise et prirent les dites guallees et les damagerent et tuerent plussors et menerent les perlas en Pize dont aucuns eurent les courones de lor testes escorchees et autres furent mort en prison.

240. Quant le pape entendy ceste chose escomenia le comun de Pize dont il fu lon tens escoumenie et quant le Jeneus furent damages si armerent guallies et autres leins et alerent en cours sur les Pizans et sur la gent de lempereor et lor firent menuement damage.

241. Lempereor tantost si fist armer .lxv. guallees de Sezille et de Puille et vint en Pize et Pizans armerent .xl. guallies quy furent .cv. guallees et fist son amirail .i. Jeneus quy ot nom sire Ansaut Damar lequel estoit amirail de lempire; et aussi ordena lempereor .i. host de jens a chevau que manda en Jenne par terre et gent a pie; et alerent ses .ii. host par terre et par mer aseger Jenne et siaus des guallees de lempereor geterent plusors piles et caryaus quy avoient lor fers dargent et se firent il aussy come par une grant noblece; et lautre host vint par terre en .i. leuc quy se nome Levant quy est .i. leuc mout estroit et mout aspre de roches por gens a chevau et si a .ii. bours as costieres des montaignes et par mi leuc de ses .ii. bours si a une valee mout estroite qui vait ver la mer ou il y a une esplage de sablon joinant a la mer et en celuy leuc les Jeneves quy demorent la et autres que le comun manda desconfirent la gent de lempereor malement et en y ot ases mors de lanses longues et de caryaus et en seste maniere furent desconfis par terre la gent de lempereor.

242. En seluy meisme jour Jeneves par mer nissirent a conbatre a guallees de lempereor a .lxxx. guallees mout bien armes que chascun en persone i monta de sus por defendre lor terre et lor henor et Dieu les ayda en lor droit et vost que les perlas fusent venges de siaus que les .c. guallees de lempereor furent desconfis devant la cite de Jene et prirent les Jeneves .xxi. guallees les .viii. de siaus de lempereor et les .xiii. de siaus de Pizans; et fu ceste bataille faite en sel an que les Chiprois prirent Sur des Longuebars quy fu lan de lincarnasion de Nostre Seignor Jhesu Crist .mccxlii. le mois de jung.

243. Cestu emperor quy fu mout cruel home de cuer et sans pite et fu mout contraire et persecutor de sainte yglise et por ce li meschut ala a nient luy et ces hairs et entre les cruautes que il fist est une que je vos diray.

244. Il avint que plusors des homes chevaliers et borgois et autres gens mesfirent envers luy selonc le dit de seaus quy les garderent; lequel mesfait il atainst en veryte ou autrement: il les fist prendre yaus et lor femes et lor enfans grans et petis quy estoient nes de .viii. jours et fist crever les ziaus a plusours et puis trestous ensemble les fist ardre en .i. feuc et furent par tout bien .vc. persones.

245. Quant vint lan de lincarnasion de Nostre Seignor Jhesu Crist .mccxliii. pape Selestin morut et fu fait pape Inosent cart quy fu ne de Jene dun grant lingnage quy sapelet Dalsses; et cestu pape amonesta mout lempereor de venir a amendement de sainte iglize et que il le resevreit volentiers mais lempereor ne vost onques riens oir et pour ce le dit pape despoza lempereor de lempire et asembla ost et ala contre luy et se combaty a ly devant la cite de Baline et fu desconfit malement le dit emperour et son host en tel point que onques puis il nen ot poeir de grever sainte iglize et vesquy apres se que post et puis morut .vi. ans apres ce que il fu desconfit et remest apres luy son fis le roy Courat quy fu fis de la reyne de Jerusalem et sestu Courat espouza la fille dou duc dosteriche qui est .i. grant menbre dalemaigne et mout riche; et si eut le dit Corrat de ceste dame sa feme .i. fis quy ot nom Coradin dou quel vos ores encore aparler de luy en ce livre.

246. Cestuy Courat dont je vos parle en son tens se porta ases pis contre sainte yglize que son pere lempereor navoit fait et morut ausi escomenie con fist son pere.

247. Se dit emperour avoit encores .i. autre fis quy ot nom Manfrey quy fu nes en avoltire et vous dirais coment.

248. Il avint que le dit emperor Federic si ama gentille dame de Lonbardie quy estoit marquizane; mais quant a lempereor elle ni estoit mye pareille. Et de ceste dame il eut sestuy sien fis Manfrey; et avint que la dite dame fu malade pres de mort et lempereor qui estoit sans feme si la vost espouzer por aliauter son fis Manfrey que il amoit mout; et pour ce il enquist as mieges se elle poiet garir de seste maladie et tous les mieges le sertifierent que elle ne poiet guarir en nule fin dou monde. Et por ceste seurte lempereor lespouza et si come il plost a Nostre Seignor la dite dame guary de selle maladie et vesquy .i. tens et par selle maniere fu Manfrey aleaute dont il avint que quant le roy Courat morut sestuy Manfrey se mist en avant et prist et saisy la seignorie et les biens de lempereor Fedric son pere et avotre et diset que il estoit aleiaute et que il estoit plus droit hair qui estoit fis de lempereor que le fis dou roy Courat son frere dou dit Manfrey.

249. Dont tous les barons dou royaume de Sezile et de Principat et de Poulle si le resurent au seignor et le couronerent dou royaume de Sezile et en fu seignor.

250. Quant la mere dou Coradin fis dou roy Courat oi dire que Manfrey sestoit fait seignor et corouner si li sembla bien quil avoit dezerite son fis Couradin et douta mout que le dit Manfrei nen seist enpoissoner son fis par aucun engin por soi delivrer quy ne le chalongast quant fust en aage; et por ce la dite dame norry son fis ensemble o luy .xii. anfans de son aage et les vestoit tout dune colour et mostroit aussi grant amour a lun come a lautre; et por se ne poeit nulle persoune conoistre bien serteinement lequel des anfans estoit son fis et en tel guize garda ceste dame ce sien fis.

251. Cestu Manfrey quy ce fist roy con vos aves oy ce espouza une dame fille dun haut home de Grece quy ot nom Micalichie de la quele il eut enfans et fis autre fes et vos diray dautre rayson por devizer les chozes mais je la je laray a parler deaus jusques a une autre fes et vos diray dautre rayson pour devizer les chozes quy sont avenues par les annees.

252. Quant se fu en lan de .mcc. et .xliiii. de Crist avint au reaume de Jerusalem que une lignee de Sarazins quy sont apeles Hoursemins se conbatirent as crestiens en .i. leuc quy sapelle Forbie et avint par la soufrance de Dieu que les crestiens furent desconfis malement et furent mors et pris frere Harmant de Periguor maistre dou Temple et frere Guillaume dou Chastel neuf maistre de lospital et le conte Gautier de Jafe et larsevesque de Sur et Raoul vesque de Saint Jorge et les .ii. fis dou seignor dou Boutron et le mareschau dou Temple frere Hugue de Montagu et plusors autres barons et chevaliers.

253. En sel an Ballyan noviau seignor de Baruth fu feru au bras destre dun Hassisi si com il passet par le Change dacre et fu le cop dun coutiau mais ne morut mie ains fu mahanie.

254. En sel an meismes Jofrey de Sargines tint herbe et le Temple o luy a Jafe et ly fu aferme la triue o le soudan de Domas quy rendy as crestiens Jerusalem et la terre de sa le flum fors Naples et Jerico.

255. Lan .mccxlv. le susdit pape Ynocent tint conseil a Lion et par le conseil despouza a Federic de lempire pour ce que lon disoit que le pape lavoit despoze avant par la volente et pour ce que il estoit Jeneves mais le conseil jeneral le despoza por ses males heuvres.

256. Et celuy conseil fu donee la crus au bon roy Lois de France por le secours de la Terre Sainte et se crusserent ses freres o luy et autres contes et barons chevaliers.

257. En lan de .mccxlvi. de lincarnasion de Crist trespassa de se siecle la raine Aalis de Chipre mere dou roy Henry gras et remest tout le royaume de Chipre au dit roy Henry et le seignor de Baruth fu baill dou royaume de Jerusalem et Phelippe de Monfort seignor dou Thoron si ot Sur assa garde.

258. Et en lan de .mccxlvii. de Crist le souldan de Babiloine si prist la cite de Thabarie et la furent mors et pris mout de crestiens et si fist aseger le souldan Escalone par terre et par mer de .xxi. guallees et une nave que toutes bryserent par fortune de tens et toute fois prist Escalone quy fu grant damage a crestiens.

259. En cel an morut le seignor de Baruth baill dou royaume de Jerusalem et fu baill apres luy son frere Johan dybelin seignor darsur.

260. En cel an morut Gille seignor de Sayete quy fu fis de Balian et remest de luy .i. fis quy ot nom Julien quy vendi puis Sayete au Temple.

261. Et en lan de .mccxlviii. a .xxvii. jours de setembre ariva le roy de France Lois en Chipre a Limesson et amena mout grant naville entre la quele naville i ot .xv. guallees de Jeneves et .iiii. naves grans a sos dou roy et mena la royne de France sespouze et ces freres mon seignor Charle conte dango et mon seignor Anfois conte de Poitiers et le conte dartois lor couzin jermain et Guillaume conte de Flandres et si mena autres barons que je ne peu trestous nomer et furent par tout chevaliers .viiic.

262. Le roy Henry de Chipre et les autres seignors de Yblin la resurent a mout grant henour et a mout grant joie et demoura en Chipre tout sel yver et vindrent dacre au leur ostel les maistres dou Temple et de lospitau et chevaliers et autres gens et en Chipre conseillierent et ordenerent de passer au primtens en Egipte et quant vint apres Pasques que le roy manda la raine de France en Acre et dacre elle ala au Chastiau Pelerin quy est dou Temple et est sur mer pres dacre .vii. liues.

263. Et en lan de .mccxlix. a .xx. jours de may se party le roy de France de Limesson de Chipre et alerent o luy Temple et Ospital et grant chevalerie de Chipre et de Surie et demora sur mer .xiiii. jours; prist terre par force et a .vi. jours de jugnet prist la site de Damiate sans cop ferir; et jasoit se que il avoient novelles de la venue dou roy de France de sa mer toute fois il ne saveent mye bien ou il devoit ferir et por ce i mirent il poy de pourveance et furent surpris dont nostre gent mirent escheles as murs et y monterent sans defence car en Damiate nen i avoit menue gent et si y avoit aucuns defendeors si y avoit mout poy.

264. Quant la chose fu ensy avenue le leguat et le patriarche de Jerusalem et le roy de France et les autres barons si rendirent graces a Nostre Seignor de ceste belle aventure que Dieu lor avoit fait en lor premiere venue de se que nulle defence ne lor fu encontre au prendre de la terre et sembla que ce fu volente et euvre de Dieu.

265. Les Sarazins de Babiloine et dalixandre quant il entendirent que les crestiens aveent prisse Damiate il furent mout esfrees et a grant paour et le souldan de Babiloine asembla tout se quy post aver de gens a chevau et a pie por defendre soy contre les crestiens et se Dieu eust volu consentir le roy de France et son host eust pris toute Babiloine et la terre de la entor mais Deu ne vost plus consentir a crestiens si con vos entenderes si avant.

266. Quant le roy de France entra en Damiate con je vos ai dit et quy ne trova nule defence si troverent la terre toute plaine de biens aces et especyaument de vitaille dont la menue gent roberent et prirent tout et sen aisserent une piesse.

267. Le roy de France et les autres barons furent au conseil par plussors fois coment devreent faire de lor prendre les autres terres la entour et sur ce ot plusors paroles dites entre aus que je ne peus tout retraire et fu la fin de lor conseil de chevaucher de hors par la terre et damager les Sarazins quant que lon poroit si come il firent ce Dieus eust consenty que lor fait fust ale en avant; mais je vos layray a parler dou roy de France et de son host et de sa naville quy sont en Damiete et vos diray dune guerre quy avint a Acre entre Pizans et Jeneves et apres retornerons a nostre matiere.

268. Les Venesiens manderent confermer ceste compaignie en Veneise par .i. bourgois dacre quy se noumoit sire Piere Brisse quy revint de Venise et vint sire Lorens Cape capitaigne de .xiiii. gallees et porterent sur gallees deus banieres de Pize et de Veneise et les porterent puis sur lor naves longuement et avint que le prince Baimont por le trait dou conte de Jaffe Johan dyblin et par le maistre dou Temple frere Thomas Berart manda querre sa seur la rayne Plaissance quy estoit veuve de son espous le roy Henry gras et avoit .i. fis quy ot nom Huguet enfant dou roy Henry gras et eir dou baillage dou royaume de Jerusalem pour mener la a Acre contre les Jeneves et des Pizans et Venesiens.

269. La guerre et lapareill de guerre se faizoit a grant force et au tens dadons avoit un consele de Pize a Acre quy avoit nom messire Siguer de la Seete quy fu mout vaillant home et savoit mout de guerre et fu mout artillous home et si faizoit ordener de guarnir la tour de Pize; et avint que .i. jour estoit sur la tour de Pize et le conte de Jaffe o luy qui ot nom messire Johan de Yblin et estoit le conte tout a descovert; et sur la tour de Jene quy estoit mout pres de la tour de Pize avoit a sele houre .i. mout bon abalestrier quy tendy labalestre et vost ferir le conte de Jaffe mais .i. des .ii. conseles de Jene se trova la quy se nomoit Ansiau dinseba et defendy as sergens de non ferir pour ce que la triue duroit encores; dont ceste bonte que se consele fist fu retraite au conte de Jaffe que puis la guerre li rendy bon guerredon car il le fist chevalier et ly douna fie a Jafe .vc. bezans lan toute sa vie mais il en ot grant charge dou coumun de Jenne cuydant que le conte li eust se fait par aucune traison que il leust fait contre le comun; mais quant il fu seu la verite siaus de Jene loerent pour escuze et lorent ce que il fist pour ce que il fist loyaute et lors se repaira en Jene.

270. Les Jeneves aveent por usage de mander chascun an en Acre .ii. conseles si que au tens de ceste guerre furent conseles messire Lion de Grimaut et messire Ansiau dinseba de que je vos ais parle orendroit; et quant les seignors dacre virent si grant aparaill faire si se travaillerent seculiers et religious et les asemblerent en .i. grant hostel quy estoit dou seignor de Sur messire Phelippe de Monfort et les Alemans a Acre parlerent entre yaus de faire aucun acort et avint entre plussours paroles que sire Lorens Copecape dist au consele de Jenne que il ne partiroit dacre tant que il porteroit en Veneize une piere dou fondement de la tour de Jene. Et saches que ensi come il le dist tout enssi le fist si con vos lentenderes. Si tost come sire Lion de Grimaut lun des conseles oy seste parole si mist main a lespee et la traist et courut sus au dit sire Lorens Cope et ce failly poy que il nen eut grant mortalite des uns as autres mais les seignors dacre et Temple et Ospitau les departirent et adonss comensa la guerre entriaus quy fu mout mortal et geterent les uns as autres de plusors manieres dengins et grans et petis et tel engin avet quy getet une piere si grant quy peset .c. zotes et avoient les engins chascun son nom. Les Jeneves aveent .ii. mout grans que lun sapelet Bonerel et lautre se nomoit Vincheguerre et lautre Peretin et Venesiens aveent .i. mout grant quy se nomoit Marquemose et damagerent mout les uns a les autres et abatirent plusors maisons et dura seste guerre entour de .xiiii. mois.

271. En cestuy mileuc le prince Baimont prince dantioche et conte de Triple qui avoit fait venir sa suer a Triple quy ce dizoit la rayne Plaissance de Chipre et mena son fis Huguet droit hair dou royaume de Jerusalem et fu par latrait dou conte de Jafe et de frere Thomas Berart maistre dou Temple et la mena le prince a Acre et son fis Huguet dont la dite raine par le conseil de son frere le prince fist reverser tos les homes de la seignorie en laie et as sodees des Pizans et des Venesiens contre les Jeneves defendant leur estroitement de non prendre sodees o les Jeneves; mais aucuns gens furent quy ne se partirent nule fes de Jeneves quy esteent Suriens de la loy de Grece quy estoient de la flarie de saint Jorge et de Belian et se teneent homes de lospitau et lospitau meismes fu aidant a Jeneves de sa force et vint le seignor de Giblet a Acre et amena en laye de Jeneves .cc. archiers crestiens vylains de la montaigne de Giblet quy furent puis tous mors en selle guerre.

272. Il avint .i. jour que les Jeneves coururent par une rue de la Raine por ce que sele rue avoit une maison quy fu de la raine Aalis et passerent en .i. autre rue quy se dizoit la Carcaisserie et saresterent la et le cry se leva en seluy leuc dont le prince vint la a chevau covert et chevaliers armes o luy et entre les autres y fu messire Betran de Giblet fis de messire Hue; et le prince coumanda au dit messire Betran de poindre premier contre les Jeneves dont messire Betran li pria de luy esparagner pour se quil estoit estrait diaus mais le prince le fist aler vozist il ou non et quant il y ala si mist le fer de sa lance derier sa selle disant a Jeneves quant il lor fu pres Je suy Bertran de Giblet et pour ce de puis le prince ly sot trop mavais gre et le mostra bien apres au seignor de Giblet con vos entenderes si apres.

273. Ceste haine que le prince aveit a Jeneves nen estoit mye por mesfais quy ce furent fais de rien mais le prince et son pere et son ayol lor tenoit la rayson quy devoient aver a Triple la quele il conquyrent a prendre la cite de Triple quant il furent en laie dou conte de Toulouze Raymont quy la prist et les Jeneves furent o lor guallees si com il contient au Livre dou Conquest et pour ce le prince doutoit que les Jeneves ne venissent au desus de la guerre et le metreent plus tost en bregue et en carelle plus tost et plus hardiment et pour ce si se travailloit deaus grever.

274. Depuis que le prince fu venu a Acre si con je vos ai dit toute la gent lor fu encontre et lor failly la vitaille de venir en lor rue sauve que por lospitau de Saint Johan quy avoit .ii. portes lune porte ver le Seignor et lautre ver la rue de Jenne et par lospitau paserent la vitaille quy lor veneit.

275. Messire Phelippe de Monfort seignor de Sur et dou Toron si ayda mout les Jeneves de tout ce qui est et de sa site de Sur venet a Acre en la rue de Jenne et vitaille et sergenterie quy lor pasoit par la maison de lospitau de Saint Johan.

276. En la rue de Jenne avoit de toutes lengues bien .viiic. homes darmes sans femes et anfans et villars et nafres quy passerent ases de mezaizes.

277. Les Venessiens aveent .xx. guallees quy lor vindrent de Veneise autre que les .xiiii. quy vindrent avant.

278. Le prince et la rayne Plaissance sa seur et son fis heir de Chipre partirent dacre et retornerent a Triple et la dite rayne et son fis alerent en Chipre.

279. Quant vint a lan de .mcc. et .lviii. de Crist ariverent a Limesson .xlviii. guallees de Jeneves et .iiii. naves quy vindrent au secours de lor rue et des Jeneves dacre les quels guallees et naves ariverent a Sur et la ordenerent o le seignor de Sur ce quy deveent faire et fu cheveteine et amiraill Rous de la Turque.

280. Toute fois le seignor de Sur et les Jeneves ordenerent que le segnor de Sur a tout ce que il poroit aver de gent a chevau et a pie iroit a Acre et se teroit en .i. leuc quy se dizoit la Vignie Neuve et la averoit a luy le maistre de lospitau et son poer quy se teroit la ou luy et quant il verrent que les guallees des Jeneves eussent guaigne quy deussent entrer a Acre et prendre les .ii. rues de Pizans et Venesiens; et ensi con il ordenerent le firent que le seignor de Sur vint a Acre et se tint en sel leuc et la vint a luy le maistre de lospitau.

281. Les guallees de Jeneves partirent de Sur et alerent devant Acre et furent .xlviii. guallees et .iiii. naves et chascune nave avoit .i. engin et sil eussent feru tant tost il eussent tout guaigne car les gualees des Venessiens quy furent .xl. nen estoient encores reculis et lachaisson fu que Pizans et Venessiens douterent de monter et abandoner lor rue et que Jeneves de terre ne le treissent et sil ne monteent sur les gualees et Jeneves de mer desendreent en terre il perdreent tout dont il furent en grant balanse de ce fait et en paour et parlerent de ce fait au conte de Jafe quy lor conseil lya daler au maistre dou Temple frere Thomas Berart; et le dit maistre dou Temple estoit ale demourer a la maison des chevaliers de Saint Landre pour estre loins de la bataille des engins quy se lansoient car la maison dou Temple estoit mout pres des Pizans.

282. Le conte de Jaffe et le consele de Pize et le baill de Veneise parlerent au dit maistre de lor afaire sur le fait que vos aves oy et le dit maistre si lor proumist que il lor manderoit tant de freres et dautre gent a cheval et a pie quy garderent lor rues et lor maisons tant que la bataille sera faite en mer; et tout ensy com il dist ensi le fist et piestant les freres monterent a chevau covers et tricoples et autres et alerent au confanon leve guarder les .ii. rues de Pizans et de Venesiens et en lor paser les Jeneves de terre cuyderent quil venissent contriaus et saillierent au cry et garderent lor rue.

283. Le seignor de Sur vint de Sur par terre a Acre et si ot o luy .lxxx. homes a chevau et .ccc. archers vilains de sa terre de hors et se herberga a la Vigne Neuve pres dacre et le maistre de lospitau frere Guillaume de Chastiauneuf si nissi hors dacre et mena o luy se quil post de ces freres et tricoples et se tint aveuc le seignor de Sur la et atendirent de veir se les guallees fereent pour parfaire lor entendement.

284. Les Venesiens et les Pizans quant il eurent quy garda lor rues se firent crier lor banc par la site que quy voroit lor sodees a monter sur lor guallees pour suvre saillant si le venist prendre .x. bezans sarazins le jor et .ix. bezans pour la nuit; et pour ce il eurent mout de gens et monterent sur lor guallees quy furent .xl. et si armerent autres barques et parescalmes et panfles quy furent plus de .lxx. en que avoit en chascun abalestriers quy firent a Jeneves trop de damages et denuis; et quant lost des gualees et barques furent tous reculis et hissus hors contre les guallees des Jeneves tant tost les Jeneves se mirent tout par eaus en rout et aucunes guallees atendirent quy se combatirent. Si furent prizes .xix. et mors et pris .m. et .viic. persones car apareilles i ot quy osterent lor lamieres et lor chapiaus de fer et se recullirent as autres guallees que par force de rins eschaperent et alerent a Sur et autres .v. guallees furent des Jeneves quy foirent les .iii. a Caifas et les .ii. a Chastiau Pelerin quy estoit dou Temple dont les Venesiens manderent de lor guallees apres et les prirent cest asaver .v. guallees sans les homes. En ceste maniere prirent des guallees des Jeneves .xxiiii. et homes entre mors et pris .mviic. si com je vos ay avant dit car aves conustre que Jeneves furent de lor gent a Sur tant en troverent mains et les .iiii. naves des Jeneves. Quant siaus des naves virent que lor gallees furent vencus et desbarates si firent vele et alerent a Sur.

285. Le seignor de Sur quy estoit a la Vigne Nueeve com je vos ais dit et sa gent o luy a cheval et a pie et le maistre de lospitau et aucuns des freres quy estoient ausi venu cuydant que Jeneves deussent guaigner por faire lor entendement quant il virent se que Jeneves furent desconfis si furent mout dejugles et corouses et se parti le seignor de Sur et retorna a Sur en sa terre et le maistre de lospitau se tint la y demoura tant que .i. maladie le prist dont il morut et les freres firent .i. autre maistre prodome et sage quy ot nom frere Hugue Revel quy adons estoit grant comandor. En tel maniere con vos aves oy furent desconfites les guallees des Jeneves et ce lor avint por ce que il armeent de gent a sos Lonbars quy ne saveent riens de mer et perdirent de puis en autre leus gualees con vos ores mais il puis desconfirent Pizans et Venesiens con vous entenderes en se livre si con chascun set.

286. Les Jeneves quy teneent lor rue et quy sestoyent si grant piece defendus et soufert grant travaill et pase grant charestie que en euf se trovoit a envis por un nafre quant il virent lor guallees desconfites si guerpirent lor rue et se mirent en lospitau et puis alerent demourer a Sur; et les Pizans et Venesiens abatirent lor rue et la tour et toutes lor maisons sauve lyglize et sire Lorens Cope porta en Veneize .i. piere dou fondement de la tor de Jene et des autres pieres; les Pisans et Venesiens murerent lor rues.

287. En ce dit an avint par le plaizir de Dieu que le seignor darsur baill dacre Johan de Yblin morut.

288. Quant vint lautre iste apres se fait Jeneves armerent .xx. guallees et firent .ii. amirails et fu lun sire Beneit Sacarie et lautre ne vos sais nomer. Et vindrent ses .xx. gualees a Sur et les Venesiens armerent .xxiiii. guallees et vindrent a Acre et dacre a Sur et par devant Sur nesirent les .xx. guallees des Jeneves et se conbatirent as Venesiens en tel maniere que sire Beneit Sacarie fery as .x. guallies et lautre amiraill tourna en deriere sans ferir et entra dedens le port; et sire Beneit Sacarie fu pris et si fu mene en Veneisse la ou il fu en prison .i. tens et li firent jurer les Venesiens de non venir a nul tens contre Venesiens et ly firent souffrir en prison mezaises ases; et en ceste maniere les Jeneves perdirent devant Sur ses .x. gualees.

289. De puis vous diray encores que il avint as Jeneves de meschef: il armerent .xxvi. guallees lautre iste apres et les manderent por damager les Venesiens par la ou il les trovassent et fu lor amirail .i. quy fu apele Borborin et sestu vint a Trappe et fu si poy curious ou que il le feist de son gre por deniers que lon veut dire que Venesiens ly donerent que sestu laissa desendre les gualees en terre par les jardins de Trape quy ne remest pas en chascune gualie .lx. homes et survindrent .xxviii. guallees de Venesiens quy les enclorent au port et prirent tous les .xxvi. guallees sans nul home car si con vos aves oy tous estoient en terre et siaus qui se troverent sur les guallees si se virent poy et se lanserent en terre et meismes lor amiraill Borborin et son fis quy se troverent en terre si fouyrent hors de la ville par terre; et par tel maniere furent perdus siaus guallees.

290. Encores armerent .i. autre fes les Jeneves .xxviii. guallees et mirent desus .iiii. amirails que ses sont lor nons: lun fu apele Oric duc quy estoit de siaus despine et lautre fu nome Ote Vent et lautre si ot nom Simon de la Charite et le cart ne vos sais nomer; et vindrent ses .xxviii. guallees susdites en .i. leuc quy sapele Settepons et la sencontrerent as Venesiens quy furent autre .xxviii. guallees et se combatirent les uns as autres et avint au derain que les Jeneves furent desconfis et perdirent .xiii. guallees et eschaperent les .xv. et furent mors en la bataille mout de gent dune part et dautre et morurent .ii. des .iiii. amiraus sest asaver sire Oric duc et sire Othe Vent et Simon de la Charite et lautre eschaperent. Et quant les Jeneves se virent ainssi mesdit si se laisserent darmer .i. grant tens sauve tant que il armerent lains menuement et damagerent mout lor henemis par plusors leus et nentendeit mie que ses .ii. armees que Jeneves furent et perdirent et furent faites en un an ains furent faites en .iii. annees par .iii. istes et dedens ce mout de choses furent avenues outremer et en Surie si con je vos devizerais si avant.

291. Il avint chose que depuis que ceste guerre des Jeneves fu finee que le prince dantioche et conte de Triple fu mout escur et de male volente contre le seignor de Gibleth et contre sire Betran de Giblet et lor lingnage. Atant mostra le prince de senblant et en fait et en dit que le seignor de Giblet et sire Betran de Giblet et lor lingnage sen apersurent bien et ne mostrerent nul semblant et lachaison si fu por ce con vous aves oy que le seignor de Giblet manda secours as Jeneves en Acre en .i. sien lein quy se disoit poindor quy voguet .c. rins et de ce meismes en persone fu aucuns jours dedens la rue de Jene a Acre et de se ausi que sire Betran de Gibelet ala contre les Jeneves o le bot de sa lance et le fer deriere sa sele con vos oystes et estant a sel estat le prince de volente con je vous dis avint que les chevaliers de Triple eurent contens au prince pour chaison des Romains.

292. Dont il avint que le seignor de Giblet et le seignor dou Botron et les autres chevaliers se revelerent au prince et se partirent de Triple et firent chef sur yaus Betran de Giblet; et sestu Betran si fu celuy qui parla en Damiate devant le roy de France pour henor de cestuy prince con je le vos ai dit et esteit chevalier preu et hardy et fort et bien menbrant; dont il et la gent que il ot a chevau et la favor de lospitau de Saint Johan chevaucha par la terre dehors et damagierent la terre dou prince dont le prince fu mout courouse et an isir en champ contre iaus il nen avoit la gent et le Temple si estoit en laye dou prince si con lospitau estoit en aye de siaus dehors fortant que fu estably coment il ne le mostreent pas.

293. Il avint un jour que cestu messire Betran de Giblet si vint par devant la cite de Triple et mena o luy mout de gens a chevau et a pie car si con je vos ai dit tous les chevaliers la plus grant partie si esteent tos dehors reveles contre luy mais quant il se vy asege si en eut grant despit et asembla se quil post aver de gens et nissi dehors et se combaty a ciaus de hors; et en la fin le prince fu desconfit et se mist a aler tant come il post a Triple mais le dit Bertran laparsut si ly courut apres et latainst a lentrer de la porte de la site et le fer latainst a lespaule et li fist une plaie criant: Le vil et mauvais retornes ariere et ne foies mie.

294. Le prince entra en la site et pour sa plaie jut au lit grant piece et puis quil vint a amendement il sapensa mout de pourchaser priveement par vilains des cazaus coment il meist a mort le dit Bertran et tant fist et pourchasay que par ses vilains meismes dou dit Bertran il eut la teste si con je vos diray.

295. Il avint que le dit Bertran luy et .i. chevalier jeune son compaignon ala pour veir .i. sien cazau et ses rentes et quant il fu a la montee dou dit cazau et il fu sur .i. replait dur et esquyllant pres dun mur bais dune vingne et derere seluy mur saillirent vilains en tour de .x. ou .xii. quy la saillirent as ars et li traistrent piles dont il cuyda torner a yaus et atorner. Le chevau ly chey dessus luy sur seluy replat esquillant en tel maniere que le chevau ly jut sur la cusse quy ne se post redreser et il avoit lespee nue en la main que autre arme il nen aveit et se defendeyt que nul nen ozet aprocher a luy mais tant ly traistrent de piles quil le tuerent et taillerent sa teste et lautre chevalier son compaignon fu feru luy et son chevau de plusors piles et sestoit mis a aler et estoit ja venu a pie de la montaigne mais les vilains li coururent apres et li coperent la teste dont les vylains porterent la teste dou dit sire Bertran en .i. profiniau au prince quy en ot grant joie et les paia mout bien.

296. La novelle fu dite entre les chevaliers quy furent mout doulouros et perdirent le cuer trop malement que nul rien ne les pot conforter ny aseurer et messire Hue de Giblet pere dou dit Bertran si les reconfortoit et disoit que il lors seroit en leuc de son fis et les amonestoit de maintenir la guerre et non abandoner le fait quar il seroit pis pour yaus mostrant leur pluzours raysons mais il ne vostrent entendre ains porchasserent lor pais au prince et tornerent a Triple sauf le seignor de Giblet quy fu enconfine a Giblet; et le seignor dou Boutron ala en Acre et fu fait conestable dou reyaume de Jerusalem tant com il fu et messire Johan de Giblet frere de messire Hue ala ausi a Acre et fu fait mareschau dou royaume de Jerusalem et morut a Acre apres .i. tens et messire Hue de Giblet pere dou dit Betran mena o luy les anfans de son fis a Acre et demoura a Acre et toute sa vie porta barbe pour deul de son fis. Or vos laira deaus a parler et si vos parleray dautre rayson.

297. En celuy tens que ce fait avint .i. haut home de France qui ot nom messire Jofrey de Sardeigne fu fait baill dou royaume de Jerusalem a Acre et se fu apres que messire Johan de Yblin seignor darsur qui estoit bail fu mort.

298. Cestu messire Jofrey si fu mout fort justizier et en son tens pendy mout de larons et de murtries ni onques ne vost nul esparaigner pour lingnage ny por aver que lon li peust doner ni por amiste ni por autre chose et entre les autres pendy .i. chevalier quy ot nom sire Johan Renia quy avoit tue .i. vesque de Famagouste et le prist par force a gens darmes de la rue de Pize ou il sestoit resete et Pizans le rendirent; et si vos laira a parler de luy et vous diray dune autre estoire.

299. En lan de lincarnasion de Nostre Seignor Jhesu Crist .mcclx. que le plus grant seignor quy fu chef sur tous les Tatars quy sont dever nos parties quy ot nom Halaon lequel avoit .iii. freres et il estoit le cart et furent fis dou haut seignors des Tatars lequel quant il morut ses .iiii. fis quy demorerent apres luy si furent en contens de partir la seignorie entre iaus et en la fin sacorderent quy partirent laver et la gent au tel part a lun come a lautre et lor abitacle fu gete assort car ensemble il ne porent vivre si grant gent et fu fait .iiii. pars lune ver levant et lautre ver ponent et a tramontane et a demy jour et avint chose que la part de cestu Halaon vint ver nos parties et les autres freres eurent lor parties en la quele chascun ala demourer en sa partie et conquist chascun en dreit sei se quil post conquerre et acreistre de seignorie.

300. Cestu Halaon dont je vos parle si fu mout vaillant home et plus prous entreprenant que nul de ses freres; si conquist et fist plus de biaus fais que nul de ses freres ne firent et si ot a sa part la meillour gent darmes qui demorerent de lost de son pere si con saventure fu a partir quant les freres partirent laver et largent quy demora de lor pere.

301. Cestu Halaon si conquist Baudac et Toris et Perce si con je le vos devizerai apres en cestu livre et ores chevaucha vers la Surie et conquist et prist Halape et Harant et Haman et La Chamele et vint a Doumas et la prist quy est mout grant cite et mout abitee de gens et de jardins; et toutes ses cites estoient des Sarazins et les prist sans defence nule que il feissent car les Tatars estoient bien .cxxm. homes a chevau.

302. Haiton roy dermenie si ala a se puissant seignor Halaon et ala en sa terre avant se quil se mist a venir et se fist son home et tant lenorta et conseilla que il se mist a venir a si grant host con vos entendes et ci fist et porchassa le bon roy dermenie pour mau des Sarazins et par pourchas dou roy dermenie et le prince Baimont quy ce dizoit le biau prince et fu mout en la grace de ce haut seignor Halaon car le dit prince estoit gendre dou roy dermenie.

303. Le roy dermenie et le prince dantioche devant dis si alerent en lostel des Tatars et furent a prendre Domas; et quant Domas fu prise le prince pour despit des Sarazins et pour lor honte si fist faire neteer et ensenser une mout bele iglise quy fu dou tens des Gres des crestiens au tens que Eracles fist labourer Domas en la quele yglize aourerent par dedens les Sarazins a Mahomet quy fu ansienement des Gres lor yglize et fist laens chanter messe des Frans et soner campane et en les autres mesquylees de Mahomet la ou Sarazins aouroient si fist faire metre ronsins et ahnes et espandre vin par les murs et oindre de char de porc freche et salee et si comandoit a sa gent de faire .i. ordure il en faissoient .x. Et puis que le dit Halaon ot prises ces sites que je vos ais nomes il fist son retor et se paira et sen ala en sa terre et fist de biaus dons au prince asses et lacuilly en samiste de la en avant; et remest en la terre dou royaume de Jerusalem .i. grant seignor tatar quy ot nom Coutbaha et une grant gent de Tatars quy alerent a Seete et la prirent subitement; et au prendre y ot aucune defence par le seignor de Seete messire Julien quy estoit sur son chevau a lentree de la porte et defendoit lentree ausi poy de gens com il ot si vigourousement et osist .ii. chevaus sos ly et tant maintint a defendre lentree que la menue gent et eurent grant espase deaus recullir a .ii. chasteaus de terre et de mer. Et lor avint .i. autre aventure quy vient bien a la menue gent que .ii. guallees des Jeneves veneent de Sur et aleent en Ermenie et esteent de sire Fransesquin de Grymont et se troverent seluy jour a Seete quy recullirent mout de gens et les mirent en une ihle quy est devant Seete bien pres dedens le chasteau de mer et en la fin le seignor de Seete ne post soufrir le charge des Tatars desquels il en osist et abaty ases sur le pont devant la porte et sen repaira et entra au chastiau de terre. Et les Tatars entrerent adons et prirent la vile et taindrent aucunes menues gens quil tuerent et autres que il prirent et tindrent tant Sayete que il abatirent les murs de la ville et dounerent aucun asaut au chastiau de terre mais il ne firent rien et se partirent et alerent; et en sel an messire Julyen si vendy Sayete au Temple car il nen ot de que refaire la des murs quy furent abatus.

304. Cestu Julien fu .i. chevalier prou et hardy et vygourous mout estordy et legier de la teste et de persone grant et menbru et gros os et fournis avoit et estoit mout lussirious de ses chars et grant jouour de hazart et y se mist por le jeuc a nient. Il fu fis dou nevou de messire Phelippe de Monfort seignor de Sur et de Thoron et par sa estotie fist guerre a cestu sien oncle et vint devant Sur a chevaliers et tricoples et la fist damage a sa terre dehors et sen torna a Saiete; mais je vos laira a parler de ceste rayson et dirais autre chose.

305. En cest an avint que le Temple et le covent dacre et de Safet et de Chastiau Pelerin et de Biaufort et messire Johan dyblin seignor de Barut fis quy fu de Balian dyblin seignor de Barut quy prist Sur des Longuebars et Johan de Giblet maureschau dou royaume de Jerusalem et chevalier plusors dacre se partirent et alerent brizer une grant herberge de Turquemans ver Thabarie et furent malement desconfis; et furent pris messire Johan dybelin seignor de Barut et Johan de Giblet mareschau dou royaume et le coumandour dou Temple frere Mahe Sauvage et plusors autres chevaliers dacre; et mout de sergans a chevau et a pie furent mors et pris et perdi le Temple tout son harnes et eschapa frere Estiene de Saisi mareschau dou Temple dou quel fu dit que il fist son poindre sur les Turquemans mauvaisement et ne fery mie ains torna au parfait dou cuer ou que il le fist volentiers par male volente que on disoit quil portoit au seignor de Barut por envie dune fole jelouzie dune dame de se pais mais ou quil fust ensi ou autrement le maistre dou Temple le manda outremer et li leva labit lequel demoura a la court de Rome tant que pape Gregoire Plaisenty que estoit a Acre quant il fu ehlit a pape; et cestu frere Estiene de Saisi vint por luy a Acre et adons par ce pape recovra labit dou Temple et ala outremer o le dit pape.

306. Le seignor de Barut fu pris des Turquemans con vos aves oy et furent pris frere Guillaume de Biaujeu quy fu puis maistre dou Temple et fu pris Tibaut Gaudin et fu puis comandor de la terre dou Temple longuement et aucun autre frere.

307. La raenson dou seignor de Baruth et daucuns autres o luy fu parle et fu rachete por .xxm. bezans sarazinas et furent delivres luy et messire Johan de Giblet mareschau dou royaume de Jerusalem et Jaque Vidore et autres chevaliers et frere Guillaume de Biaujeu par ses amis fu delivre et .i. sien conpaignon et frere Tibaut Guaudin et autres .xiii. freres car plus ne se troverent vis; et ores vos laira a parler de ceste raison que autre choze ne fu et vos diray des Sarazins de Babiloine.

308. Qant les Tatars eurent prize Halape et Harent et Hama et La Chamele des Sarazins et puis Sayete des crestiens con vos aves oy le soudan de Babiloine fu mout courouse et asembla quant que il post aver de gens a chevau et a pie et issy de Babiloine et avint au royaume de Jerusalem et manda mesages a Acre preant les crestiens quil les deussent soufrir a paser par lor terre a aler contre les Tatars. Les crestiens lor otroierent volentiers et ce fu por ce que les crestiens furent courouses as Tatars por le mau que il aseent et le soudan vint a tout son host devant a Acre et se herberga au plain bien pres de la site dacre et entrerent pour iaus dehdure. Et entre les autres entra .i. grant amiral quy ot nom Bendocdar quy fu puis soudan et fist mous de maus a la crestiente con vos ores apres et por ce que il entrerent tant des Sarazins que siaus dacre douterent destre trais et les bouterent hors par force et par amour.

309. Les crestiens traiterent .i. marche as Sarazins que toutes les bestes chevalines quy guaignireent des Tatars les deveent vendre as crestiens a .i. sertain pris quy fu dit entre iaus dont il avint que Sarazins quant il heurent gaaigne ne firent point.

310. Ce dit soudan seut noveles par ses espies que Tatars estoient mout espandus par celes contrees: si se parti dou plain dacre et ala a iaus et fist cheveteine de lizeq de son host sest a saver lavant garde cestu sien amirail Bendocdar lequel avoit este son memelouc achete de ses deniers et portet larc de mot dou soudan et pour ce fu il apele en sarazins Causbondoc. Et sestu Bendocdar fut mout hardy et mout prou et afronta premier a Tatars et les desconfist et desbarata malement et en osist ases et Tatars se ralierent et en tant fu venu le soudan a son grant esfors et fu la bataille entre yaus mout fort; mais lesfors des Sarazins fu si grant que Tatars ne le porent soufrir et se mirent a desconfiture et fu mort en la bataille lor cheveteine Cotbaha et siaus quy fouirent de la desconfiture les vilains de la terre par les cazaus si les tuerent et siaus quy se porent ralier alerent en Ermenie et la se sauverent et seste bataille fu a .iii. jours de setembre de ce dit an as plains de Thabarie.

311. De puis ceste bataille que vos aves oy le soudan de Babiloine se mist a retorner en Babiloine a mout grant boubanse et a grant joie que poy li dura car entre vees si com il se tornoit sestu amirail Bendocdar par assent des autres amiraus quy furent la plus grant partie de son asent et de sa suite si osist le soudan et sen parti piestant luy et aucun des amiraus de samiste et ala en Babiloine et entra au chastiau dou Caire et trova seluy quy gardoit le chastiau quy ot nom Tebec et sapelet Feres Cataie sage home et mout ansien de la painime et quy savet mout bien dou siecle. Sestuy Bendocdar li fist entendant coment le soudan estoit mort entre vees et que il ne conusset nul autre en la painime plus sage ni plus digne a estre soudan que luy et de ce il le revestoit; et a cest parole il traist sespee et la vost metre en la main en maniere de luy revestir de la seignorie mais seluy fu sage et ne vost prendre lespee et dist que la soudanie aferet miaus a luy que a nul autre que il couneust au monde pour la grant promesse et valour de luy et Bendocdar respondy puis que il vos semble que je soie digne destre soudan et que vos aves .i. autre soudan fait quy a nom Melec el Vahar quy vient a dire en frances le roy aparant car les soudans ont par usage quy se font apeler quei non que il veullent autre que lor non propre si com les papes font. Et ensi fu fait soudan et fist crier le banc par la terre con vos aves oy devizer et tous les autres Sarazins de lost entrerent en biaus troupiaus les uns amiraus apres les autres et si com il entrerent aleent au soudan nouviau jurer a luy et i faire reverense.

312. Et en lan de lincarnasion de Jehsu Crist .mcclxi. morut pape Alixandre et apres luy fu fait pape Urbain qui fu patriarche de Jerusalem. Cestu rapela le don que pape Alixandre avoit done saint Lardre de Betanie et Montetabor a lospitau de saint Johan.

313. Et en se dit an morut la raine Plaissance quy fu feme de Henry roy de Chipre et mere de Huguet heir de Chipre la quele trespassa a .xxvii. jours de setembre.

314. Et en se dit an meismes fu fait bail dou royaume de Chipre Huguet de Lezingniau quy fu fis de Henry dou prince et de madame Yzabiau seur dou dit roy Henry de Chipre.

315. Et en ce dit an meismes a .xxv. jours de jungnet les Gres prirent Costantinople des Latins et Palilogue se fist enperor et ce fist nomer Costantin.

316. Et en lan de lincarnasion .mcc. et .lxii. le soudan de Babiloine Bendocdar quy se fist nomer Melec el Vaher ala aseger Antioche mais le roy dermenie si estoit ale a Tatars et les fist ehmeuer de venir et les Sarazins laiserent le siege dantioche et sen tornerent en Babiloine.

317. Et en se meismes an lan de .mcc. et .lxii. de lincarnasion de Crist Charle conte dango frere dou roy de France si asega Marseille dont sil dedens se rendirent a ly par force et en fu seignor et mist justizier en la terre de par luy.

318. Et en lan de lincarnasion de Crist .mcc. et .lxiii. Bendocdar quy estoit novyau soudan manda mesages a Acre a la crestiente que il voloit changer les esclas crestiens quy tenoit por les esclas sarazins que crestiens tenoient et dounes .ii. Sarazins pour .i. crestien. Et sur seste chose furent au conseil crestiens et si lor sembla bien afaire et amohne mais le Temple et Ospitau ne sacorderent pas dissent que lor esclas estoient lor grant proufit car il estoient tous gens de mestier et que trop lor cousteroit a tenir a sodees autres gens de mestier et pour ce ne se vostrent acorder a se et ja soit se que il dissent verite toute fois il le deussent avoir fait pour Dieu et pour la delyvranse des povres esclas crestiens.

319. Le conte de Jaffe Johan dyblin fist eschange de ses esclas au soudan et le soudan ly fist triue et tint sa terre en pais et a repos et envers les autres crestiens fu il pour cestu fait mout courouse et le mostra bien apres car il vint devant Acre a .xiii. jours davril en dit an.

320. Et a .xv. jours davril courut jusques as portes dacre dont la site fu en grant peril et adons fu nafre de piles le bail dacre messire Jofrey de Sardeignes et plusors autres chevaliers et sergans de quei plusors en furent mors; et en sel an vint a Acre Izabiau feme de Henry dou prince et seur dou roy Henry gras de Chipre et son espous requist le baillage dou royaume de Jerusalem et requist les homages des homes quy ne li vostrent faire pour ce que le droit heir nen estoit en prezence. Et toutes fois le resurent a baill et vint sel an a Acre a .xxv. jours de setembre leguat et patriarche de Jerusalem et menistre del vesque dacre Guillaume quy avoit este vesque dagent et sen torna a Rome la leguat Thomas de Lentin; et ores vos lairay de ce a parler et vos diray dune autre aventure.

321. Et en lan de Crist .mcc. et .lxiiii. les Jeneves en Jene armerent .xxi. guallees de la gent de la cite de Jene et de lor riviere; et fu amirail et cheveteine .i. grant home de Jenne sage et counoissant et quy savoit mout de guerre quy fu nome messire Simon Gril. Quant sestu party de Jenne si fu dit que siaus de sa contraire part de Jeneves meymes firent asaver le fait des guallees a Venessiens en Veneysse et coment ses guallees des Jeneves esteent issues; et por ce armerent Venessiens tant tost .l. guallees por aler apres les guallees des Jeneves; mais je vos diray lengin que sestu Simon Gril fist en son viage.

322. Il se party de Jene a ses .xxi. guallees et vint en Sezille et jeta la vos que il aloit a Sur de Surie; et meismes avoit leuc en Gene marchans aucuns cuydant ses marchans que il alast a la Surie et de son corage nen vost dire a nulluy et party de Sezille et ala a lentree dou goulf et tous les leins quy trovoit dissoit a la gent que il alet a Sur; et de puis que il ot bien pullyque par tout que il aloit a Sur si repaira et se mist a lihle de Maute et mist a lagait de lissue dou goulf de Veneise .i. lein soutil pour descovrir. Et estant il a Maute les Venessiens quy aveent arme .l. guallees con je vos ay dit nissirent de lor goulf par cil leins quy aveent trove les guallees des Jeneves et lor distrent quil esteent alees a Sur; et pour ceste seurte ses Venesiens de ses guallees manderent .i. lein a Veneisse faire assaver a la caravane des marchans venessiens quy devoient aler a lor veage car il estoient sertains que les guallees des Jeneves estoient ales a Sur et que il aleent apres; et pour seste novele les marchans partirent a lor caravane de Veneise et se mirent en lor veage et les .l. guallees des Venessiens alerent dreit a Sur. Mais je retornerais a dire de Simon Gril et des guallees de Jene qui estoient a Maute. Le lein quy avoit laisse por descovrir quant il vy les guallees dou Veneise paser outre et nissir dou goulf si vint en Maute et le fist asaver a Simon Gril que tant tost se parti de luy a toutes ses gualees et entra entre le goulf de Veneise; et par .i. bien matin descovrirent la caravane des marchans venessiens quy esteent .xxii. tarides et une grant nave quy se nomoit Roquaforte. Et sy tost con les Venesiens virent les gualees si se tindrent a enginies et se recullirent trestous en la grant nave dou Roquaforte lor persones et laver soutil; dont les Jeneves prirent toutes les dites tarides et le leverent ce que il lor plost; et puys mirent le feuc a toutes les tarydes et cuyderent bouter une des tarides alumees de feuc par desus la nave de Roquaforte; mais le vent sesforsa et la nave fist vele et entra en Veneyse; et le dit Simon Gril se paira en Jene et la ou il avoit bien fait si fu il charge por ce que il nen ala en Surie si com il fu coumande. Or vos laira de Simon Gril et vos diray des .l. gualees des Venessiens quy aleent apres Simon Gril con vos aves oy. Si vindrent par .i. bien matin a laube dou jour et senbatirent subitement devant la site de Sur et se fayly poy sil se fucent avertis que il leussent prise car tout le plus de la gent dormeent encores et toute fois saillirent la gent et sarmerent. Et les Jeneves quy demoureent a Sur aveent .i. consele quy avoit nom sire Melian de Marin quy savoit de guerre et fist en la defense ases de bien car les Venesiens prirent aucunes de lor tarides des plus grans et firent des .ii. pieses de lantene de proe et les lierent lun a lautre un pont; et au chef dou pont avoit une guage rionde encuree faite a la forme de cage de nave et mirent .i. home dedens et colerent les antenes haut; et sacosta la guallee a mur de la ville en .i. leuc qui est entre la Tor de la Cheene et la Tour de sainte Cateline et veneir sele cage et lome quy estoit de dens si haut sur le mur quy lanseit javelos et pieres sur siaus qui esteent sur le mur si que nul nen ozeit estre sur les murs en seluy leuc la quele chose poet estre a grant peril. Et avint chose que le consele des Jeneves sire Milian de Marin si se trova cel endreit et lome de la cage li lansa .i. javelot et le fery sur la teste et li fausa .i. elme pizanes tout outre; et sil nen eust eu desous une serveliere mort leust; et se cop fu veu de mout de gent et adons le consele et les Jeneves prirent arbres de guallees et de grans vaussiaus et les claverent sur le mur et firent cages com cage de nave encuree et les coulerent en siaus arbres; et veneent plus haut de guages des Venessiens dont les homes venessiens quy de dens estoient nozerent paristre ny ferir ni lansser; et se partirent dou mur et alerent o lor autres guallees. Et dacre lor avint autre .vii. guallees de Venesiens et le seignor de Sur fist venir a Sur sergans archiers Sarazins vilains de sa terre et dacre meismes ly vindrent gens en saye ces amis si que Venesiens se partirent et alerent a Acre et la entendirent sertainement coment les guallees des Jeneves de Simon Gril prirent la caravane des machans venesiens entre le goulf.

323. Et en se dit an morut pape Urban cart et fu fait maistre Guy pape cardenal quy fu vesque de Sabine et arsevesque de Nebone et se fist apeler Climens cart.

324. Et en se dit an de Crist .mcc. et .lxiiii. morut Johan dyblin seignor de Baruth et si laissa .ii. filles et morut a Acre Huet heir de Sezare.

325. Et en se dit an le roy de Castel se combaty as Sarazins de Grenate entre Corde et Sebille et osist Sarazins .iiiim. a chevau sans siaus quy estoient a pie que furent ases.

326. Et en se dit an passa en la Terre Sainte a Acre messire Oliver de Terme quy fu .i. haut home despaigne prou et sage darmes.

327. En cestu an le pape fist senatour de liglise Charle le conte danguo et de Provence frere dou roy de France Loys.

328. En lan de .mcclxv. le soudan de Babiloine Bendocdar et se faisoit dire Melec el Vaher vint de Babiloine et prist Sessaire en Surie a .vii. jours de mars et puis asega le chastiau darsur quy estoit de lospitau de saint Johan de lor achet quy lacheterent de messire Balian dyblin de que il estoit le quel chasteau fu mout bien garny des gens darmes et dautres choses mais le dit soudan le prist par force dengins et de mines de .xv. jours de mars jusques au derain jour davril que il le prist et furent pris dedens chevaliers de religion et de siecle et sergans darmes .m. et plus et fu veu en Acre .i. signe cler come espee dou lonc dune lanse et large dune paume et venoit devers orient et se fery par semblant dedens le campagnier de Sainte Crois dacre et messire Hugue de Lezingniau quy estoit bail de Chipre vint au secours dacre et amena belle navie de gualees et dautres vaussiaus et .cxxx. chevaliers et sergans et vales a chevau plussors; mais ores vos laira a parler de luy et vos diray .i. autre aventure quy avint outremer.

329. En cestuy meismes an il avint que .i. haut home qui avoit nom Simon de Monfort qui estoit en Engleterre et avoit pour feme la seur dou roy dengleterre de quei il en avet plusors anfans et estoit conte de Glosestre et si ot grant guerre aveuc le roy dengleterre si come je le vos mostreray.

330. Il avint que cestu roy dengleterre ne laisoit rien quy ne dounast et sovent venoit a luy gens estrangers de pluizors provinces les quels il acuilloit et avansoit en toutes choses et ja soit se que il poiet tout se faire com seignor toute fois les chevaliers dengleterre la plus grant partie se courouserent mout de pareils fes en parlerent de ce et en la fin vindrent au roy et li dirent debonairement que il ne deust plus acullir gens estranges au pais dont le roy pour ce quil requistrent se amiablement et pour ce que li mostreent par plusors raisons que ce estoit le profit de luy et de sa terre si conpli lor proieres et lor promist en prezence les uns et des autres que il plus ne doit doner fieis ni terre a nul arme dou monde que par le gre de ses homes et manda pour le conte Simon de Monfort et vost que il fust chef de ses homes en ce fait dont il sen escuza mout et ne vost estre et desconseila mout le roy; tant lesforsa que il li fist otroer et jurer sur sains dont le conte Simon li dist bien que il se gardast puis que il les faisoit jurer que il poroit aler contre son sairement. Seste chose pasa un grant tens et quant la chose fu enveillie le roy failly de se fait contre les homes dont avint choze que les chevaliers requistrent au conte Simon de Monfort quy fust chef de seste bezoigne par le sairement que il avoit fait et pour le sairement maintenir se mist en laye des chevaliers dengleterre; et quant le roy dengleterre entendy lor afaire si se conseillerent luy et son frere le conte Richart quy se nomoit roy dalemaigne et .i. sien fis qui se noumoit Odoart qui estoit ja parcreus et grant et biau chevalier de prendre le conte de Monfort et aucuns autres contes et vavasours et puis autres venreent bien a chef; mais avant se quil eussent mis a euvre lor propres le conte Simon de Monfort et les autres se partirent et yssirent hors de la site ou li rois estoit et firent .i. host contre le roy dont le roy veant les venir contre luy si lor vint a lencontre a cel poy de gens quil post avoir mais siaus dou conte furent ases grant gens et dura la bataille poy et en la fin le roy et les siens furent desconfis et si ot plussors mors dune part et dautre et fu le roy son cors pris et fu pris son fis messire Odoart et le frere dou roy qui ot nom Richart et se disoit roy dalemaigne et aucuns autres chevaliers et plussors eschaperent de la bataille quy soustindrent et maintindrent les chasteaus et les fortereces dou roy.

331. Le roy dengleterre et son fis messire Odoart si furent en la prison dou conte Simon de Monfort de Glocestre et pour ce quil estoient mout prochains a la contesse sa feme dou conte Simon si furent en large prizon et sans destrece et messire Odoart quy estoit jeune chevalier si chevauchet tous les jors aveuc le conte. Et quant messire Odoart vi que le conte se tint aseur de luy si manda porchasser .i. chevau fort et ihnel et bien courant et seluy qui li porchassa li en fist present et quant ileuc le dit chevau et leut chevauche et esprove por bon il manda a ses homes chevaliers de sa partie quy deussent venir en .i. leuc qui lor manda devizer qui est pres de sel chasteau ou il estoit et quant il sereent venus la quil li feissent a saver piestant et que il se meisent la de nut tous enssi com il lor manda. Ensi le firent et furent .ccc. chevaliers armes et bien montes sur lor chevaus sans nul autre maihnee et se mirent de nut en celuy leuc et piestant le firent asaver a messire Odoart par .i. garson et entreseignes.

332. Quant vint a laube dou jour le conte Simon de Monfort si chevaucha si com il estoit uze et messire Odoart o luy quy fu monte sur celuy sien chevau si se mist a gualoper a destre et a senestre soi aloignant tout jour de la route dou conte; et quant il fu bien aloignes si se mist a courre dissant: Adieu conte de Montfort. Et sen ala ver le leus ou ly chevaliers de lenbuchement estoient quy saillirent tantost hors et le resuerent. Le conte et sa gent li aleent apres et ne le porent ataindre et quant il virent les chevaliers yssir de lenbuchement si reparerent arier et siaus enmenerent messire Odoart quy fu delivre con vos entendes.

333. Messire Odoart si asembla gent tout ce quil post aver a chevau et a pie et vint encontre Simon de Monfort et quant il fu pres si manday avant un poy de gens a chevau quy porteent banieres as armes de Monfort.

334. Le conte Simon avoit mande a ces .ii. fis quy estoient en .i. autre chasteau coment messire Odoart estoit eschape de sa prison et coment il asembleit mout de gens pour venir ly encontre et que iaus le venissent secourre; et por ce quant le conte Simon vy la gent de messire Odoart venir quy porteent banieres de Monfort si yssi encontre pour iaus resevoir et toute fois nissi il arme luy et sa gent mais sans nul ordenement con sil qui ne se prenoit guarde de cest aguait; et sil fust yssu ordoneement ne li fust pas mezavenu car il estoit prou chevalier et hardy et de grant cuer dont il avint que quant il fu hors o partie de sa gent et de son poer si se trova deseu con vos aves oy car la gent de messire Odoart quy veneent premier jeterent a terre les banieres de Monfort et leverent les armes de messire Odoart et coururent sus au conte Simon de Monfort et a sa gent et fu la bataille entreaus et messire Odoart survint apres quy lor corut sus tous fres et fu la bataille mout aspre et morut gens ases dune part et dautre et en la fin le conte Simon de Monfort si fu desconfit luy et sa gent et le conte son cors si fu pris en persone vif et quant il vint meismes de la bataille messire Odoart demanda conseil a .i. sien couzin germain qui ot nom messire Henry dalemaigne lequel estoit ausy couzin germain des anfans dou dit conte Simon enfans de .ii. seurs se que il feroit dou conte Simon. Le dit messire Henry li conseilla et li dist que sil voloit aver repos et metre fin a la guerre que il feist tailler la teste dou conte Simon et fereit dire que il fu mort en la bataille por se que lon ne le tenist a laidure daver le tue puis que il fu pris; dont messire Odoart par le conseil dou dit messire Henry dalemaigne fist sele nut coper la teste au dit conte Simon de Monfort et si le fist jeter au champ entre les autres mors. Saches que en selle bataille furent mors mout de chevalers et autres gens dont aucunes y ot contes et barons de quey le pais en fut mout amerme.

335. Apres cest mortel bataille tous siaus de la partie dou conte Simon de Monfort furent mout desconfortes et esmaies sans plus desperance et delyvrerent le roy dengleterre et son frere le roy dalemaigne et les autres quy estoient en prisson.

336. Ly roy quant il fu en Salibiere il mist main sur ses aversaires et fist morir aucuns et plusors autres tint en prisson la ou il moroient de fain et de mesaise et par destrece.

337. Or vous diray de puis quil avint ceste guerre cestuy haut home messire Henry dalemaigne vint en une vile qui a nom Viterbe et aleit a Rome por estre empereor dalemaigne; et estoit la a Viterbe dedens une yglise ou il oyet messe Guy de Monfort fis qui fu dou conte Simon de Monfort dont je vos ai parle et le dit Henry conseila a messire Odoart de talyer la teste au dit conte Simon de Monfort. Si vint la a Viterbe et entra en la champele et fery dun bourdon par mi le cors dou dit Henry dalemaigne en vangance de se quil conseilla de tallier la teste de son pere con vos laves oy; et se party et ala en Toscane.

338. Cestuy Guy de Monfort si avoit a feme la fille dou conte Rous de Touscane et amena o luy de la gent de son sengneur .l. chevaliers et autres gens a chevau por se fait faire dont le pape lescomenia .i. tens et puis fu asot; et saches que cestu Henry dalemaigne estoit couzin jermain enfans de .ii. seurs si con je vos ay dit autre fois; et ores vos lairai a parler de ce et vos diray .i. autre aventure.

339. Il avint en se dit an de .m. et .cc. et .lxv. de lincarnasion de Crist que .i. saint home des haus barons de France quy fu conte de Neveres et le conte de Nantuel et messire Alart de Valerie et .lx. chevaliers de France si vindrent en la terre sainte de Surie et au servise de Dieu et plost a Nostre Seignor que se prodome conte de Neveres morut a Acre et fist son testament de tout ce quy se trova dou sien de monoie et de harneis douner tout pour Dieu as povres gens; et saches que Nostre Seignor fist pour luy miracles car tous malades quy atouchoient a son monyment estoient tant tost guaris de lor maladie. Or vos laira a parler de ce et vos diray .i. autre grant fait quy avint en ce dit an lan de .m. et .cc. et .lxv. de Crist.

340. Charle conte dango et de Provence frere dou roy Loys de France quy prist Damiate si vint a Rome et mena o luy .m. chevaliers frances et fu corone dou royaume de Sezile par le comandement dou pape Climens; et apres ala contre Manfre quy estoit conte de Sezille de quei je vos ai autre fois parle dou fis de lempereor Federic ney avant dou mariage et vos ais dit coment lempereor espouza sa mere quant elle vint a mort pour luy aleauter.

341. Cestuy Manfrey quant il oy que Charle se fu encouroune de son royaume et li venoit encontre si porchasa gens par deniers et par amiste tant que il asembla .i. grant host a chevau et a pie et especiaument aprocha a luy les Sarazins de Nocheres et ce fia de tout a sa force ni ne se vost de tout premier acorder a liglize. Si ala en la bataille escomenie et ert rebel contre liglise; et saches que gens quy regarderent a sors a quil fist reguarder et li aveent dit que il trovoient en lor sors et par lor reguart que il devoit morir en la bataille en .i. champ des flours; et por ceste paor il eschiva quant que il post dencontrer soy au roy Charle et por ce eschiva tant quy ne post puis car tant con le roy Charle estroit en sa terre et Manfrey aloit droit de lonc par devant et si come aventure done le roy Charle prist a torner en deriere et non a penseement et fist son tor par une autre vee contre Manfre. Et Manfre que riens ne savoit de se si aloit tous jours de lonc cuydant que le roy Charle li venist deriere mais quant vint le matin a laube dou jour les .ii. ost se vont encontrer et quant Manfre le vy ne vost retorner por non metre la gent en route; et arestant ensi Manfre demanda de seluy leuc le nom. Lon li dist que ce estoit de Saint Jermain laguillier et que ce champ ou lost estoit avoit a nom le Champ des flours. Manfrey de seste parole fu mout desconforte et douta la devinaille et toute fois se prist a conforter et atendy la bataille. Et le roy Charle fist armer sa gent et devizer ses batailles et fist chanter mese a lhenor de Dieu et ala vers la bataille de Manfrey qui venoit escomenies a la bataylle y venoit perilliouzement et por ce li meschut et le roy Charle ot chevaliers frances .m. ehlis adures darmes et si ot sergans a chevau et velles et mehnee gens aydans autres .m. largement et sergans a pie une grant cantite. Manfre en avoit de toutes gens .vm. a chevau et plus et gens a pie une grant cantite si que la bataille comensa mout pres et si ot de cos dones et pougneis fais les uns as autres; et en se mileuc nus ne se conussoit mye bien quy avoit le meillior si que une aventure avint que Manfrey se tenoit dune part sur .i. tertre et avoit .xl. chevaliers en tour ly. Si avint si come aventure doune que .i. cariau dabalestre fery en la main de seluy quy tenoit le confanon de Manfre devant luy et persa la main o tout la teste si que le confanon chansela si bas quy sembla as chevaliers frances quy fu abatu par lor gens et crierent mout haut: Alons avant que tout est nostre. Et courut le roy Charle et le meillor de son host en sele place si que lost de Manfrey ne post durer et se mist en desconfiture sans retour.

342. En celle bataille si ot mort gens asses a cheval et a pie entor .xm. persones et fu trove mort le roy Manfrey et si tost ciaus de Sezille et de Principaut et de Poylle et de Calabre se rendirent au roy Charle.

343. Le roy Charle prist la feme dou roy Manfre et .i. sien fis et une soue fille damoisele et les tint en prison en .i. chastiau.

344. Cestu Manfrey si avoit .i. autre fille qui ot nom Costance quy estoit mariee au roy Piere daragon quy avoit .i. fis ahne quy fu nome Jame que puis fu roy daragon et lautre fu apele Federic des quels je vos parleray si avant quant tens sera.

345. Et quant fu en lan de Crist .mcclxvi. Bondocdar fu soudan de Babiloine et de tous les Sarazins car a son tens il nen avoit en nulle terre soudan nul des Sarazins for ly et toute la painime fu sous sa seignorie.

346. Le soudan vint devant Acre et demoura .viii. jours au mois de gun et puis ala aseger Safet chastiau dou Temple mout biau et mout fort en la montaigne loins dacre une journee et manda a siaus dou dit chastiau son present a lusage des Sarazins; mais siaus dou chastiau li geterent son present as manganiaus de quei le soudan fut mout courouse et jura par son Mahomet qui les meteroit tous a lespee et tant tost fist dresier ses engins et saillirent le chastiau et li douna mout dasaus jusques a .xxii. jours de jungnet que il le prist; et si vos diray la maniere coment il le prist.

347. Quant la gent dou soudan prirent la barbacane dou chastel il perdy mout de sa gent car au chastel avet bones gens darmes freres et sergans et douta le soudan de prendre le par force quy ne perdist de sa gent et defendy lasaillir et fist crier son banc que tous les Suriens sergans archiers puissent nissir hors dou chasteau a sa fiance et ce fist il pour metre descorde entre les Frans et les Suriens si que les Frans distrent as Suriens quy les aveent trais et firent daun bataille entre yaus; et adons le soudan lor fist doner fort asaut et siaus dou chastel avoient perdu le barbacane et afeblis estoient durement et si estoient en grant descort les uns as autres et si nen atendeent secours de nule part car le chastiau estoit avirone des Sarazins de toutes pars et se crierent as Sarazins quy se tenisent de non conbatre car yl voleent mander lor mesage. Lon dist au soudan quy fist remaindre le combatre et siaus dou chastiau si furent au conseill et ordenerent de mander au soudan .i. frere sergant dou Temple quy avoit nom frere Lion Cazelier des cazaus de Safet et savoit mout bien la lengue sarazinese et li enchargerent a demander au soudan fiance pour les Frans si com il avoit done as Suriens par le banc quy fist crier. Cestu frere Lion nissi hors et ala au soudan et li dist sa mesagerie et le soudan li fist en audiens si bon respons come il post mais il apres soul a soul parla au dit frere Lion et li dist que il estoit mout courouse vers siaus dou chasteau quy li lanserent son present et li aveent mort mout de ses gens et que il les voloit tous faire morir si que il lor voloit doner sa fiance par la main dun amiraill quy avoit tout sa semblance et puis les feroit metre tous a lespee et se il se voloit travailler a porchascer sestu fait que il li feroit mout de biens ou se non le chastiau quant il le perroit il ly feroit faire aspre mort. Quant frere Lion entendy le soudan si ot grant paour que il li otrea de faire cant que il vost et torna au chastel et lor dist que le soudan li avoit otroie fiance a trestous et que il en persone lor jurera lor veant. Se firent mout grant joie seaus dou chastiau et quant vint lendemain matin le soudan fist venir sel amyrail quy li resembloit et le fist aler par devant le chastel a tel henor con lon faisoit a son cors et quant siau dou chasteau le virent si cuyderent que se fust le soudan et se tindrent mout aseur mais il furent trais et deseus et seluy amirail lor jura fiance de condure les a Acre sauf et seurs et nyssirent dehors le chastiau a toutes les mulases trosees de lor harneis con pour aler piestant a Acre car il non y a de chemin de Safet a Acre que mains dune journee. Et le soudan lor fist dire que il se repozasent sele nut et le matin le feroit mener a Acre et ensi lor covint faire et au matin si les fist tous prendre et mener loins de Safet demi liue sur un toron et la les fist morir les testes tallees et de puis fist faire .i. serne dun mur entour yaus; et encore perent lor os et lor testes et dit on et fu sertaine chose que luminaire dou siel vint sur lor cors plusors fois et crestiens et Sarazins aucuns le virent et .ii. freres menors furent aveuc yaus quy les tindrent fermes en la foy pour lor prescher qui lor fu grant profit a larme. Et frere Lion le Cazelier que pour paour de mort fist seste traison si se regnea et devint Sarazin; et ores vos diray autre chose que le soudan fist.

348. Quant le soudan prist le chasteau de Safet con vos aves oy tant tost se party et ala au royaume dermenie quy a mout fort entree et mout estroite mais il y entra par sa grant force et courut toute et la guasta et destrust mout de cazaus et prist menue gent; et le roy dermenie nestoit pas ains estoit ale a Tatars si que il avoit laisse ses .ii. fis: lun avoit a nom Toros et lautre Livon et le soudan osist Toros et Livon prist vif et le mena en Babiloine et mena mout de grant peuple de menue gent.

349. Et quant vint au mois daoust messire Hugue de Lezingniau baill dou royaume de Chipre vint a Acre et mena mout belle compaignie de gens darmes chevaliers et autres et puis que il vint luy et le Temple et lospitau et les Alemans et les chevaliers fransois et mout dautre gent a pie et a chevau et alerent en une chevauchee vers Tabarie et en lor chemin damagerent mout de leus de Sarazins; donc le cry se leva par la terre si que les Turs dou Safet de syaus leus entour senbucherent au Caroublier et au plain dacre frirent sur lavant garde de nostre gent que pour covoitize dou guaign estoient bien .iii. liues devant les autres et les desconfirent laidement sest a saver lospitau et les Alemans et les chevaliers franses de la compaignie de messire Jofrey de Sardeignes et plussors autres et en morut bien .vc. homes ou plus que a pie que a chevau des ques mout en fussent eschapes mais les vilains de la terre quy sont tous Sarazins les tuerent la nut trovant les amuses par les boissons por lor armeures et por lor robe prendre; et si avint en tel guize de cele chevauchee de la crestiente et en sel an au mois de delier morut .i. mout haut home quy ot nom monseignor Johan de Yblin conte de Jaffe de quey je vos ais autre fois parle si ariere.

350. Et quant vint en lincarnasion de Crist .mcclxvii. cestuy soudan de Babiloine vint devant et tout son host le segont jour de may portant banieres dou Temple et de lospitau et de Sur et surprist la povre gent de menue au plain dacre quy estoient missus pour guariter; et courut jusques as portes de la ville et ocist des menues gens quil ot pris .vc. et plus dont il nen ot nul de que ne ly fu trait le fiel dou cors et rongnies les testes a tout les cheviaus dentour par de sus les oreilles quy porterent au Safet et les passerent par une corde et les lyerent entour la grant tour dou Safet et tant y demoura con la corde post durer. Et lendemain retorna au Safet et a .xvi. jour de may retourna devant Acre et condut Buhohan depres le toron que lon apele Toron Salahdin et fist coure au plain dacre bien .iiim. homes a chevau dont la gent dacre saillyrent as armes et sonerent la campane por ce que tous gens yssisent dehors. A sel tens estoient venus a Acre .ii. haus seignors freres andeus mais il estoient de bas fis dou roy Jame daragon le veill: ses issirent dehors et le Temple et lospitau furent sur .i. toron quy est devant Acre si pres des murs come une abalestre traieret et poy plus et virent les .iiim. Sarazins par devant eaus et dou soudan qui estoit enbuche au Toron Salaheldin con je vos ay dit ne savoit lon novelles si que les .ii. seignors fis dou roy daragon que je vos ais nomes si voleent ferir as Sarazins et hasterent mout les Templiers et les Ospitaliers et lor distrent de groses paroles miaus siaus ne lor vostrent croire de rien car sil eussent feru la site fust este perdue si con je vos le diray apres se.

351. Estant ensi les Sarazins con je vos dis bien matin vos diray que meschance avint as crestiens. Nos aveemes de sa la mer .i. haut home de France quy se nomoit messire Robert de Crezeque que selle nuit avoit luy et messire Oliver de Terme et autres chevaliers et tricoples estoient issus hors pour brisser cazaus de Sarazins et furent bien .cxxx. homes a chevau darmes sans les escuers et chevaucherent as parties dun chastiau quy a nom Monfort des Alemans et a selle houre que ses Sarazins estoient au plain et le soudan enbuche si com je le vos ays dit messire Robert de Crezeque et messire Olivier de Terme retornoient de lor chevauchee et en lor venir firent si grant poudriere que les Sarazins se apersurent et chevaucherent encontre yaus et saresterent entre nostre gent quy estoient sur le touron et siaus quy veneent et quant les uns furent si pres des autres si furent coneus. Messire Olivier dist a messire Robert que les Sarazins esotoient trop grant gent et que meillour si seroit deschiver la bataille car messire Olivier counusset bien quy se pooient bien metre dedens la ville dacre savement par les jardins devers la Porte de Maupas; mais messire Robert li respondy que il estoit venu de sa la mer pour morir pour Dieu en la Terre Sainte et que il yroit en toutes manieres en la batille; et toute fois .i. sien fis que messire Robert avoit o luy por ce que il estoit enfant manda il aveuc messire Olivier et sen party messire Olivier et entor de .vii. ou de .viii. et tint son chemin par les jardins et se mist dedens Acre. Entretant se furent aproches les uns as autres quy nen avoit que de ferir as Sarazins quy estoient entour de .iiim. A tout se non ozerent premier envers nostre gent enbatre quy nestoient pas .iic. et messire Robert ne targa mie ains fery luy et sa compaignie par les Sarazins quy lor ovrirent vee et les passerent outre et tindrent le chemin ver a Acre et si com il repairoient et Sarazins les covrerent derieres et saillirent .i. chevalier frances messire Bauduin de Saint Jorge frere fu de s. Henry de Guines et li tuerent son chevau si que messire Robert adons se fery dedens les Sarazins pluissors et se defendirent si longuement que Sarazins ne les poient abatre ains crierent les uns Sarazins as autres que lon deust ferir les greniers de lorge ce est a entendre de ferir as chevaus; et seste parole distrent covertement que Frans aucuns ne lentendissent et si tost con les Sarazins entendirent a ferir et a tuer les chevaus si fu la bataille plus tost delivre car si tost come .i. des nos estoit a pie si estoit mort et en la fin furent les desconfis et mors les nostre quy furent plus de .iiiic. persones a conter o les escuers de quey ot pris vif aucuns et de ses que lon prist vif quy furent bien poy si furent les .ii. nevos de messire Olivier de Treme que puis furent mors en prison de Babiloine et .i. autre chevalier catelan qui ot nom Cordate. Et cestu puis quil fu pris fu mis en une maison a .i. cazau de sout Safet quy avoit une fenestre o milieuc de la tarase que avoit .i. baston de buche travers la fenestre et le fest de la maison nestoit mie si haut mais bais come maison de vilain; et sestuy Cordate estoit chevalier mout ligier et bien aidant et li valut car ligierement sailly en haut a la fenestre et se prist au baston de la tarasse quy estoit de terre et defendy de la tarasse et se mist en chemin vers Acre par champ et travers hors dou droit chemin par seignau daucune estele et fu a laube dou jour a Acre et fu devant le patriarche et les autres siegnors que il conta tout son errement con vos aves oy et dist tant que celle gens dacre quy estoient sur le toron sil eusent feru que la terre fust este perdue car le soudan son cors estoit la a .xvm. homes a chevaus escheris chascun sur sa beste aparailles et atendant que ciaus dacre ferissent sur les Sarazins dou plain et le soudan son enbuchement seroit tant tost sailly et feru vers la ville.

352. Les gens dacre yssirent et manderent querre les cors des mors crestiens quy estoient sans teste car les Sarazins lor aveent leve les testes a tous yaus quy estoient mors a la bataille que a paine poeit on conoistre son parent par aucun signiau que il y eust en sa char.

353. Encores apres poy de jours revint le soudan de Safet a Acre et fist abatre les molins et les tors des jardins et tayllier les arbres et les vignes quy estoient hors dacre et fist mout de maus mais tout en some vous viaus dire de ses afaires que fist en Surie que il prist a son tens jusques a ce jour et le Crac de lospitau et Giblecar et prist encore autre leuc apres se que ja vos ays dit; mais je vyaus laisser a parler de luy ores por dire vos aucunes autres choses quy avindrent en seste dite annee.

354. Il avint que les Jeneves quy aveent grant entendement de yaus vengier de lor henemis pisans et venesiens si ce vostrent assaier encores deaus venger de lor henemis et armerent en Gene .xxviii. guallees et fu lor amiraill Luquet de Grimaut et si ot o luy en sa compaignie .ii. sages homes et artyllous de mer messire Pasquet Mallon et Papon Mallon et vindrent a Acre subitement a .xvi. jours daoust de ce dit an de .m. et .cc. et .lxvii. de Crist en le port dacre et ardyrent .ii. naves de Pizans dedens le port et mirent lor enseigne desus la Tour des mohches et demourerent au port .xii. jors; et dedens ce le dit Luquet de Grimaut se party et amena o luy .xv. guallies qui aveent bezoign dadouber et ala a Sur et si laissa au port dacre .xiii. gualees et en son leuc se mist Pasquet Malloun quy ot o luy Papon Mallon et estant la a Sur lamirail de les Venesiens vindrent a .xviii. guallees a Acre quy furent armes a Veneize et surprirent ses .xiii. guallees des Jeneves. Mais quant les Jeneves virent les Venesiens si se partyrent et lor alerent encontre et se firent il por aver plus large mer a eschaper car sil les eussent troves au port toutes les eussent prises mais a la manyere que il firent ne perdirent mie tant car il se mirent par my les Venesiens et paserent outre si que les Venesiens en retindrent .v. a toute la gent quy furent mors et apres les autres .viii. guallees alerent a Sur et furent o les autres guallees quy sadoubeent dedens le port de Sur sauve .iii. guallees quy aleent vers Sayete pour parler au maistre dou Temple et lamirail Luquet de Grimaut dedens a quy lon manda la novele et tantost il torna en deriere car il nestoit mie ale trop loins et fu durement couresie. Et tant tost cele nuit meismes sen partirent de Sur et repairerent en Jenne mais les Venesiens a lor .xxviii. guallees vindrent devant Sur et cuyderent trover les guallees des Jeneves et quant il ne les troverent si se repairerent dacre en Veneyse et firent triues entre Jene et Veneise a .iii. ans et chascun .iii. ans renovelleent la triue por se que les Jeneves voleent corte triue car lor entendement estoit de yaus vengier si com il firent et lores en ce livre.

355. Il avint en se dit an que Huguet hair dou royaume de Chipre et fu fis dou roy Henry gras et de la raine Plaissanse si trespassa de se siecle au mois de novenbre et fu fait roy apres luy Hugue de Lezigniau le jour dou Nouel par le patriarche Guillaume qui estoit ale pour viziter les yglises de Chipre; et sestu Hugue fu cousin jermain de sestuy Huguet qui morut car le dit Huguet fu fis dou frere que fu roy Henry gras et Hugue de Lesigniau fu fis de la suer et .i. autre Hugue avoit quy fu fis de une autre seur et dou conte Gautier de Breine que morut en prysson des Sarazins con je vos ay dit avant dont sestu Hugue conte de Brene chalonga le royaume de Chipre mais il nesploita nient et se party dou pais et ala outremer et remest le roy Hugue de Lezigniau roy saissi et tenant par esgart de court.

356. En ce dit an se crusserent pour passer en Surie le roy Lois de France et ses enfans et le roy Charle et le roy de Navare et messire Odoart fis dou roy dengleterre et son frere et plusors autres barons dalemaigne et dengleterre et despaigne que depuis alerent a Tunes con vos entenderes si avant.

357. En lan de .mcclxviii. de Crist morut pape Climens et fu fait pape Gregoire Plaisenty qui estoit arcediaque dou Liegerat le quel estoit au jour quy fu ehlit en la site dacre et fu mene a Rome.

358. En celuy meismes an avint que Corradin qui fu fis dou roy Courrat et de la fille dou duc dosteriche dalemaigne entendy coment le roy Charle avoit desconfit et mort le roy Manfre son oncle; si fist un grant host de gens a chevau et a pie pour aler encontre le roy Charle et tout ce fist il par latissement des Pizans et le conte Girart de Pize ala il meismes o luy en Alemaigne et vint o ly en la bataille et si vint ausy .i. grant home de Jene frere de Aubert Espine quy fu capitaine de Jenne .i. tens et se party le dit Couradin dalemaigne et vint encontre le roy Charle et mena o luy son oncle le duc dosteriche et autres barons dalemaigne.

359. Le roy Charle asembla sa gent et ly ala a lencontre et quant il se furent entrevees si ordenerent lor batailles et lor eschelles si come il deveent dont la gent de Corradin ferirent primier et chargerent si fort la gent dou roy Charle que il les bouterent dedens lor paveillons et tant con la gent dou roy Charle se defendoyent dedens lor paveillons le roy Charle si fu sur .i. tertre haut et avoit une grant eschele des chevaliers des meillours quil avoit et si fu o luy .i. chevalier de France quy fu nome messire Alart de Valerie chevalier prou et hardy et de grant renomee et savoit mout de guerre et a sele oure que le roy Charle vi sa gent si rebutes entre les tentes si fu mout esmaies et demanda a messire Alart de Valery sil y avoit aucun chastiau ou il se peussent reseter se bezoigne fust; et messire Alart li respondy que il y avoit Paris ni autre il ne savoit et que il pensast dautre chose faire; et adons vint a luy .i. valet quy ly dist: Sire penses de secoure vostre gent quy sont trop maumenes. Et le roy Charle li respondy: Laisses faire car les bons et les fors et hardis nos remaindront car la paille vait au vent et le forment demoure. Sur ces paroles messire Alart de Valerie vy nissir des herberges de la gent de Couradin charges de robe quil enporteent et dist au roy Charle: Alons sire secoure nos gens et vaincrons nos henemis.

360. Le roy Charle defendy au plein fres et reposes et chevaliers des meillours quil avoit et senbati sur la gent de Couradin et les troverent las et travailles et autres estoient charges des robes et harnes que il aveent guaigne de la herberge et esparpoullies les uns des autres: si les foulerent primier de cos de lances et apres de bordons si que la bataille fu mout mortal et y morurent mout de gens. Et en la fin Corradin et son oncle duc dosteriche et le conte Girard de Pise et .i. home de Jene de grant lingnage quy avoit nom Thomas Espine quy estoit capitaine de Jene ses .iiii. foirent de la bataille et alerent pres de la mer et se mirent en une grote. La il furent .ii. jours sans manger et sur ce vint la une barque pour pehcher et sestu Thomas Espine nissi et parla a yaus coment seaus vosissent lever luy et autres .iii. chevaliers eschapes de la bataille et mener les assavement et les paiereent mout bien; soyrent parler de tel rayson si lor otroerent et lor vendirent pain de quey il mangerent et entre tant .i. de siaus de la barque ala a Naple et le fist asaver a court quy manderent gens quy les prirent et les menerent a Naples et quant il furent la le roy Charle les fist juger et par juges furent juges et taillier lor testes.

361. Corradin si ot taille sa teste premier et puis le duc dosteriche son oncle et distrent que il ne se vost confecer ains se despera disant tous les maus quil poiet de desperasions; et apres fu taillee la teste dou conte Girart de Pise et sire Thoumas Espine si ot creve les ziaus et taille le nes et les .ii. mains et le laisserent aler.

362. Cestu Couradin que je dis si fu fis dou roy Courat son pere de cestu Couradin si fu fis de lempereor Federic et de la raine de Jerusalem de quy je vos ais devise et parle coment lempereor lespoza; et a cestuy veneit le royaume de Jerusalem de par la mere de son pere et puis quy fu mort si com vos aves oy et nen aveit nul heir le royaume de Jerusalem retourna au ligniage de la mere de son pere.

363. La novelle de sa mort vint a Acre et coment le roy Charle avoit guaigne la bataille si que la gent dacre firent grant feste et grant luminaire quy dura aucuns jours et fu feste de la mort de celuy quy devoit estre lor seignor mais la feste ne fu faite par mavaiste nulle mais pour apaisser sainte yglise pour le roy Charle quy estoit defendeor de sainte yglize et sanatour et lautre raison fu que Dieu le vost ensi consentir pour desheriter les heirs de lempereor et ses fis le roy Courat et Manfre quy furent parsecutour de sainte yglize tous tens de lor vie et morurent escomenies; et je vos ves ores laiser de seste raison et vos dirais de la terre de Surie se qui avint en se dit an.

364. Cestu soudan que je vos ais autre fois parle quy se disoit Melec el Vaher mais son nom plusors fes si estoit dit Bendocdar se yssi de Babiloine et junst a Jafe a terre des crestiens et la prist a .viii. jours de mars par traison et dedens triue et osist mout de menues gens et les autres laisa aler en Acre ou toutes lor choses et lor douna condut et prist la terre de Saint Jorge et lenporta et fist ardre le cors de sainte Crestiene que levesque Johan de Troies avoit laisse a Jaffe.

365. De la se party le soudan et ala a Biaufort quy estoit dou Temple et le prist par force a .xv. jours davril et apres ala en Antioche et lasega et la prist sans nule defence a .xix. jours de may et furent osis dedens la site puis que ele fu prise .xviim. persones et plus et furent pris homes et femes et enfans que de religion que dautres plus de .cm. persones et le Temple abandonerent .ii. chastiaus quy sont la de pres Guaston et Roche de Roissel et la terre de Porbonel a lentree dermenie.

366. Et dedens le dit soudan pourchassa la delivranse dun haut home sarazin qui avoit nom Zencor el Escar que Tatars teneent lequel fu delivre et vint en Babiloine pour change de Livon fis dou roy dermenie.

367. Et en ce dit an fu fait baill dou royaume de Jerusalem Balian de Yblin seignor darsur.

368. Et lan de .mcc. et .lxix. fu .i. grant crole en Ermenie quy fondy .v. chastiaus et .iii. abaies dermins et .xii. cazaus; et morut messire Jofrey de Sardeignes a .xi. jours davril quy fu seneschau dou reyaume de Jerusalem et cheveteine des gens dou roy de France. Or veus mostrer .i. autre rayson quy avint en se dit an.

369. Il avint que le roy Hugue de Chipre quy fu fis de Henry dou prince et se faisoit dire Huguet de Lezingniau de par sa mere par quey le royaume li vint de Chipre quant il vy que Couradin fu mort le quel fu luy et le dit roy Hugue enfans de couzin et de couzine jermaine car Corrat quy fu fis de lempereor Federic et fu pere de Couradin et la mere dou roy de Chipre Hugue de Lezegniau et le roy Courat furent jermains de .ii. seurs de la ou le royaume de Jerusalem meut et por ce le dit roy Hugue se fist courouner dou royaume de Jerusalem et fu couroune a Sur. Or avint chose que le roy Hugue de quey je vos parle si avoit une siene ante seur de son pere et de par mere et si estoit la dame apelee damoiselle Marie pour ce que elle nen ot onques baron et avoit a se jour plus de .xl. ans daage. Ceste damoisele Marie chalonga au roy Hugue le royaume de Jerusalem et disoit que elle estoit plus prochaine dun degre a aver le royaume que le roy Hugue de Chipre nen estoit et avint que Phelippe de Monfort et Temple et Ospitau et autres gens de religion si se mistrent a adresser les et ne porent et que ceste damoisele saprocha a la maison dou Temple et ala outremer requerre son droit devant le pape; et quant avint que le jour que le roy se courona dou royaume de Jerusalem vint dedens liglize .i. clerc et un notaire o luy et cria a haute vois en la prezence de la gent quil contrediessoient le couronement dou roy si com il fu comande de contredire et sen fouy tant tost par la prezence de la gent que lon ne sot que il devint et de demoisele Marie ne vos diray plus orendroit que autre fes car je viaus si dire dautre chose.

370. Phelipe de Monfort quy tenoit Sur de don dou roy Henry de Chipre lequel don nestoit mie ferme pour ce que Couradin vivoit si douta que le roy Hugue ne li vosist requere Sur et por ce il porchassa et fist tant que le roy Hugue dona sa suer a Jehan de Monfort fis dou dit Phelipe de Monfort et le roy Hugue conferma le don de la site de Sur a cestu Johan de Monfort en telle maniere que ce la dite feme eust enfant que la site de Sur lor demourast a iaus et a lor heirs et sil mesavenist de Johan de Monfort et la dame nen eust enfant nul que la cite de Seur deust retorner au roy Hugue ou a ses heirs donant le roy Hugue ou ses heirs as hairs dou dit Johan de Monfort .clm. bezans sarazinas pour les grans despenses que messire Phelippe de Monfort aveit fait en esforcier la ville et amender la; et ensi fu le mariage conferme et ala Johan de Monfort en Chipre et conferma et espouza la dite seur dou roy et fu fait mout gran feste com il se deveit faire pour si haut noses et la mena Johan de Monfort a Sur et le roy laconpaigna jusques a Famagouste et ly fist armer .iii. gualees quy la condurent aveuc une guallee de Sur quy sapeloit panfle et armerent a Sur la ou fu faite grant feste.

371. Ceste dame quant elle fu mariee si estoit grant damoisele de .xxiiii. ans et fu la plus belle dame ni damoisele quy fust de sa mer a son tens et especiaument de visage et si le peus bien dire serteinement car je la vis mout sovent con sil quy fus .i. des .iiii. vallees quy la servimes le premier an; et si fu mout bone dame et mout sage et mout amohniere et saimerent mout elle et mon seignor son espous. Et de puis elle engrassa trop hors de raison et sembla a son pere quy fu mout gras et monseignor de Sur si fu si travaille de goute a pies et a mains quil en fu tout desfait car il fu mout biau chevalier et mout plaissant et prodome et sage et bien aidant chevalier; et si avoit .i. frere quy ot nom Anfre de Monfort biau chevalier et grant quy nen avoit per a luy et a son tens le quel avoit por espoze la fille quy fu de Johan de Yblin seignor de Barut quy avoit une seur aheinee delle quy fu medame de Barut. Mais je laira ores deaus a parler et vos diray dautre raysson quy avint a lincarnasion de ce dit an por sivre a dreit ma matiere.

372. Vous saves coment je vos ay retrait que le roy de France et le roy de Navaire et les anfans dou roy de France et le roy Charle et messire Odoart fis dou roy dengleterre et son frere et autres contes et barons dengleterre et dalemaigne et despaigne sestoient cruses pour passer en la terre sainte de Surie: il sasemblerent tous et fu lor conseil daler prendre Tunes quy est une grant site des Sarazins et asemblerent mout de navillie et alerent a Tunes si com il eurent ordene et prirent terre sans nul contredit et se troverent de toutes gens a chevau entor de .xixm. et de gens a pie eurent trop grant cantite et de gens de mer si ot grant naville et grant gent; et entre les autres si ot .xviim. Jeneves o tout lor naville car lor entendement estoit quy peussent recouvrer lor droir dacre.

373. Estant ensy lost devant Tunes les Sarazins lor firent mout denuy et de contraires que il chevauchoient les Sarazins quant il faizoit grant vent et la poudriere venoit si fort sur nos gens que lun ne veet lautre et avoient fait une foce entre nostre gent et aus que lon poiet aler a yaus et se nos gens a pie lor lanceent javelos daubalestres de quey lon osioit pareills saches il estoient si grant gent que lon ne les poroit par tel chose consumer; et pour ce que Dieu quy conut et quy seit tout et que nostre gent aveent destorne le sien servize de sa Terre Sainte et estoient ales ou nestoit mie si grant bezoin si ne le vost guaires conseillier par coy une grant enfermete vint en lost de tel maniere quil morut mout de gens et entre les autres morut le bon roy de France Lois et le roy de Navare et Johan Tristan fis dou roy de France sus dit et plussors barons et autres chevaliers que je ne peus trestous nomer et autres quy remestrent en vye conurent bien que lor bezoine estoit toute desfaite. Et estant ensy les crestiens con je vos dis si com il plost a Dieu le soudan de Tunes manda traiter au roy Charle aucun acort et pour ce que autre ne se poeit faire si sacorderent a luy pour une cantite daver que il promist a doner tous les ans au roy Charle et de ce lor fist tel seurte com il sacorderent et dona en .i. cop de moneee qui fu de ce que lost avoit couste et se partirent et repaira chascun en sa terre; et si apres vous viaus retraire aucune autre aventure quy avint en Surie.

374. En lan de .mcc. et .lxx. de Crist Bendocdar soudan de Babiloine que volentiers pourchasoit et faisoit maus as cretiens si savet bien que messire Phelippe de Monfort seignor de Sur esteit mout sage seignor et que riens ne se faisoit entre les crestiens de Surie que par son sens et saveit meismes coment il mandeit letres et mesages as rois et seignors doutremer por faire les meuvre a venir de sa dont le dit soudan si le vost ocirre et pour ce il prist des Sarazins que lon apele Hassisses et les vesty en abit domes darmes et les manda a Sur et lor comanda de tuer le dit seignor de Sur et le seignor de Sayete celuy quy la vendy au Temple et quy estoit nevou dou seignor de Sur car sestu seignor de Sayete ja soit ce que il esteet home de volente et avoit maufait ses afaires toute fois en conseill de fait darmes il estoit bien asage et bien conussent et prou et hardy et grant et fort et por ce vost aussi le soudan quy fust mort. Ses .ii. Hassisses vindrent a Sur a chevau saint darmes turquezes et de sainture dargent a la maniere de gens darmes sarazins et vindrent droit au seignor de Sur et li requistrent batehme. Le seignor de Sur que de se ne se gardoit si les fist batier et a lun mist son nom et lapela Phelippe et a lautre le seignor de Sayete le fist batier et fu son parain et li mist son nom Julien; et le seignor de Sur retint tous les .ii. en son servize come tricoples et ce fia le seignor de Sur mout a yaus et toute fois fu dit au seignor de Sur que il se deust garder car le soudan pourchassoit sa mort et ly avoit mande Hassisses pour tuer dont le seignor de Sur si respondy que il nen estoit plus seignor de Sur et que son fis en estoit seignor si que le soudan nen avendroit ryen de luy ocirre et toute fois faissoit il a son visconte sercher et conoistre les estranges gens quy veneent a Sur mais il ne se garda mie de ces .ii. dis que il tenoit en son hostel. Or avint .i. jour que ses .ii. Hassisses aveent pris une grant acointance a un Surien dou levant quy servet le seignor de Sur Faraiss cest asaver de escouer et neteer et arozer daigue le palais et la court et asurer tentes quant il est bezoing; et cestuy Farass ala un jour a manger aveuc ses .ii. Hassissins et quant il fu en lor ostel et lon diaus fu ale acheter pain et la plase et fu lautre ale a la couzine cestuy Farais tira .i. pillet de lor tarquais et avet au tarquais .i. coutyau oint de venim enveloupe dun drap; et par ce counut il que il estoient Hassissins. Et quant il furent ensemble en la table et mangerent cestuy Faraiss lor voloit descovrir tout lafaire coment il avoit trove le dit coustiau; et quant siaus virent quy furent decovers si le gehirent lor fait et li distrent que il devoient tuer de par le soudan le seignor de Sur et le seignor de Sayete et li promirent a doner .c. bezans veills dedens dimenche. Et seste chose fu le jeusdy et quant vint apres ses .ii. Hassissins se penserent que sil ne douneent les .c. bezans au dit Faraiss le dimenche que il les descovreret et por ce penserent de heter lor fait se dimenche venant; et en mileuc le seignor de Sayete estoit ale sejourner a Barut dont lun des .ii. Hassissins celuy quy fu filleul dou seignor de Sayete sen ala a Baruth por tuer le seignor de Sayete et lautre remest a Sur; et ordonerent que se dimenche venant lun feret son servize a Sur et lautre a Barut tout en .i. jour. Cestuy dehleau Faraiss si tint lafaire secrete atendant a aver les .c. bezans que yaus ly aveent promis et ne le fist a saver ny a seignor ni a baill come desleau; et quant vint le jour dou dimenche le Hassisi vint bien matin a court et ala ver la chapele dou seignor et trova messire Phelippe de Monfort a lavant de sa chapele quy estoit en pie et parloit ave .i. sien borgois et se Haissisi vint ver luy et le salua dont le seignor li dist quil estoit bon crestien et faizoit bien de venir a la messe et li douna deniers por ofrir car une autre messe estoit comensee au seignor jeune son fis messire Johan de Monfort et a sele oure estoit lofrande; et le Hassisi prist le denier et ala ofrir et adons il vy que il nen avoit en la chapele que le jeune seignor et .i. chevalier soulement quy se nomoit Guillaume de Pinquegny: si li sembla quy poeit son mau faire et au nissir que il fist il sacosta de grant seignor messire Phelippe de Monfort et le fery dou coutiau par la tetine et por ce que a cele oure le dit seignor maniet .i. aniau sien dedens son deit et lautre main si ly persa au ferir la main quy tenoit son pis et ly laissa le coutiau et mist main a sa espee et entra a la chapelle pour tuer lautre seignor mais quant il fery le grant seignor le cop sona si fort que le jeune seignor quy estoit en la chapele lissant son livre torna sa chere saver que ce esteit et adons vy venir le Hassisi lespee en la main nue si que il se bouta dedens lautier quy avoit une table enpainte de sains par devant et estoit entre dedens et au bouter que le seignor jeune fist dedens lautier le Hassisi lansa lespee pour luy ferir sur la table de lautier et se tint si fort quy ne la post aracher; et sire Guillaume de Pinquegni vint et enbrasa derier le Hassisi si fort can quil post et dist au seignor que il ysist hors et le seignor yssi et le prist par les cheviaus de lune main et de lautre main li vost oster lespee et se trencha .ii. deis de sa main; et en se mileuc le grant seignor de Monfort issi de lavant de sa chapele et ala bellement sur ses pies et sasist sur .i. banc de piere devant lentree de sa chambre et seluy qui parleit a luy si se leva et jeta le cry a sergens que tantost monterent lamont et alerent vers le grant seignor quy lor dist: Ales ayder mon fis a la chapele que le Sarazin le tue. Et tous coururent a la chapele et tant tost tuerent le Hassisi et delivrerent le jeune seignor de Sur quy vint vers son pere et le pere ovry les ziaus et le vy sain et sauf si leva les .ii. mains ver le siel mersiant Dieu sans parler plus et larme li party et fu mort; et le Hassisi fu mort come il fu. Si fu traine et pendu et tantost fu mande a Baruth une barque par mer et par terre .i. tricople faire asaver au seignor de Sayete quy se gardast dou Hassisi et prendre le mais si tost com le Hassisi oy parole de ce si monta sur sa beste et se foy as Sarazins et fu sauf car il nen aveent guene a aler des crestiens as Sarazins; et le dehleau dou Farais quant il vy le fait si avenir si se destorna la ou nule arme ne savoit rien de son fait et por ce fu aparseu quant il fu demande si que il fu quis et apres et fu mis en gehine et confesa ce quil en saveit don la lengue li fu traite desous le monton et la main destre taillee et trayne et pendu. Le seignor de Sur fu entere a la mere yglise de Sur quy a nom Saint Crus don la crestiente en resut grant damage. Or lairons a parler de luy que Dieu en ait lame et vous diray une autre rayson.

375. Et en sestu meymes an damoisele Marie ante dou roy Hugue de Lezigniau quant elle vit que son nevou le roy Hugue ce fu fait roy et encouroune dou royaume de Jerusalem si con je vos ay dit et quele fist metre debat par clerc et .i. notaire si con je le vos ay devise si avant elle se parti dacre et ala a la court de Rome et se plainst au pape dou dit roy Hugue. Et fu pape Gregoire dont le pape et sa court entendyrent sa raizon mais en ce mileuc que sa requeste duroit la dite damoisele Marie sacosta au roy Charle et trayta et pourchassa o luy que elle ly fist don de son droit et de sa raizon et le roy Charle adons ly fu en aye quant que il post et quant la question fu condute a se quele dut et que sentence se dut doner elle se douna par le pape et par sa court coment la dite damoyssele Marie estoit plus droit heir dou royaume de Jerusalem et que le roy Hugue nestoit et fu conferme par le pape et par sa court le don que la dite damoisele Marie avoit fait au roy Charle de son droit que le requeroit dou royaume de Jerusalem et le roy Charle douna a la dite damoisele une cantite de monoie chascun ana a sece sur sa terre en Franse mais apres .i. tens il asena en sa terre en Poille.

376. En lan de .m. et .cc. et .lxxi. de lincarnasion de Crist a .xviii. jours du mois de fevrier Bendocdar soudan de Babiloine asega le chasteau dou Crac quy fu de lospitau de Saint Johan de Jerusalem et le prist a fiance a .viii. jors davril sauve lor vies. Et en sel an meymes a .ix. jours de may ariva a Acre monseignor Odoart fis dou roy dengleterre que en son veage ot mout de tempeste de mer que .i. sifon fery en sa nave que poy ne la nea; et amena sa feme o luy et vint le conte de Bretaine et au mes de setembre vint a Acre messire Arniot frere de messire Odoart. Et en se dit an asega Bendocdar soudan de Babiloine Gebelacar quy estoit dou prince dantioche et le prist a fiance.

377. En ce dit an vos diray une autre aventure que le soudan fist armer .xi. guallees de Sarazins et les manda pour damage faire en Chipre et quant il vindrent as aigues de Limesson elles estraquerent et brizerent toutes par faute de pedot par la volente de Dieu et non par autre rayson car il estoit grant bounase et de vent et de mer et furent tous pris esclas et .ii. guallees eschaperent et alerent en Alixandre et sensi ne fust avenu il eussent destrut Limeson et autres leus de Chipre.

378. En cel an asega le soudan Monfort des Alemans .i. chastyau bien pres dacre et le prist a .xii. jours dou mois de jun a fiance sauve lor vies et a .xvi. jours de gunet mena les gens devant Acre et les laissa aler; et seluy jour la gent dacre si furent tous as armes pour defendre la terre et adons messire Odoart vy lost dou soudan et son grant poier et conut bien que il nen avoit pas gens de combatre au soudan et por ce nen oza nul des crestiens yssir a luy et lendemain se parti le soudan et ala en Babiloine.

379. Et de puis messire Odoart fist une chevauchee et ala briser une riche cauzau quy a nom Saint Jorge qui est pres dacre a .iii. liues et furent o luy Temple et Ospitau et lautre gent dacre et ce fu a lissue de gunet quy faiset mout grant chaut et brizerent le dit cazau et tuerent mout de Sarazins et firent grant guain mais de nostre gent y morut aces par chaison dou miel dabeille et dautre choses quy mangerent si con gens a pie sont uses de faire si que il moreent par le chemin et pour le chaut et pour le travaill et pour les viandes chaudes quil aveent mange.

380. Le roy Hugue de Jerusalem et de Chipre pasa de Chipre a Acre et fist grant henor a messire Odoart et orent grant amor ensemble et ausi meymes i vint Baymont prince dantioche et conte de Triple quy estoit couzin germain dou roy Hugue de Lezigniau nes de .ii. freres mais le prince demoura poy a Acre et se party et ala a Triple en son pais.

381. A .xxiiii. jours dou mois de novembre dou dit an monseignor Odoart et le roy Hugue et la chevalerie de Chipre et dacre et le Temple et Ospitau alerent brizer .i. cazau quy a non Cacon qui est en la terre de Sezaire loins dacre .xii. liues et plus et firent grant damage a Sarazins et gaignerent .ii. herberges de Turquemans et tuerent Sarazins ases et prirent bestiail gros et menu .xiim. et asegerent aucuns Sarazins dedens une tour quy est a Caco mout fort environee de foces plains daigue et bien leussent prise mais nos gens douterent de trop demorer pour le cry quy estoit par la terre et la Sarazins estoient ja asembles de toutes pars dont nostre gent se partirent et vindrent a Acre a tout lor guain sain et sauf.

382. Or vos diray se quy avint a monseignor Odoart: il avint que .i. Sarazin home darme se vint batier a Acre et messire Odoart le fist faire crestien et le tint de son hostel. Cestu si fist atendant a messire Odoart que il yroit espier les Sarazins la ou lon lor poroit maufaire et avoit ja fait ce servize aucune fes; et par luy alerent nos gens a Saint Jorge et a Caco dont messire Odoart se fia tant en luy que il comanda que il ne fust defendu de parler a ly ni de jour ni de nut. Si que il avint une nut que il vint a la chambre ou monseignor Odoart ce dormoit o la raine et mena o luy le durgeman et fist entendant que il venoit despier et voloit parler a monseignor Odoart si que monseignor ly ovry sa chambre il meismes vestu soulement en chemise et braie et le Sarazin sacosta a luy et le fery dun coutiau sur la hanche quy ly fist une parfonde plaie et perelyouse et messire Odoart se senty feru et le fery .i. cop dou poin par mi le temple quy labaty estordi a terre une piesse et puis prist .i. coutiau de table quy estoit en la chambre et le fery en la teste et locist. Le cri se leva entre la mahnee et virent lor seignor feru et jeterent le cry par la ville dacre dont les seignors sasemblerent la et firent venir tous les mieges et esclas quy li suserent sa plaie et en traistrent le venim dont il fu bien guary la mercy Dieu et se party a .xxii. jors de setembre et ala outremer en sa terre.

383. Et quant vint lan de lincarnasion de Crist .mcc. et .lxxiii. frere Thomas Berart maistre dou Temple si morut et fu fait maistre frere Guillaume de Biaujeu quy fu mout gentil home parent dou roy de France et si fu mout large et lyberal en mout de raysons et mout amonier dont il fu mout renome et fu le Temple a son tens mout henore et redoute et quant il fu fait maistre il estoit en Poille comandour et demoura outremer .ii. ans visita toutes les maysons dou Temple au royaume de France et dengleterre et despaigne et amasa grant trezor et vint a Acre.

384. En lan de .mcc. et .lxxiiii. au mois de may si fu le conseil dou pape a Lion sur le Rosne et furent adons desposes les Freres du Sac et les Freres Apostles et autres religions.

385. Et en lan de .m. et .cc. et .lxxv. de Crist le prince Beymont que lon disoit le Biau Prince morut et fu fait prince son fis quy fu ausi nome Baymont et ce fu cestuy le fin de tous les princes dantioche et contes de Triple mais il avoit une seur quy estoit en Poille mariee a messire Narguo de Tousi amiraill de Poille et sy avoit sa mere quy estoit seur dou roy dermenie. Cestu dit Beymont pour ce que il estoit mout jeune sa mere fist venir a Triple .i. parlat quy estoit vesque de Tourtouze et vicaire dou patriarche dantioche qui avoit nom Bertheleme et fu nes dantioche mout grant clerc. A sestu dona la princesse mere dou prince tout son poier et le fist governeor de Triple si que les chevaliers eurent a grant desdain destre governes par clerc et toute fois le soufryrent et ne firent semblant. Et quant ores je ne vos diray plus de lor fait ains vous diray dautre rayson.

386. Et en lan de .mcc. et .lxxvi. a .xxvi. jours dou mois de mars Bendocdar soudan de Babiloine nissy o tout son host de Babiloine et ala en Ermenie et la corut et destrust et mist a lespee et tous siaus quil atainst.

387. Et en se dit an messire Guillaume de Rozelon vint a Acre au mois de huytovre et amena gens a chevau et a pie de par le roy de France et fu lor cheveteine.

388. Et en ce dit an morut pape Gregoire et fu fait pape Innocens quint et en se dit an a .xxviii. jors de gun fu nee devant Sur messire Henry dou prince qui fu pere dou roy Hugue roy de Jerusalem et de Chipre si come il venoit en une nave des Alemans et aloit a Triple et la nave fery en une roche et briza et le dit messire Henry fu trait de la mer et porte dedens Sur a sa fille quy estoit dame de Sur feme de Johan de Monfort seignor de Sur et dou Toron qui le firent enterrer a lospitau de Saint Johan.

389. Et en ce dit an meismes morut pape Innocens quint et fu fait pape Andrian qui morut lan meymes; mais je vous veul devizer une grant riote quy avint en Surie en se dit an meismes.

390. Vous aves oy coument la princesse mere dou prinse lenfant fist venir le vesque de Tourtouse et le fist gouverneor de Triple. Or aveit en son tens un seignor de Giblet quy avoit nom Guy et estoit fis de la seur dou seignor de Baruth Johan de Yblin le jeune que mort estoit; si se faizoit apeler le seignor de Giblet Guy de Yblin mais il fu estrait de la site de Jenne dou ligniage quy se dit Enbriac et de Guillaume lenbriac quy fu sire de Giblet et de la seur dou prinse fu son comensement; et por ce que seluy prince et ceste soue seur fu estrait de siaus des baus quy ont lor armes a estele tous les seignors de Giblet et lor linnyage porterent lor armes a estele.

391. Cestu seignor de Giblet avoit grant amor et se novyau prinse son seignor et avoit pour espouze sa couzine jermaine dou prince quy estoit fille dou seignor de Seete que mors estoit Julien et fu ce seignor de Giblet mout bel home de grant maniere car il fu grant et bien menbru et blanc et blond et vair et couloury dune vive coulour et prou et hardy mais il fu un poy estout et de volente et avoit .ii. freres: .i. chevalier qui ot nom sire Johan quy fu ausi mout biau chevalier et lautre fu vallet qui ot nom Baudinet. Dont il avint que se seignor de Giblet prya le prince de otroer a son frere le mariage dune damoisele quy avoit .i. grant fie de par son pere messire Hugue Salamon et le ly otrea dont le vesque de Tortouse qui avoit .ii. siens nevous vost aver la dite damoysele pour .i. sien nevou et converty tant le prince quy li otroia; et quant le seignor de Giblet senty le fait si ala tant tost et ferma le mariage de la dite damoysele a son frere de quey le prince et le vesque furent mout couroses vers luy et se partirent de Triple le seignor de Giblet et son frere et alerent a Giblet; et le seignor de Giblet ala a Acre et se fist confrere dou Temple et eut grant amiste au maistre frere Guillaume de Biaujeu quy ly promist de luy aider de quant que il porra et tourna le seignor de Giblet a Giblet et se mist a user dou fie et des rentes que son frere avoit pris en mariage dont le prinse ne le vost soufrir et se mut ensi le contens entriaus ja soit se que il avoit autre achayson par ansienes haynes.

392. Il avint que le seignor de Giblet ala esforceement et prist par force de la terre de son frere se que il en post aver dont le prinse fu mout courouse et le fist semondre par court si que le seignor de Giblet ala a Acre et parla au maistre dou Temple qui li dona .xxx. freres quil mena o luy a Giblet et adons guerroia le prince en aparant et ly fist plusors damages en sa terre dont le prinse fist abatre la maisson dou Temple de Triple et le bois dou Temple quy a nom Moncucu; et quant le maistre dou Temple lentendy si arma guallees et autres vausiaus et ala a Giblet et mena o luy .i. grant covent de freres et vint de Giblet a Triple et lasega pluzors jours dont ne fu nul quy nisist contre luy ni a chevau ni a pie ains garderent les murs de la ville dont le maistre et sa gent partirent et retornerent a Giblet et en lor chemin fist le maistre abatre .i. grant maner quy estoit a Boutron que lon lapelet le Chastiau et alerent les Templiers aseger Nefin un chastiau dou prinse sur mer mout fort; et avint chose que .i. jour .xii. freres et .i. chevalier seculier qui ot nom Pol de la Teffaha senbatirent a cors de chevaus dedens Nefin par my la porte mais les sergans furent sur la porte en haut et valerent la porte close et furent ensi pris ja soit se que dedens le chastiau meismes il ne se vostrent rendre que a fiance sauve lor vies dont il furent pris et mis en prison et puis furent mandes a Triple; le prince les tint en sa prison dedens sa court.

393. Le maistre parti de Giblet et vint a Acre et laissa .xxx. freres au seignor de Giblet et lor chevetaine qui ot nom frere Mase Goulart et depuis que le maistre party le prince fist .i. host de gens a chevau et a pie et vint pour aseger Giblet; mans quant il fu entre le Boutron et le Pie dou conestable novelles ly vindrent que siaus de Giblet estoient nysus si que le prince ot conseill que son cors ne deust aler et de seluy leuc torna a Triple et manda sa gent encontre siaus de Giblet et siaus de Giblet estoyent yssus a .xxx. freres et chevaliers et vales et tricoples tant quil furent bien .c. a chevau sans les escuers et la gent a pie de Triple furent plus de .iic. a chevau et grant gent a pie et lor escuer et senbatirent les uns as autres et en la fin siaus de Triple furent desconfis malement et fu pris Raimont frere dou prince de bas et sire Mansel nevou dou vesque de Tourtouze qui ot .ii. cos despee en sa chere et si ot taille la teste de sire Rogier de la Colee chevalier et ot taille la teste sire Guillaume Trabuc fis dou mareschau de Triple et autres y ot mors et pris que je ne say nomer et fu mort messire Balian seignor de Sayete fis de sire Julien frere de la feme dou seignor de Giblet et cousin jermain dou prince et morut estaint si come il estoit a pie et se desarmet et loverture se trova close sur la chere de sa curace et fu trove la teste dedens la curasse et morut et le sanc li nissoit dou nes et apres seste bataille fu fait triue entre le prince et le seignor de Giblet a .i. an.

394. Lincarnasion de Nostre Seignor Jehsu Crist .m. et .cc. et .lxxvii. fu fait pape Johan; a .xii. jours dou mois de may dou dit an morut le dit pape et fu fait pape Nicole en novenbre le jour de la feste de Sainte Cateline.

395. En ce dit an avint que Bendocdar soudan de Babiloine ala a Tatars et se combaty a yaus et fu desconfit malement et perdy mout de sa gent et repaira en Babiloine.

396. Et en lan de Crist .mcclxxviii. au mois de gunet le roy Hugue de Jerusalem et de Chipre se parti dacre et abandouna la seignorie et ne vost que de luy i eust nul gouvernement et manda lettres au pape coment il ne poiet plus gouverner la terre por le Temple et lospitau et sen ala en Chipre et ce fist il par coverture pour ce quil avoit entendu que sante damoisele Marie quy li chanlongoit le royaume de Jerusalem a la court dou pape et que celle avoit fait don au roy Charle de sa raison et que le roy Charle mandoit le conte Rogier de Saint Sevrin a Acre de par luy pour saissir le royaume et le roy ne se vost trover a Acre.

397. Et de puis que le roy fu en Chipre il manda en son leuc baill messire Balian seignor darsur.

398. Et ce dit an au mois de setembre vint a Acre le conte de Saint Sevry conte de Marseille de par le roy Charle en .vi. guallees et porta letres dou pape et dou roy Charle et damoisele Marie coment damoisele Marie avoit guaigne le royaume de Jerusalem par la sentense de la court de Rome et avoit done son droit au roy Charle et que lon leust pour roy de Jerusalem et seignor; il furent leuues les letres oyant tout le peuple et se party dou chastiau Balian de Yblin seignor darsur et guerpy le baillage et le conte Rogier sasist o chastiau et se herberga dedens. Le dit conte fist grant semblant daler a Sur; mais le comun de Veneyse vost ausi aler pour lor rayson aver dont il furent en riote mais messire Johan de Monfort seignor de Sur et dou Toron pourchassa que le baill de Veneize Aubert Morisin vint au Cazal Inbert et sacorda a ly et rendy a Venesiens se quil aveent de dreit a Sur.

399. A .m. et .cc. et .lxxix. de lincarnasion de Crist le maistre dou Temple quant la triue failly de luy au prinse il fist armer .xiii. guallees et les manda a Giblet et plusors freres alerent dedens et furent a un fort cazau dou prince quy a nom Dome et se combatirent as chevaliers dou prince et les desconfirent et en ot aucuns mors; et alerent les guallees dou Temple devant Triple et avint que mautens se mist quy fist ferir a terre .m. gualees vers Nefin mais la gent dou Temple et de Giblet quy avoient asege Nefin guaretirent les homes des gualees.

400. Apres se le prince fist armer .xv. gualees et les manda a Sayete quy est site dou Temple et roberent et damagerent une yhle quy est la devant et prirent aucuns freres et lor mehnee et retornerent a Triple atout lor guaign.

401. En cel an vint a Sur le roy Hugue de Jerusalem et de Chipre et amena o luy grant gent a chevau et a pie cuydant recovrer Acre mais ne post riens faire pour ce que le maistre dou Temple li fu contraire et sen tourna en Chipre et fist abatre la mayson dou Temple a Limesson et aresta tous lor biens en Chipre.

402. Et en ce dit an le maistre de lospitau frere Hugue Revel morut et fu fait maistre frere Nicole le Lorgne quy ala a Triple et fist pais entre le prinse et le Temple a .xvi. jours de jugneit; mais je vos diray une belle aventure quy avint a la crestiente.

403. Et en se dit an an lysue deutoubre freres de lospitau dou Marguat firent une chevauchee sur Sarazins de hors et lor firent grant damage car il troverent la terre guarnie et firent grant guain de bestial et dautre et si come il retornerent a Marguat pacerent par Chastiaublanc si que .ii. herberges de Turquemans et plusors Turs de Babiloine sasemblerent et firent bien .vm. homes a chevau et plusours a pie et vindrent apres les Ospitalliers jusques a Mareclee et les hasterent mout; dont les Ospitalliers si tornerent a yaus quy ne furent que .iic. homes a chevau et desconfirent les Sarazins et tuerent grant cantite et firent grant guain et retornerent a Marguat et la Dieu mercy il ne perdirent que .i. soul frere sergant.

404. Il avint en se dit an meismes que Bendocdar soudan de Babiloine a mout grant host et ala contre Tatars jusques as Aigues Froydes et passa laigue en ceste maniere que il dist a ses amiraus qui maint si me soie et sen lansa lor veant a toute sa beste au flum et passa a noe de lautre part et les amiraus et tout les autres veant cesi se lanserent apres et passerent outre et si ot tant nees homes et bestes que les uns passent sur les mors et trova les pons tous laboures que Tatars aveent fais pour lor paser et nestoient pas mis mais le soudan les fist metre et paserent tout son host et chevaucha .ii. journees; et au tiers jor surprist une herberge des Tatars quy furent bien .xxm. et ne se preneent guarde; et lor corut dessus et en ocist la plus grant partie et guaigna toute selle herberge et se repaira et passa les pons et puis les fist desfaire et se vint a Domas et la le prist une maladie subitement dont il morut et dient quil fu enpoissone et fu fait son fis soudan apres luy; fu noume Melec el Sahit.

405. En la painime avoit .i. grant miraill qui se nomoit Lelsi; cestu si fu sage et desenuza mout le soudan quy morut Bendocdar et cestu ot une fille la quele il douna pour feme a cestu novyau soudan Melec el Sahit mais il avint que dedens poy de jours sestu novyau soudan Melec el Sahit morut en Babiloine et fu porte a Domas et entere pres dou moniment de son pere Bendocdar et cestu grant amiraill Lelsi se fist soudan et prist .i. garson frere de sestu Melec el Sahit et fis de Bendocdar quy avoit nom Haure et le manda en Costantinople en essil; sestu dit Melec el Sahit .i. sien oncle frere de sa mere locist quy avoit nom Beidera quil cuyda estre soudan.

406. Et en se dit an de lincarnasion de Crist avint une belle aventure a crestiens quy avint au chastiau de Marguat quy estoit de lospitau de Saint Johan de Jerusalem sest asaver que les Sarazins de seles contrees sasemblerent de toutes pars quy furent entor de .viim. homes a chevau et pluissors gens a pie et vindrent a penseement ausi com pour aseger le chastiau de Marguat et dounerent asaus au dit chastiau et gasterent la terre dentor et firent tous les maus que il porent faire. Dont il avint que les freres de lospitau quy estoient dedens le dit chastiau de Margat nisirent a yaus et frirent dedens lost des Sarazins et tant firent darmes que o laye de Dieu desconfirent les Sarazins et en tuerent ases et guaignerent mout de bestes chevalines et dautres harneis et autres choses; et saches que en sest host avoit mout de Turs gens davantage et bien adures darmes quy estoient venus des chastiaus et les autres estoient Turquemans et autres Sarazins et les Ospitaliers ne furent que .vic. a chevau et ne perdirent que .xii. sergans et .i. frere la mercy de Dieu.

407. En lan de .m. et .cc. et .lxxxi. de lincarnasion de Crist les Tatars nyssirent de lor terres et passerent les Aygues Froides a mout grant host et coururent la terre de Halape et de Haman et de La Chemele et la saresterent et firent grant damage as Sarazins et en tuerent ases et fu le roy dermenie aveuc yaus et aucuns chevaliers frans de Surie.

408. Quant le soudan Melec el Monsour entendy seste novelle si asembla tout se que il post aver de gens a chevau et a pie tant quil furent .lxxxm. homes a chevau et entor de .cm. perssones a pie et yssi de Babiloine et vint a La Chemele et trova les Tatars et se combaty a yaus a .xv. jours de setembre devant La Chemele. Le chevetaine des Tatars si ot nom Manguodamor et estoit frere dabohale grant seignor des Tatars dont il avint que Sarazins resurent mout grant damage et perdirent mout de gens et furent si reuzes et parpoulies que Mangodamour cuyda quil fusent desconfis sans retour et cuyda aver tout guaigue et si se retraist en derier; mais Sarazins si se ralierent et coururent sus as Tatars et les desconfirent dont Mangodamor fu si esperdu quy se mist a desconfiture et guerpi le champ et le roy dermenie si mist ausi a aler et a lentree qui fist en Ermenie Turquemans lasaillierent et li tuerent de sa gent tant que il nentra en Ermenie o luy que .xxx. homes a cheval.

409. Et en lan de Nostre Seignor Jehsu Christ .mcc. et .lxxxii. Guy de Yblin seignor de Giblet une gualee arma et .ii. saities et retint a sos sergenterie que tout le plus furent Jeneves; pour ce que il estoit de yaus si sen fioit plus et se party de Giblet a .xii. jours de jenvier de nut et mena o luy ses .ii. freres et .i. sien cousin Guillaume de Giblet Pourcelet et autres chevaliers et sergans a chevau .xxv. et gens a pie bien .iiiic. et vint a Triple et ariva entre la mayson dou Temple et les Freres Prechours et defendy entre luy et sa gent et les chevaus et puis fist esfondrer la guallee et la grant saitie et laissa la petite entiere et sen ala au Temple et demanda le coumandour frere Renddecuer et il ny estoit pas dont il fu mout mescorages et sen party et ala vers lostel dou prince et manda .i. chevalier Pol Teffaha querre le bezoign de la guallee et seluy Pol se mis au colonbet et .iiii. banieres et sen fuy a Barut. Le seignor de Giblet fu a lostel dou prince et vit que le bezoing de la gualee et seluy Pol qui se mist au coulombet ne venoit et que la gent lavoient sentu et estoient ysus armes et venoit au cry et de siaus de samiste ne vy nul venir si fu de tout mescourage et se party et ala dedens lospitau de Saint Johan qui est juignant dou mur de la ville et avoit une porte par laquele il sen poieit yssir mais il fu si esperdu qui se mist dedens la tour et sa gent o luy.

410. Le prince quy se dormoit sesvilla et sarma et vint a lospitau et sa gent et asega la tour le seignor de Giblet et ses chevaliers dont le comandour de lospitau fu mancier et si fist .i. acort entre yaus que le seignor de Giblet seroit .v. ans en prison dou prince et ses .ii. freres et toute sa gent et apres les .v. ans le devoit delivrer et rendre ly sa terre; et ly jura le prince sur la sainte evangile de Dieu: mais le prince puis que il les ot en son poier si fist crever les ziaus a tous siaus quy estoient Jeneves et estrangiers mais ces que furent de Giblet nen orent mau por ce que il estoient ses homes et lor covint venir par force et le seignor de Giblet et ses .ii. freres et lor couzin Guillaume de Giblet et Andrey de Clapiere le prince les manda a Nefin et les fist metre en une foce et masouner et clore les dedens et morurent de fain.

411. Ceste novele fu seue par tout dont mon seignor Johan de Monfort seignor de Sur et dou Toron piestant chevaucha et sa gent o luy et ala a Baruth et manda une guallee quy estoit a Sur de Jeneves de sire Papon Mallon a Giblet; mais si tost con mon seignor de Sur fu a Barut et cuyda metre conseill de defendre Giblet; sele nuit fu veu sur les murs de Giblet le feuc dou luminaire quy faisseent de la ville quy estoit rendue a la gent dou prince et fu la dite guallee si pres que il oyrent crier le los dou prinse et retourna a Sur et mon seignor de Sur sen torna a Sur.

412. Les Pisans dacre si firent mout grant feste de la prise dou seignor de Giblet et firent grant lumynaire par la rue et sur lor maisons et tronbes et chalemiaus et nacares et mout destrument et firent danses et beveries et autres festes de pluisors manieres et vestirent .i. home richement de belle robe sainture dargent et espee argentee et lacistrent en une chayere et le contrefirent au prince et avoit sergans devant et prirent un home grant de persone et le vestirent dunes espaulieres et .i. mantiau forre de bone forrure de vair sur ly et le contrefirent au seignor de Giblet et le fayssoient prendre as sergans et mener devant le prince et sagenoilla par devant luy et le prince ly disoit: Guy de Yblin me counus tu ne suy je le prince ton seignor. Et seluy respondy: Oil sire. Et puis li disoit: Je te feray morir come traitre. Et enssi le firent celle nuit .iii. fois ou .iiii.

413. La nuit que Pisans faysoient ceste feste sire Thomas Espine quy estoit de la cite de Jenne .i. grant home et de grant lignage si estoit a Acre pour aucune bezoigne et estoit herberge a lospitau de Saint Johan et vy le luminaire et la feste que Pisans faisoient pour le seignor de Giblet dont ill ot grant despit; et proumist et jura que se il aloit en Jene quy lor feroit damage en quanque il poiet et saches que ensi le fist il car il fu seluy que plus atissa et conseilla encontre Pise de quei les Pissans resurent grant damage com il fu seu apres et il fu celuy quy primier lor fist damage si com vos lentenderes si apres en se livre; mais je larais ores a parler de ce et vos dirais aucunes aventures quy vindrent en se dit an de .m. et .cc. et .lxxxii. de lincarnasion de Crist.

414. Il avint que le roy daragon fist armer .xxx. guallees et .iiii. saities et fu son entendement daler en Grese faire aucun aquest et se meismes entendement il avoit daler sur le grant roy Charle mais nen avoit encores nul semblant mostre.

415. Lenperour de Costantinople Palilogue quy avoit tous jours sous pite et paour que Frans ne ly venissent sus si avoit porte les oreilles la et quant il entendi larmement dou roy daragone si eut espie son entendement si manda de par luy .i. mesage au roy daragon et fu le mesage au roy daragon .i. bourgois de Jene quy ot nom sire Benet Zaquerie et traita et pourchasa lacort entriaus pour une cantite daver que le dit empereor manda au roy daragon; et sire Benet Zaquerye li porta apres et se retint daler en Grese et quant le roy daragon eut laver et les guallees toutes aparaillies si enprist daler en Sezille et manda en Palerme porchasser de reveler la terre dont il avint que lendemain de Pasques se revela Palerme contre le roy Charle et au mes de may fu revele Mesine et tuerent mout de gent doutre les mons.

416. Le roy Charle sur se fist une grant armee et mena chevaliers et autres gens a chevau et a pie o luy et ala devant Mesine et lasega et siaus de Mesine yssirent et depeserent et taillerent les vignes et les jardins veant le roy Charle; et quant il vy que siaus de Mesine meymes destrueent tout si sen party pour ce quil ne voloit pas les destruement dou pais car il avoit entendement de recovrer lasainement.

417. Et quant vint au mois daoust le roy daragon vint en Palerme et amena .xxiiii. gualees et saities et siaus de Palerme le resurent volentiers et puis vint a Mesine. Siaus de Mesine le resurent a grant henor et le tindrent au roy et au seignor. En apres il manda querre sa feme quy ot nom Costance qui fu fille dou roy Manfre; de par elle se tenoit droit heir dou royaume de Sezille mais je vos lairay a parler de se et si vos diray dautre rayson.

418. Vous saves coment je vos ay dit que le roy Charle avoit la seignorie dou royaume de Jerusalem de par damoisele Marie et sapeloit roy de Jerusalem dont il fist sire Heude Pelechien seneschau dou royaume de Jerusalem et le manda en Acre en leuc de luy baill et retorna outremer le conte Rogier de Saint Sevrin et fist .i. chevalier de France maureschau dou royaume quy vint a Acre aveuc sire Heude Pelechien dedens le chasteau dacre.

419. Et quant vint lan de .m. et .cc. et .lxxxiii. le premier jor daoust aryva a Barut le roy Hugue de Jerusalem et de Chipre et mena o luy .ii. de ses enfans que lun fu nome Baymont segont fis et lautre aihne de tous ot nom Johan quy estoit remes en Chipre; et lautre fu nome Henry qui fu apres roy si con vos ores et mena o luy bele gens darmes chevaliers et autres et a .vi. jours dou dit mes se party de Barut et ala a Sur; et le jour que il ariva a Sur une soue baniere as armes de Lezingniau chay en la mer et a lentree de la ville fu dessendu en terre. La tore des Juis ly fu porte a lencontre si com est usage que lon fait as roys et un Jude quy avoit nom Samouel le Miege au passer que il fist apres la tore coty le clerc quy portoit la crus devant la presesion que la crois qui fu sy haut chay sur ce Jude et li brysa la teste. Et tout fois fu li roys a liglise et puis monta a chevau et ala herberger a lostel de monseignor de Sur et ses bestes qui demourerent a Barut et partie de sa gent de mehnee qui veneent par terre a Sur et quant il furent a Sur entre Chastelet et le Flun damor en .i. mauvais pas les Sarazins les assailierent et fu tue .i. chevalier et plusors autres menues gens et aucuns furent pris vif.

420. En ce dit an ensi com il plost a Nostre Seignor a .xxvii. jors de novenbre trespassa le bon seignor et debonaire mon seignor Johan de Monfort noble seignor de Sur et dou Toron quil a este mout grant damage et fu enteres a la mere yglise de Sur dedens le moniment de son pere et se fu la vegile de sainte Cateline. Ce seignor fu mout prodome en toutes raysons et a Dieu et a la gent et pour ce fu il ayme de toutes manieres de gens; especiaument sa mehnee laymeent mout et le plourerent mout et il avoit a feme la seur dou roy Hugue si con je vos ay dit devant quy ot nom Marguerite mout bone dame et sage et de grant biaute laquele nen ot de luy nul enfant. Mon seignor Anfrey son frere quy tenoit Barut de par sespouze madame Eschive quy fu fille de monseignor de Barut Johan de Yblin quant lon le manda querre il vint; son aihne frere monseignor de Sur sus celle nut morut et fu son enterer.

421. Le roy Hugue de Lezingniau fist asembler sa court et les Jeneves et Pisans et Venesiens et en prezence de tous revesty et saizi le dit monseignor Anfrey de Monfort de la terre dou Toron et messire Anfrey li en fist homage et de la site de Sur si le saisi par condision de dens terme cest asaver por tout may prochain venant et se dedens se dit terme le roy li eust done .clm. bezans sarazinas que Sur deust revenir au roy et se le sus dit terme estoit passe et que le roy ne li eust done .clm. bezans sarazinas que Sur demourast au dit monseignor Anfrey mais se fait que je vous dis si ala pis outremer con vous en pores oir.

422. Et avint a siaus jours que le bon enfant et le debonaire et large et courtois Beymont fis dou roy Hugue coucha malade et ly monta au col une leveure mout laide et furent mandes querre .ii. myeges dacre qui le flemerent si que por lenfleure et por autre dehait trespassa de se siecle a lautre a .iii. jors dou mois de novenbre dou dit an quy fu mout grant damage car il fu biau et bon et cortois.

423. Et quant vint a .xii. jours dou mois de fevrier dou dit an trespassa monseignor Anfrey frere de monseignor Johan de Monfort seignor de Sur et fu enterey a la mere yglise de Sur en un moniment dun sien frere quy fu apele Johan quy fu fis dune autre dame que son pere avoit eu outremer couzine jermaine dou roy de France le quel estoit venu de sa mer valet veir son pere et morut sestuy monseignor Anfrey qui fu mout biau chevalier de grant maniere que quant il vy le roy de France li douna tesmoin que il estoit le plus biau chevalier que il onques vit jusques a sel jour. Se seignor messire Anfrey si laissa .v. fis et une fille quy furent mout biaus enfans et laihne ot nom Johanin et lautre Phelippe et lautre Guyotin et lautre Aumaury et lautre Rupin et la fille Alison les queles morurent anfans les .iii. fis et la fille en .i. poy de tens morut ... chevalier jeune et Rupin morut ausi chevalier mout jeune et laissa .iii. anfans .i. fis quy ot nom Anfrion et .ii. filles Johanete et Heluis.

424. Et quant vint a .xxiiii. jours dou mes de mars que define en lan de .m. et .cc. et .lxxxiii. et comense a .m. et .cc. et .lxxxiiii. trespassa le tres noble roy Hugue de Lezingniau et fu grant damage a la crestiente pour le grant sens et bonte de luy; et si fu roy de Jerusalem et de Chipre et si fu biau et si noble que sil fust entre .m. chevaliers leust lon coneu pour roy le quel fu mis en .iii. tabous lun dedens lautre bien calafates et bien enpeesches et vint a Sur le conestable Simon de Montholif et enporterent en Chipre le cors dou roy et seluy de son fis et le cors de son pere dou roy Hugue quy morut nee et furent portes en Chipre et mis a la mere yglise quy a nom Sainte Sofie. Mort furent a Sur ses .iiii. seignors le roy et les autres; morurent en .iiii. mes con vos aves oy.

425. Et apres en mois dou may dou dit an fu couroune en Chipre a roy monseignor Johan ahne fis dou devant dit roy Hugue et fu fait mout grant feste mais il ne vesquy guaires si con vous ores dire.

426. Et se dit an de .m. et .cclxxxiiii. a .v. jours de gunet siaus de Mesine aveent arme .xxiiii. guallees et vindrent devant Naples quy est dou roy Charle; et le fis dou roy Charle quy avoit nom Charle et estoit a sel jour prince de Salerne arma .xxx. guallees et il monta son cors sur les guallees et ala ferir as guallees de Mesine dont les gualees dou prince furent desconfites et il fu pris en persone et autres bones gens chevaliers et autres et menes a Messine en pryson.

427. Et cestuy an meismes a .vii. jours de jenvier trespassa le roy Charle le grant en .i. chastiau quy a nom Foges.

428. Et a .xii. jours de mars dou dit an trespassa frere Nicole de Lorgne maistre de lospitau de Saint Johan et fu fait maistre frere Johan de Villier.

429. Et en se dit an de .m. et .cc. et .lxxxiiii. vint le soudan Melec el Monsour a Domas et fist son atir et ala aseger Marguat chastiau de lospitau de Saint Johan et le tint siege de .xvii. jours davril en jusques a .xxvii. jours dou mois de may quil le prist a fiance car il estoient mines devers le Tour de lesperan quy estoit cheue et le soudan manda toute sa gent a sauvete a Triple et a Tertouse.

430. En lan de .m. et .cc. et .lxxxv. de Crist fu delivre de la prison de Mesine le roy Charle fis dou grant Charle et les autres quy furent pris o luy.

431. En ce dit an a .x. jours de may morut le roy Johan de Chipre fis dou roy Hugue et ne fu roy que .i. an.

432. Et en se dit an meismes fu couroune apres luy dou royaume de Chipre Henry son frere quy destrust les Jeneves.

433. Et en se dit an le roy de France Phelippe fis de Lois quy estoit ale a Gironde en Aragon et lavoit prise par force despee si morut la et fu son cors porte a Paris et trespassa Lois de Biaujeu counestable dou royaume de France a Gironde et autres vavasors et cestu counestable estoit frere dou maistre dou Temple frere Guillaume de Biaujeu.

434. Et a .xx. jours depuis la mort dou roy de France morut le roy Piere daragon et sen party lost des Frances et retourna en France; et ores laira de ce et vous diray autre aventure.

435. Et en se dit an de .m. et .cc. et .lxxxv. le roy Henry de Chipre vost venir a Acre et pour ce que il estoit mau dou Temple li sembla que il ne poroit venir sans guerre; si manda .i. chevalier sire Julien le jaune mesage au maistre dou Temple frere Guillaume de Biaujeu et fu herberge dedens lospitau de Saint Johan de Jerusalem a Acre lequel parla par plusors fes au dit maistre dou Temple en maniere que la bezoine fu mize en acort lequel acort fu premier escrit par ma main et pour ce que il seroit trop lonc a metre par escrit pour ce ne lay je pas mis en se livre.

436. Et ce dit an de .m. et .cc. et .lxxxv. a .v. jours de gunet....

437. Et quant vint en lan de lincarnasion de Crist .m. et .cc. et .lxxxvi. le roy Henry de Chipre ariva a Acre le jour de la feste de saint Johan Batiste au mes de gunet et vint o luy messire Bauduyn diblin son oncle counestable dou royaume de Chipre et mena mout belle chevalerie et autres gens a chevau et a pie et belle naville de guallees et dautres vaussiaus et fu reseu de toute gens a trop grant henor et a grant joie et li vint a lencontre la presesion et tout le peuple et le menerent a la mere yglise quy a nom Sainte Crus. Et quant il fu la il dist quil ne herbergeroit que au chastiau et sire Heude Pelechien quy tenoit le chastiau pour le roy Charle avoit mis aucuns jours avant la gent dou roy de France et autres gens darmes dedens le chastiau et fist atirer engins et mist le chastiau en defence contre le roy Henry.

438. Sur ce le maistre dou Temple et le maistre de lospitau et le maistre des Alemans estoient tous .iii. au Temple et ne vindrent mye a lencontre dou roy a luy acullir et se firent il pour la rayson de ce que il estoient gens de religion et ne se voleent travailler de ce fait por non aver le maugre daucunes des parties et toute fois quant ill oyerent la riote quy conmensoit et que il y ot trait carryaus et piles dune part et dautre et que siaus dou chastiau avoient trait des engins et que grant peril poiet estre si se vindrent tous les .iii. maistres devant nomes la ou le roy estoit a liglise et li firent grant joie et parlerent a luy et alerent au chastiau et parlerent a sire Heude Pelechien et menerent la chose a ce que messire Heude Pelechien proumist de rendre le chastiau a .iii. religions et le roy sen ala herberger a lostel quy fu dou seignor de Sur au dela dou Sepulcre et .iiii. jours apres fu rendu le chastiau et il ala herberger dedens.

439. En se dit an meismes a la feste de Nostre Dame daoust le dit roy Henry fu encourone a Sur dou royaume de Jerusalem et le courona frere Bonacours arsevesque de Sur et fu fait mout grant feste a Sur et puis que le roy vint a Acre il tint feste .xv. jours dedens .i. leuc a Acre quy se dit a la Herberge de lospitau de Saint Johan la ou il y avoit .i. mout grant palais et fu la feste la plus belle que lon sache .c. ans a denvissures et de behors et contrefirent la table reonde et la raine de Femenie cest asaver chevaliers vestus come dames et josteent ensemble; puis firent nounains quy estoient ave moines et bendoient les uns as autres; et contrefirent Lanselot et Tristan et Pilamedes et mout dautres jeus biaus et delitables et plaissans et puis laissa en Acre baill en son leuc son oncle monseignor Bauduyn de Yblin counestable dou royaume de Chipre et passa le roy en Chipre; et ores vos lairay a parler dou roy et vous diray dautre raison.

440. En se dit an de .m. et .cc. et .lxxxvi. de Crist avint que .i. grant seignor quy se dizoit juge de Chinerc seignor dune ihle quy a nom Corfe si estoit home dou comun de Jene et se vost faire home de comun de Pize et les Jeneves si ont en sele ihle .i. mout fort chastiau quy a nom Boniface et autres leus ausi ont les Jeneves la et saches le comun de Jene fait doner a tous les enfans mahles quy naissent en se chastiau de Bonyface .xii. deniers le jour pour son vivre tant que il soit de .xx. ans et la fille quy i naist si doune .vi. deniers le jour tant que elle ait .xv. ans daage et se fait le comun de Jene pour maintenir en abitasion le dit chastiau.

441. Or avint que le comun de Jene entendirent coment le juge de Chinerc se voloit faire home dou coumun de Pize; dont les Jeneves le tindrent a mau et manderent en Pize mesage tel home quy ne deussent cestu lor home resever si com il ne voreent que Jeneves feyssent a yaus dou tel cas; et les Pizans ne vostrent oir ceste chose et sen firent mout eschif pacant toutefois en biau respons sans euvre; et lenemy dinfer quy volentiers pourchasse discort et guerre entre la gent si condust la chose a ce que une nave vint de Surie en Jene et porta novelles des ostrages et des maus que Pissans faysseent a Jeneves a Acre et fu si grant remour en Gene que chascun cria guerre a Pize. En seluy jour estoit un lain arme de Pizans en Jene quy avoit porte .i. mesage de Pise a faire le respons as Jeneves sur le fait de juge de Chenierc quy se party et tourna en Pise sans bien faire.

442. Le comun de Jene arma .xx. guallees et fu lor chevetaine le dit amiral sire Thomas Espine qui ala a .ii. ihles quy sont des Pizans et pres de Pise et les prist et depesa et destrust lune ihle celle quy a nom Planoge; et lautre quy ot nom lelbe si prirent les abitans de sele ihle et donerent lor femes et lor enfans en hostages as Jeneves et promirent qui se terreent pour le coumun de Jene mais dedens poy de tens tournerent au comun de Pize et laisserent lor ostages.

443. Sire Thomas Espine demoura en siaus ihles et li sembla quy ne faisoit rien entre .ii. de partir ou de demourer et sa gent meismes le hasteent mout de partir mais tel fu laventure quil promist de tendre .i. jour la et nient plus; et quant vint lendemain il virent paristre .ii. coulonbes armes et alerent encontre yaus et si tost come les coulonbes virent les guallees si se myrent a fouir et geterent .i. barill en laigue mais les guallees les chasserent tant que les prirent et prirent le baril au quel il troverent dedens mout de letres par les queles furent seus coment .v. naves et .v. guallees de Pizans veneent et porteent argent quil aveent amase de largentiere de lor chastiau quy a nom Castel de Castre dont Pize resut grant damage.

444. Et en lautre an apres les Jeneves armerent .xv. guallees et fu lor amiraill sire Origue Damar et ala en cours sur Pisans cestu Oric Damar: si prist une petite nave por la quele il ot novelles par les gens quy estoient dedens coment en Pize sarmet .xxv. guallees quy deveent condure .iii. naves quy porteent gens darmes en Sardeine a Castel de Castre et sur seste chose que je vos dy .v. guallees de marchans Jeneves qui aleent et veneent de Romanie passerent par ses guallees doryc Damar et le dit sire Oric si les retint par force o luy et se fist a estre plus fort. Si se trovasent aveuc siaus de Pizans quy furent .xxv. et estant ensi atendant les .xxv. guallees de Pizans et les .iii. naves nissirent et les trova .i. si fort tens quy les desparty des naves car les naves velegierent toute la nut et le matin eurent grant bonase et les guallees de Jene les aveent veu passer de la nut avant et les trasseent toute la nut a petit velles de chanavas a grant travail et a grant doulour et le matin se troverent a la viste des naves et esfondrerent lune la ou il esteent les chevaus et les conbatirent une fes mout fort et a la segonde les Pizans ne porrent plus et se rendirent et les menerent en Jene et fu pris entre les autres naves .i. grant conte de Pize quy fu nome conte Face mais le jour que il furent pris si con je vos ay dit les .xxv. guallees de Pissans quy les conduyssoient joingnierent la a my jour et virent lor naves prises et les Jeneves les envairent et les envestirent et fu la bataille entreaus mais Pissans aveent toute nut soufert grant paine de la fortune et nen ont pas si use ni apris le travaill de la mer con les Jeneves et si furent de mau corage de lor naves quy les virent prises si furent vencus; et prirent les Jeneves .xii. ou .xiii. guallees et les autres furent dautre part en une flote. Les Jeneves esteent les et travailles et le soulaill estoit couche: si laisserent le combatre et firent de lor guallees un serne entour seles des Pisans pour prendre les le matin mais il avint autrement que a minut escure siaus gualees des Pizans .xii. ou .xiii. que il furent se partirent si coyement que il ne furent sentis et sen alerent sauvement sauve le damage qui resurent a la bataille.

445. Quant le comun de Pise ot resseu si grant damage con vos aves oy san plussors vassiaus menus et naves que Jeneves lor aveent pris si eurent conseil de metre tout pour tout et armerent .xxxv. guallees. Et a sel tens avoient siaus de Pize .i. apostau en Pize quy estoit un grant home de Veneyse quy avoit nom messire Aubert Morizin et fist venir de Veneyse plusours gens ases dou coumun de Pise et les mirent devant la cite sur lor guallees et se partirent et vindrent devant la site de Jene et fu lor capitan sestu dit Aubert Morizin et y demourerent .ii. jours.

446. Les Jeneves tantost armerent .lxx. gualees et dedens se un mautens se mist et Pizans douterent le mautens pour ce que seluy leuc est aspre et mauvais et leuc de leur enemis. Si sen partirent et tournerent en Pise les Jeneves quy furent aparailles. Si tost con le tens abonasa si se mirent aler apres les Pisans et aloient par lor trasse celon les choses qui troveent en la mer quy chayeent des gallees et alant enssi il encontrerent .xx. guallees de Jene dun lor chevetain quy a nom messire Benoit Zacarie au quel il mostrerent le signal quy est use entreaus et sasemblerent tous ensemble et fu lor conseil de non mostrer tout lor gallees mais mostrer .lx. ou .lxx. par ce que Pisans nissent plus volentiers et le firent ensi quil mostrerent .lx. alant a vele et les autres .xxx. esteent derieres sans veles; et quant siaus de Pise virent si poy de gualees si remontrerent sur lor guallees et furent .lxxxiiii. et armerent pluzours barquetes et saities en quei avoit aubalestriers dedens.

447. Quant les guallees de Pize furent hors messire Aubert Morysin fu desus et seluy les mist a ceste enprize et si furent .ii. estendars; lun estoit toute vermeille et avoit la figure de Nostre Dame quy estoit toute blanche tenant Jhesu Crist en ses bras et quant Pizans furent yssus et virent que Jeneves aveent ases plus de guallees quy ne pareent si furent repentis de lor yssue mais riens ne lor valut que partir ne poeent ains estoient a la veryte et se fu a un jor dune feste que Jeneves apelent saint Siste que vient a .vi. jours daoust et nous faizons en Surie celuy jour la feste de Saint Sauvor.

448. Estant les uns devant les autres dou matin jusques au vespres et Pizans furent mout charges darmes et faysoit grant chaut si que il suerent si fort que il devindrent tout aigue et les Jeneves tout le jour furent sans armes fres et repos et se vos voles dire coment Pisans ne les aleent enoier saches que il eusent bien fait mais les Jeneves neusent pas atendu con sil quy guayteent lor point si come vos ores ni partir Pizans ni poeent quil ne lor fust este honte et damage. Pizans avoient lor guallees groces et chargees par les bandes des escus grans autant que en prendre pooient por ce que il mostreent et fait avoient car pluyssours guallees avoient par engin fait a lor proe ce arganel que quant il tourneent avoient espees longues de .ii. paumes chascune et larges dun paume de cant quy tourneent come un molin et ausi avoient flayaus quy tornoyent ausi come je vos devise.

449. Quant les Jeneves virent que Pissans furent bien este a soulail armes et le soulail fu deriere les espaules firent douner pain et vin a lor gens et puis sarmerent et alerent envestir les guallees des Pizans et fu la bataille mout mortau dont il avint que sire Beneit Sacarie fist arbourer .ii. de ses gualees et se fist lier une longue corde et forte de larbre de lune guallee a larbre de lautre et ensy que ses .ii. guallees quy aveent ceste dite corde a travers de lun arbre a lautre si prirent une voge de bien lyes et alerent envestir la gualee de lamirail des Pizans la ou estoit lestendar vermeil dont la corde vint a travers le perche dont le dit estendar doune part a lautre fu bande et brizerent la perche de lestendar et chay dont les Jeneves prirent baudour et hasterent les Pisans et jeterent cry sus sus as Pizans qui se desconfirent et perdirent a selle fois .xlviii. gualees et fu pris lor capitaine sire Aubert Moryssin qui feru en la chiere .ii. ses aparans.

450. Les Jeneves alerent en Jene et menerent mout de Pizans pris et rendirent grace a Nostre Seignor de celle victoire.

451. De puis seste grant perte que Pizans resurent il furent de tout rous et ne orent plus de poer armer; et les Jeneves manderent sire Beneit Zacarie et gualees au port des Pizans et abatirent .ii. tours dou port. Et sire Beneit coingnia monee et se party et laissa .vi. gualees pour garder le port que nul ny entrast nen issist et furent Pizans mout destroit; et saches que Pizans perdirent a cele fois et par pluzors autres fois homes darmes .xxiim. des ques se trova en Jene .xviim. en prisson et perdirent guallees .lxviii. et autres leins .l. et plus et en tel point estoit Pisse con je vos dis et tous siaus quy faizeent escale par Pize la firent par Jene pour naveger en mer.

452. Syaus de Jene armerent autre fois et vindrent a Plonbin dou coutei de Pize et desendirent en terre et Pizans saillirent dun agait et tuerent pluzours Jeneves et prirent aucuns entre les quels fu pris .i. des gentils homes de Jene quy ot nom Nicoloze Damar; et Pizans a seluy taillierent la teste veant les Jeneves des guallees et les Jeneves taillerent les pour seluy a .iiic. Pizans quy aveent pris.

453. Syaus de Plonbin armerent apres se .ii. guallees et .i. lain quy furent mout bons et ligiers pour corsegier et se partirent dou Plonbin et se mirent a aler en cours sur Jeneves et firent damage a la rivyere de Jene par les viletes et cy tost come il furent descovers si se partirent et alerent en autres aigues et avint en se que le comun de Jene armerent .v. gualees quy lor alerent apres et les troverent as aigues de Tunes et lor dounerent chasse si pres que il furent asaillis de sus et fu chassant a vele mais la vele chay jus de la gallee de Jene par larbre quy brisa et ensi eschaperent les Plonbines; et ceste gualee quy eschapa ensi con vous oyes si fu dun vaillant bachelier de Plonbin quy avoit nom Maillyant a quy je oy se retraire au maistre et le chevetaine des .v. guallees des Jeneves si fu .i. vaillant home et ansien mais il savoit asses de guerre de mer.

454. Les lains de Plonbin alerent en Surie et a Acre. Sestu sire Rolant Dasser estoit tourne en Jene et fu ordene sire Thomas Espine pour aler mesage au prince Baymont de Triple et ly fu arme une gualee et ses .v. gualees de Rolant le deveent aconpaigner pour ce que lon savet que les leins de Plonbin estoient venus en Surie et aveent fait aucun damage as Jeneves; il se vindrent de Jene et ariverent a Bafe et sire Thomas Espine se party de Rolant Dasser et ala en sa gualee soule en Alixandre mesage au soudan; et Rolant Dasser sen vint droit au port dacre de nut subitement et dehors le port troverent pluissors barques de pesqours Poulains Pizans et pernans les furent sentis si que les .ii. leins des Plonbines estoient yssus hors des esqueles de la Tour des Moches ne say ou il devoient aler et sen fourirent dedens le port et les gualees des Jeneves les chasserent jusques devant le port de cheene et lune gualee a dure et saillirent les guallees a laigue et tirerent hors la gualee. Le matin au jour fait quy fu le samedy la vegile de paintecouste ardirent au port dacre une grant nave de Pizans quy estoit de sire Raymont Drapier charget de nouzilles et dautres biens et le comandour dou Temple frere Tibaut Gaudin requist en grasse les povres pesqours que il avoient pris et il les manda; et party seluy jour et ala faire la pentecoste a Sur. Le maistre dou Temple estoit au Chastiau Pelerin et Mayllant de Plonbin a son lein estoit la pour parler au maistre dou Temple et prendre conge de luy pour aler outre mer mais avet autre entendement car luy et les autres .ii. leins de sa conserve deveent aler ver Alixandre pour encontre sire Thomas Espine quil sauveent quil estoit la et quant il sot que les gualees de Jeneves estoient venus a Acre si tira sa gualee de sous les murs dou chastiau et mist la gent en terre et lendemain eut novelles que mon seignor le maistre quil estoit ales a Sur et Maillan a son lain ala a Acre.

455. Monseignor le maistre vint a Acre et Pizans et Venesiens si armerent plusors leins tant quil furent .xi. leins de tire cest assaver .iii. de Plonbin et .ii. de Venessiens et .vi. tarides mais il navoit as tarides que .i. home par banc quy voguet et combators asses et panfles barboutes plus de .xl. en quei avet abalestriers et les tarides estoient barboutees tout entour de tables et de escus quy estoient grevees et mirent .i. grant estendar de saint Marc et fu lor amiraill .i. Venessien que je ne vos sais nomer.

456. Et quant vint le samedy les huytaines de la pentecouste les gualees de Jene vindrent a la Cale dou marquis et furent .v. et une grose saitie de .lxxx. rins et .ii. coulonbiaus; et mon seignor le maistre issi parler a yaus et lor pria de tourner a Sur et sire Rolant Dassier promy de tourner et par enssi que ses henemis nen yssisent car apres luy seroit honte de partir. Et le maistre li dist que Pizans et Venesiens ly aveent promis de non yssir hors dou port tant que lor feroit respons; et sur ses paroles larmement des Pizans yssi et sire Rolant Dasser ala encontre a biass en poy pour tirer les hors a se que le vent les parpereillast et sur le biasser cuyderent Pizans que il fouyssent et les hulerent fort; et siaus alerent et prirent le port si tost que il furent armes a grant aysse avant ce que Pizans furent retornes mais quant il furent pres Jeneves les asaillirent de lanses longues et de pieres et de cariaus que il en tuerent aucuns et nafrerent pluisours dont les Pisans sen alerent vers le pont de Veneyse quy miaus a miaus: siaus des tarides se lanserent a laigue et jeterent les Jeneves .i. rampagour sur la taride la ou estoyt lestendar de Veneyse pour tirer la mais mailliate ly fist sourgre .i. ancre de proue et quant les Jeneves la sentirent dure a tirer si taillerent le caf dou rampagour et laisserent sur la taride atout la chaene le quel fu veu devant la loge de Veneyse. Sire Rolant Dasser si fu au port .iii. jors que onques pour rien que lon seust faire nul ne vost monter sur laigue et les Jeneves se partirent et alerent a Sur et revindrent au port dacre et ... atendy luy et si se party et ala a Sur.

457. Sire Thomas Espine fist son mesage au soudan et sen party et vint droit a Triple et dist sa mesagerie au prince et puis si sen vint; et puis quil fu party dou prince ordena que quant le dit sire Thomas tornereit a ly pour aver respons il le devet prendre et metre en prison mes .i. chevalier dou conseil dou prince fist asaver au maistre mon seignor. Le maistre me douna selle letre que le chevalier li manda mais il osta le nom a force et je sans le nom la mandais a sire Thoumas Espine por la quel letre il se garda daler au prince.

458. Encores autre fois vindrent les gualees de sire Rolant Daesser et sire Thomas o luy et furent .vi. guallees et asegerent le port si que Pissans ny Venessiens nul nen yssi a yaus et prirent .i. grant leing de Pissans quy venoit de Damiate quy estraca la pelage et eschaperent les persones et sire Thomas Espine parla au maistre au Cazal Ynbert et puis se party et ala a Sur.

459. Encores vint un autre fois sire Rolant Daesser au port et demoura .iiii. jours et dist qui ne se partiroit dou port dacre se lon ny chasast les Plonbines.

460. Les seignors dacre virent que ceste chose quil faizoit estoit layde a la crestiente et pereliouse que Sarazins poreent prendre sample de ce faire: si li manderent mesages .ii. freres menors priant ly de partir dou port. Son respons fu quil se partiroit a lor priere par enssi que tous les seignors dacre ly feissent une chartre coment a lor priere estoit il party dou port; et li firent de ce une chartre seelee dou seau dou baill quy tenoit leuc dou roy et dou Temple et de lospitau et en tel maniere se party que depuis ne revint et autrement ne le porent chasser car il avoit ligieres gualees et atendoit quant il voloit et aleit quant il voloit et Pizans ne fu nul quy vozist plus monter as gualees por combatre. Et ores ne vous dirais plus de ceste raysson car il nen y a plus a dire et vos diray autre chose.

461. En se dit an de .m. et .cc. et .lxxxvii. avint que le soudan de Babiloine si ot grant riote et contens a .i. grant amiraill quy avoit nom Sencor Lesquar seluy qui fu delivre des Tatars pour change dou fis dou roy dermenie con je le vos ais dit si arier. Cestu dit amiraill se party de Babiloine a grant cantite de gens et vint a Domas et la cuyda susmetre a son poyer mais il ne post et se parti et ala a .i. chastiau que Sarazins tenoient et a nom Sahone et fu avant dou prince et le prist et se mist dedens.

462. Le soudan quant il entendy que cestu li eut pris son chastiau manda .i. grant host de Babiloine et .i. sien amiraill chevetaine Turentay quy vint atout cest host a seluy chastiau de Saoune et lasege; et Sencor Lescar quy nen avoit pas tant de gent quy peust yssir contre luy si rendy le chastiau et sestu Turentay sen party et vint en une ville dou prince quy a nom la Liche et la prist.

463. Et ore vous veul dire ce quil avint a Naples au conte dartois en se dit an a .xxiiii. jours dou mes de gun la vegile de Saint Johan Batiste. De Mesine vindrent a Naples .xliiii. guallees et le conte dartois quy estoit en leuc dou roy si fist armer et nyssi encontre et se combaty a siaus de Mesine et dura la bataille de tyerse jusques a vespres et en la fin furent desconfis siaus de Naples et si eut que pris que mors de frans homes de la lengue de France et y fu pris le conte de Bretaine et messire Johan de Monfort conte desquilac et de Montecaius et messire Guy de Monfort quy morut en la prizon et se fu seluy quy tailla la teste a Henry de Lemaigne et plusours autres que je ne sais nomer dont le damage fu grant.

464. Et en se meymes an de .m. et .cc. et .lxxxvii. a .xix. jours dou mois de huitovre le prince Beymont prince dantioche et conte de Triple trepassa de se siecle et morut et depuis luy nen eut autre prinse car il nen eut nul enfant et eschut le prinsee a une soue seur feme de messire Marguo de Tocy quy estoit amiraill dou roy Charle en Poille au jour.

465. Et en lan de .m. et .cc. et .lxxxviii. de Crist vos diray une grant meschance quy avint a la crestiente de Surie.

466. Il avint chose que le prince devant dit fu mort que les chevaliers sasemblerent et alerent a la princesse mere de ce dit prince et ly distrent que il voreent volentiers que li pleust de metre aucune persone quy gouvernast la site car elle ni poiet entendre pour son deul que elle demenoit et elle lor respondy que elle manderoit querre tel persone que bien governeroit eaus et la terre et yaus li respondirent que bien lor plaisseit.

467. Quant vint aucuns jours apres il entendirent que elle devoit faire venir le vesque de Tourtouse por le quel il avoient eu contens et ryote et grant escandele entriaus et troverent letres coument la princesse fist por luy faire venir: si distrent entre iaus quy ne le souferoient et alerent a la princese et li mostrerent les letres et li distrent que ce vesque estoit lor henemy et quy ne seroit ja lor governeor et se partirent et alerent a conseill et adons ordenerent une coumune a lhenor de la beate Virge Marye mere de Dieu et ordenerent chevetaines et prevost et se quil lor sembla a faire et se maintindrent par yaus et a ce que il fucent plus fors si manderent .i. mesage en Jene quy ot nom Pierre dauberguamo notaire et quil mandassent a Triple et eaus manderent toutes lor raysons; dont le coumun si lor manda messire Beneit Zacarie et .v. gualees et vint a Triple; le resurent a grant henour et a grant joie et quant il ariva a Triple il trova le maistre dou Temple et le maistre de lospitau et des Alemans et le baill de Veneyse quy estoit dehors les portes de Triple en tentes et pavelions herberges et estoient venus por metre acort entre la seur dou prince dame Lusie et les gens de Triple.

468. Et ores vous diray coment seste dame Lucie de Puille quant le prince morut la novelle ala outremer et messire Marguo de Toucy amirail dou roy Charle manda seste dame quy estoit sa espouze et seur dou prince a Acre et la manda recomander a lospitau de Saint Johan dont les Ospitalliers la prirent a maintenir et la menerent a .i. chastiau quy a nom Nefin quy est pres de Triple a .iii. liues et se tenoit por la dite dame come selle quy estoit dame et heir dou prince et pareille fois les Ospitalliers aveent eu bataille a siaus de Triple de quey aucuns freres et autres furent mors. Et manderent siaus de Triple une lettre a la dame desus dite par la quelle yaus li faissoient saver que a elle nestoit mye chose selee coment elle devoit bien saver les outrages que son frere le prince lor avoit fait et encores ly faiseent saver que son pere le prince et son ayol lor aveent tous jours fait mout de maus et doutrages et de force a chevaliers et as bourgois et as autres gens que il ne voleent plus soufrir a ce que yaus et lor ansestres qui furent au conquest de la terre de Triple aveent soufert et pace et pour non venir plus a celle condecion aveent ordene et fait .i. coumun entriaus a lenor de Dieu et de Nostre Dame a quy nom lor comun est noume et que il ne lont fait pour dezeriter nule arme ny contre sainte yglise ains estoit fait por maintenir chascun en son droit et en sa raison et que il sont apareilles de resever la come dame par enssi quelle jurast a la coumune de soustenir et maintenir la dite coumune et se elle ne vyaut jurer bien ly faiseent a saver que il ne la souferoient dentrer a Triple a nul tens si deussent enguager ou vendre tout se que il ont jusques a la chemise de lor femes et de lor enfans. Et sur ce que il li firent ce manderent les dites gualees venir des Jeneves dont il en furent plus eschif de lacorder et se partirent ses seignors le maistre dou Temple et de lospitau et des Alemans et le baill de Veneyse quy estoyent la venus pour metre aucun acort et sen vindrent a Acre sans rien faire.

469. Le dit sire Beneit et la coumune de Triple firent compaignie au coumun de Jene et lor proumirent de rendre et douner tout se quy estoit de lor raison mais au coumensement lor donerent por dedens la ville de Triple une devise de rues qui deveent estre de lor apartenanses et ma dame Lusie sen vint a Acre et sire Beneit Zacarie ala en Ermenie.

470. Lentendement de messire Berthelemi de Giblet si fu daver la fille dou seignor de Giblet a son fis et sa fille deust estre feme dou seignor de Giblet quy estoit anfant; et plusors autres franchises fusent otreees a chevaliers et a bourges que trop seroit lonc a metre par escrit et de ceste choze manderent unes letres que ce elle vossist ma dame Lucie otreer ceste lor requeste et otroer as Jeneves se que lor aveent doune soulement sans douner lor plus que yaus la resevereent pour dame et ne dovreent as Jeneves nule autre choze.

471. La dame resut ceste letre et se conseilla sur la forme de la letre si que ceste letre ala par aucune mains tant quy fu une persone quy la encontre escrit et la manda a sire Beneit Zacarie en Ermenie.

472. Le dit sire Beneit resut sele dite letre entrevees venant vers Triple et quant sire Beneit resut la letre et rendy la tenor il ne fist nul semblant et entra a Triple et fu .i. jour et sen party et ala a Sur et la manda a Acre a ma dame Lucie que se elle vosist venir en adresement o luy des raizons dou coumune quele venist a Sur et amenast son conseill et se elle en vozist venir seust elle bien quil feret venir de Jene .l. gualees a Triple et apres elle ny en seroit jamais dame. Et quant la dame oy ce mandement se que le dit Beneit Zacarie avoit mande si se conseilla a son conseil lospitau quy li armerent une saitie et la menerent a Sur dont frere Bonyface de Calamandrane de lospitau .i. grant seignor vint a la dite dame et parlerent ensemble au dit sire Beneit; et tant y ot dit et debaty dune part et dautre quy sacorderent au gre des .ii. parties et alerent a Triple; mais je vos laira de lor fait et vos diray une autre rayson quy touche a yaus.

473. Il avint enssi que quant les Jeneves furent venus a Triple car vos aves oy .ii. persones monterent dalisandre au soudan que je por ce dire que il sont se je voree et parlerent au soudan et li mostrerent coument Triple par elle sans les Jeneves armereit ligierement de .x. a .xv. leins et ores que Jeneves lont a lor main il en armeront .xxx. car Jeneveus de toutes pars veront a Triple et sil ont Triple il seront seignors de ses aigues et convera que siaus quy veront en Alyssandre seront a lor mercy alant et venant et dedens le port la quel choze tourne a grand peril des marchans quy huzent en vostre royaume.

474. Quant le soudan loy si ly sembla que ceste estoit rayson quy sembloit bien que ensi deust estre et le my en euvre si com il mostra apres et par my tout se il avoit grant volente contre Triple pour le prince quy fu a Domas quant les Tatars le prirent et fist mout de honte as Sarazins; dont le soudan eust conseil a ses amiraus et ordenerent daler a Triple et fist aparailler les gens darmes et les cames par les chemins mais il y avoit .i. amirail quy estoit ansien et .i. des .iiii. quy sostenoient la painime; si fist a saver a mon seignor le maistre dou Temple seste novele et avoit nom sestu amirail hemir Salah quy estoit huse davertir le maistre dou Temple dou proufit de la crestiente quant le soudan voloit grever la crestiente en aucune maniere et costoit au maistre de biaus prezens chascun an que il ly mandoit. Et quant le soudan fu hors ala a Salahie et tout son host: le maistre manda .i. home de sa mahnee a siaus de Triple coment le soudan venoit sur yaus a Triple dont il ne le vostrent croire et dyzeent quy venoient prendre Nefin et autres diseent laides paroles dou maistre que ce faiseent il pour eaus esfreer por ce que il eussent bezoing de faire le menejer vers le soudan et semblerent que il leust fait retorner mais il ne venoit mie. Et quant le soudan fu venu plus avant le maistre manda .i. autre mesage de grant aparance: si fu frere Reddeceur frere chevalier espaignol et lor fist saver coument le soudan venoit; et a tout se furent il entre .ii. dou creire ou non et toute fois ordenerent lor fait et Reddeceur revint a Acre et le soudan vint devant Triple et mon seignor Aumaury de Lezingniau frere dou roy Henry roy de Jerusalem et de Chipre quy sapelet seignor de Sur et counestable dou royaume de Jerusalem vint a Triple et mena belle gent darmes chevaliers et autres et y vint le mareschau dou Temple frere Jofrey de Vendac et frere Piere de Moncade coumandour dacre et frere Reddeceur et plussors freres de lospitau et plussors chevaliers et sergans dou roy de France et avoit des Jeneves .iiii. gualees et .ii. de Venesiens quy vindrent puisses et Pisans y vindrent asses quy estoient henemis des Jeneves et de siaus de Triple de quey se failly poi que il nen y ot entre yaus .i. mavais haitin et meismes Ospitaliers avoient grosse volente a siaus de Triple pour la guerre que il avoyent eu. Quant il teneent Nefin ensement y avoit .iii. grans dames: il avoit la feme dou prince et ma dame de Sur la feme qui fu de mon seignor Johan de Monfort seignor dou Toron quy avoit tenu le baillage de Triple come le plus prochain hair aparant tant que ma dame Lucie fu venue et estoit meymes la terre mout puplee et plaine de mout bones gens chevaliers et bourgeis et dautres gens.

475. Le soudan Melec el Mensour asega la cite de Triple le jour dou jeusdy a .xvii. jours dou mois de mars dou dit an et toute seste gent que je vos ais devant nomes si vindrent a secoure la aucuns avant que elle fu asegee et autres apres.

476. Le soudan dresa ses engins et grans et petis et fist son bucher par devant la ville et ses carabohas et sailly la terre et fist ses mines desous terre et vint dedens les premiers foces.

477. La site fu mout forte et de fors murs masones mais le soudan si la fist asailir et charger par le plus faible leuc quy fust en la ville ce fu la Tour dou vesque qui estoit veille durement et tant y ferirent les engins quelle fu toute depessee et ensement la Tour de lospitau quy estoit forte et neuve; si fu meymes si fendue que chevau peust paser par my. Le soudan avoit si grant gent que en chascune archere estoit ordene de traire .xx. archers sarazins si que nul de nos abalestriers nen ozet mostrer leul pour traire darc ni dabalestre et sil aloit pour trayre si estoit tantost feru; si que la ville estoit en mout mal condicion et par my tout se les marchans venesiens quy avoient la les .ii. gualees si recuillirent pour aler en Ermenie pour ce que il virent que la terre estoit sur prendre. Et quant Beneit vi que Venesiens estoient recuillis si se douta quy ne le preissent ses gualees et le layssasent en terre luy et sa gent si nen avereent ou recuillir au bezoing et poreent estre perdus et pour ceste doute si se recully luy et sa gent sur ses gualees et adons sapersurent Sarazins que il avoit poy de defendeors et la hasterent tant que au derain la vylle fu si afeblie que a un asaut la prirent Sarains a .xxvi. jours dou mois davril dou dit an et fu par faute de defendeors que lun pour lautre guerpi sa defence et eschaperent les .iii. dames que je vos nomay la feme dou prince et la seur dou prince ma dame Lusie et la dame de Sur feme quy fu de messire Johan de Monfort et tous les grans seignors que je vos nomeray: messire Aumaury frere dou roy Henry qui sapeloit seignor de Sur porce que le roy puis la mort de messire Johan de Monfort et de messire Anfrey son frere le roy Henry douna Sur a sestu sien frere messire Aumaury et le fist counestable dou royaume de Jerusalem; et eschapa ausi le mareschau dou Temple et le comandour de lospitau frere Mahe de Clermont et messire Johan de Grill chevetaine des gens dou roy de France et seneschau dou royaume de Jerusalem. Tous ses que je vos ays nomes se recuillirent povre gent et entre les quels fu mort messire Bertheleme de Giblet maire et chevetaine messire Henry de Giblet eschapa et morut en la bataille frere Piere de Moncade coumandour dou Temple et Guilerme de Cardone frere dou Temple et fu pris vif frere Reddecuer et frere Huguet fis dou conte de Dampierre frere dou Temple et meymes furent mort et pris aucuns freres de lospitau de Saint Johan.

478. Et enssi avint seste grant mesaventure de la site de Triple con je vos ais dit et le soudan la fist abatre toute a terre que vos ne troveres une soule mayson entiere et ce a este pour achaisson dune ville que Sarazins ont laboure en un leuc quy a nom Montpelerin qui est loins de la mer en sus de Triple mains lune liue et sapele la vile de Triple la neuve.

479. De puis la perte de Triple le roy Henry party de Chipre et vint a Acre .iii. jors apres et ferma la triue de Surie et de Chipre au soudan et le jura le roy au soudan et le soudan au roy; et le soudan au mes daoust tourna en Babiloine et le roy Henry retorna en Chipre a .xxvi. jours de setembre dou dit an et si laissa a Acre a son leuc messire Aumaury seignor de Sur son frere; et ores vos diray la maniere et la rayson coment Acre fu prize des Sarazins.

480. Il avint enssi que pour achaison de la perte de Triple le pape manda .xx. gualees de secours a la site dacre leques gualees furent armes en Veneyze et fu lor capitaine .i. grant home de Veneyze quy se noumoit Lescople quy fu fis dou duc de Veneyse sire Lorens Toupie quy mors estoit et il vint .i. chevalier grant vavasour quy ot nom Lerous de Souly et se cruyserent et vindrent a Acre mout de menues gens ditaille et estant ceste gent a Acre la triue que le roy avoit fait au soudan se maintenoit bien entre les .ii. parties et les povres vilains Sarazins entreent a Acre et porteent les biens a vendre si com il avoient use a faire. Si avint .i. jour par leuvre de lennemy dinfer que volentiers porchasse males heuvres entre bones gens fist enssy que ses cruysses qui estoient venus pour bien faire et pour larme dyaus au secours de la site dacre si vindrent assa destrussion car il coururent .i. jor par la terre dacre et mirent a lespee tous les povres vilains qui porteent les biens a Acre a vendre et forment et autres choses quy estoient Sarazins des cazaus dou pourpris dacre et ausi meimes tuerent pluissors Suriens qui porteent barbes et estoient de la ley de Gresse que pour lor barbes les tuerent en change de Sarazins la quele chose fu trop maufaite et ce fu la chose por coy a Acre fu prise de Sarazins con vos entenderes.

481. Quant le vilains furent mors si com vos aves oy la novele fu dite au soudan en Babiloine le quel en fu mout courouse et menassa mout la gent dacre et meismes si ly fu porte les chemizes banies de sanc de siaus quy furent mors et ja soit se que le soudan eut eu propres de grever la site dacre toute fois il manda ses messages as seignors dacre coument il avoit trove as crestiens et que sur triue lon li avoit fait et tue ses gens vilains Sarazins et requeroit lamende et la justize de siaus qui avoient se fait. Les seignors dacre furent sur ce fait au conseil et entre plusours paroles dites entre yaus mon seignor le maistre dou Temple consillya que lon preist de tous les prisoniers de la prison reau et dou Temple et de lospitau et des Pizans et Venessiens siaus quy devoient morir pour les malefaites et dire que ses estoient siaus quy avoient route la triue et tue tous les vilains Sarazins et ensy se tera a paye le soudan et le debouterons de nos grever par ceste justize que lon fera de ses puis que il deveent morir. De seste chose furent aucuns que si acorderent mais pluisors autres ne sen acorderent mye et remest la chose que riens ne se fist; et firent respons au soudan si com il lor sembla a faire; mais celon se que je peus entendre il manderent dire au soudan que ses cruysses qui avoient se fait estoient gens estrangiers doutremer et non pas de lor justize as quels il ne lor pooient metre main de sus; de quei le soudan se tint mal a paye et atira son fait et ses engins et acrut son host de gens darmes asses et fist aparellier les cames par la Berrie pour son passer cest asaver les plasses et les viandes et manda .i. sien amyraill quy ot nom Tocso as parties dacre quy demoura .iiii. mes entre Chastiau Pelerin et Sezaire et firent tailyer buche de quey il deveent faire lor buhcher ausi come guarides contre la site dacre et disoit que ceste buche devoit aler en Babiloine por se que crestiens ne saparseussent; et de dens se emir Salah amirail quy estoit amy dou maistre dou Temple fist asaver au dit maistre que le soudan en toutes manyeres devoit venir aseger Acre dont le maistre dou Temple le fist asaver a tous les seignors dacre et ne le vostrent croire.

482. Et quant il vint en lan de lincarnassion de Nostre Seignor Jehsu Crist .m. et .cc. et .xc. au mois de huitovre le soudan parti de Babiloine Melec el Mensour et vint a tout son poier en .i. leuc qui se dit la Salahie de quei il morut et lachaison de sa mort je la vos devizerais en ce livre.

483. Cestu soudan si avet noury .i. garson qui estoit turc et tant lavansa que apres le soudan nen avoit nul en painime quy fust plus puissant de luy et avoit nom Turentay. Or fu dit que par sa grant puissance il monta a si grant orguell quy cuida estre soudan se le soudan moreit; et pour ce il fist tant que il enpouzouna le soudan et maniere que il en fu aperseu; et quant le soudan vint a mort il fist venir son aihne fis et li dist coment il moreit et que il ly enchargoit et prioit de parfaire lenprize que il avoit enpris daler prendre Acre et vengier le sanc des Sarazins qui furent tues. Le fis ly promist; et apres ly pria de faire morir Turentay par se que il lavoit mort par poissons; le fis tint tout se que le pere li encharga si com vos lentendres.

484. Le soudan sur ce morut et fut enteres et tantost cele nuit fist prendre sestu Turentay et le fist estrendre devant luy a revers les mains fort lies et li monta a genoulls sur le pis et de ses mains meymes li aracha la barbe et ly dist: Dehliau tu as tue mon pere et je te feray morir. Et puis le fist prendre et tuer et desmembrer sans sepulture dont aucuns distrent que il gehi coment que il enpoussona le soudan; mans coument que ce fu il morut enssy. Lost de Babiloine ne se mut de la ou il estoit hors de Babiloine et le soudan novyau fis de cestu quy fu mort qui se fist apeler Melec el Esseraf vy lost aparaillie et les cames par les chemins et se mist a venir a Acre a mout grant gent a chevau et a pie; et dit lon que il furent plus de .lxxm. homes a chevau et gens a pie plus de .c. et .lm. et plus. A Acre nen avoit de tout entre femes et homes et enfans que de .xxx. a .lxm. des quels estoient a chevau de .viic. a .viiic. et a pie a conter les cruisses avoit entour de .xiiiim.

485. Syaus dacre quant il oirent que le soudan Melec el Mensour estoit mort con vos aves oy si orent grant joie et cuyderent estre delyvres mais ne penseent pas que cestu autre soudan Melec el Esseraf deust au premier an de sa seignorie si tost chevaucher en ost et por se dounerent grant merveilles et satirerent de sa venue dengins et dautres choses que mestier lor fu et garnirent bien leur garides et y comencerent a faire lor guais si come lon doit faire quant lon a henemy et ordenerent un mesage tous siaus dacre et present qui ly manderent. Et furent les mesages messire Phelippe Mainebeuf chevalier dacre quy savoit mout bien le lenguage sarazine et .i. frere dou Temple chevalier quy ot nom frere Berthelome Pizan et estoit nes de Chipre et .i. frere de lospitau et .i. escrivain quy ot nom Jorge; et furent devant le soudan quy refuza les letres et le present et retint les mesages en prison con se soit chose que avant se que les mesages furent mandes au soudan le soudan manda letres au maistre dou Temple qui furent encontre escrites de letres sarazinezes en letres fransezes escrites de ma main le quel contre escrit je portay et mostray a mon seignor le maistre et a tous les seignors dacre cest asaver au patriarche et leguat et au maistre de lospitau frere Johan de Villiers et au coumandour des Alemans car lor maistre estoit partis outre le gre des seignors dacre et ala en Poille demourer et le mostray au consele de Pize et au baill de Veneize que nul ne vost asertefier que le soudan venist tant que se fust bien aproche et que siaus dacre le manderent lor mesages con vos laves oy.

486. Or vous vyaus mostrer la tenor de la dite letre que le soudan manda au dit maistre dou Temple: si pores savoir en quel guyze est devizee le salus que le soudan manda en ses letres quy devizeent ensy:

487. Le soudan des soudans le roy de roys le seignor des seignors Melec el Esseraf le puyssant le redoute le chasteours de rebels le chasseour des Frans et des Tatars et des Ermins aracheour des chastiaus des mains des mescreans seignor des .ii. mers serveour des .ii. sains pelerinage Calohonel et Salahie a vous le maistre noble maistre dou Temple le veritable et sage salus et nostre boune volente. Pour ce que vos aves este home veritable si vous mandons letres de nostre volente et vos faisons asaver que nous venons en vos parties por amender les tors fais pour quey nos ne volons que la comunaute dacre nous dee mander letres ny prezent car nos ne le resevons point.

488. Et tel fu le mandement et la tenour de la dite letre dou soudan con vous aves oy mais ja pour ce ne laisserent de mander leur mesages si con je le vos ay dit le quels furent arestes et mandes en prison en Babiloine la ou il moururent de puis a grant mesaize.

489. Le soudan vint devant Acre et lasega par .i. jeusdy a .v. dours davril en lan de .m. et .cc. et .xci. de lincarnasion de Crist et la prist a .xviii. dours dou mois de may prochain venant dou dit an; ores entenderes coument il avint.

490. Le soudan si fist fermer ses tentes et ses pavellions mout pres lun de lautre quy tenoient dou Toron alant jusques vers la Semerrie que tout le plain fu couvert de tentes; et la tente dou soudan quy sapele dehlis estoit sur .i. toron hautet la ou ele avoit une bele tour et jardins et vignes dou Temple lequel dehlis estoit tout vermeill et une porte overte vers la site dacre et est ensy huze des soudans que vers la ou la porte dou dehlis est overte chascun seit que le soudan doit aler par sel chemin; .viii. jours demoura devant Acre sans riens faire fors aucune fois avoit aucun hutin de nos gens a la leur quy aucuns en moroit dune part et dautre; et a terme de ses .viii. jours adreserent et aseirent au point lor engins que la piere quy getoit pezoit un quintar. Lun de ses engins quy avoit nom Haveben quy vient a dire yrious si estoit devers la garde dou Temple et lautre engin quy getet contre la garde des Pizans avoit nom le Mensour ce est a dire le victorieus et lautre grant que je ne vos le say nomer getoit contre la garde de lospitau et le cart engin getoit contre une grant tour quy a nom la Tour maudite qui est a segons murs et est de la garde dou roy.

491. Il mirent escus grans et escus fais de verges la premiere nut renges contre nos murs et la segonde nut les acosterent plus avant et la tierce nut aussi les acosterent et tant les acosterent que il vindrent sur la douve dou foce et deriere les dis escus avoit les gens darmes desendus de lor chevaus en terre et larc en la main et se lon vozist dire coment lon les laysoit aprocher tant avant lon ne les poiet defendre et vos diray pour coy: seste gent avoient lor gent a chevau tous armes a chevaus covers de lun chef de la site jusques a lautre qui est a entendre de lune mer jusques a lautre et estoient ses plus de .xvm. et se changeent .iiii. changes le jour si quy lor venoit poy de travaill et se nul de nos gens fussent yssus a siaus quy estoient deriere les escus ses quy lor estoient ariere dos il les eussent secourrus et defendus con se soit chose que aucune fois nyssirent nos gens a yaus dont ses a chevau les defendeent si que en la fin vindrent sur la douve dou foce con je vos ais dit et porteent siaus a chevau la buche chascun sur le col de son chevau a .iiii. et a .v. les busches et les jeteent deriere les escus que quant veneit la nuit si les meteent par devant lor escus et lyeent une corde par desus et deveneit come .i. mur que .i. engin ni eust riens fait car aucuns de nos meens engins lanseent et fereent de sus et ne faizeent riens a yaus mais reboutoit la piere au foce; et apres dreserent lor carabouhas quy sont engins petis turqueis quy se tirent as mains et geteent mout souvent et faizoient plus de maus a la gent que les grans engins que le leuc ou le carabouha lanset nul nen ozet acoster et par devant lor carabouha avoient fait dehauchee bien fort et si haut que nul ni poiet ferir ni lanser a siaus quy le tireent; et ensi dura seste besoine tant come il mineent car .i. grant amiraill qui ot nom Lesgay si estoit ordene contre une tourete neuve as premiers murs devant la Tour maudite quy se disoit la Tor dou roy. Cestu Elesgay fist miner contre sele dite tor et ausy minerent .i. baril qui se disoit le baril dou roy et lapuerent tout dont nostre gent mirent le feu et le firent chayr tout en .i. mont; et meymes firent un autre mine les Sarazins contre la Tour de la contesse de Blois que elle fist faire quant elle vint de sa mer por larme delle et nos gens lor faisoient mynes encontre et se defendeent vigourouzement; mais Sarazins veneent tous jors gens fres por se que il estoient grant gent. Et quant vint .i. jour nostre gent furent au conseill de nissir de toutes pars a chevau et a pie et ardre le buscher si avint que mon seignor le maistre dou Temple et sa gent et messire Johan de Granson et autres chevaliers vinrent une nuit devers la partie dou Temple qui estoit a lutremer de la Porte de Saint Ladre et ordena le maistre .i. provensau quy estoit visconte dou Bort a Acre de metre le feuc a buhcher dou grant engin dou soudan et nissirent celle nuit et furent jusques au dit buhcher et seluy qui dut geter le feuc et le geta sur paour en tel maniere quy vint court et chay a terre et alumet sur terre. Tous siaus Sarazins quy la se troverent furent tous mors gens a chevau et a pie et de nostre gent freres et chevaliers dou siecle alerent sy avant entre les paveillons que lor chevaus senconbrerent as jambes des cordes des tentes et trabucheent et adons les Sarazins les tueent et en tel maniere perdimes sele nuit .xviii. homes a chevau freres dou Temple et chevaliers dou siecle mais lon prist pluzours escus et targes sarazinezes et trombes et nacares; et retorna mon seignor et sa gent a Acre. Entrevees lon trova pluisours Sarazins enbusches que lon les ocist tous car la lune luyseit come le jour et pour ce les vi lon si bien; et tant vous dis quen seluy leu si fu le seignor de Haman quy se ralia o sa gent et nos vint acostant par le Sabelon as piles quy traioient a nostre gent et nafrerent aucuns et nen ozerent enveir nos gens; et saches que il estoient un grant parsemblant de .iim. persounes a chevau mais nostre gent nen estoient de gens chevaliers et autres et freres et vales et tricoples .iiic. et en les autres leus quy fu ordene ensi a faire ne fu rien fait car Sarazins sen aparsurent et sen prirent garde car il chargerent crestiens si fort que il tornerent sans riens faire.

492. Encores fu ordene que tous les seignors et le poier dacre a chevau deussent yssir a demy nut de la Porte Saint Antoine et ferir subitement sur les Sarazins et fu ce fait ordene si priveement que nul ne le sot tant que lon coumanda montes a chevau et quant nos gens furent montes et yssus hors de la Porte de Saint Anthoine et la lune a sele oure nen rayeit mie ains esteit mout escure et Sarazins furent avertis et firent .i. si grant luminaire de fanons quy sembloit estre jour entre yaus et se vindrent sur nostre gent une si grant eschelle ou il y eut bien .xm. et chargerent nostre gent si durement de piles traire qui sembloit que ce fust pleve de quei nostre gent ne le porent endurer et repairerent dedens la site et si ot gens a chevau blesies plussors. En tel doulour et en tel condession estoient nostre gent a la site dacre et ja se disoient noveles que le roy Henry devet venir de Chipre a bon secours quil amenoit et lon latendoit de jour en jour.

493. Le roy avoit semons sa gent en Chipre et les asembla et se party de Famagouste et ariva a Acre a .iiii. jours de may; la vylle estoit en mauvais point car si con je vos ais dit le bail fu mene et estoit cheu de la tour qui estoit minee mais toute fois fu grant confort a la gent sa venue et sur ce que le roy vint apres poy de jors manderent mesages au soudan messire Guillaume de Villyer chevalier et .i. home de la maihnee dou maistre dou Temple Guillaume de Cafrane et le soudan vint de son dehlit par devant la porte de la ville qui disoit lon Porte dou leguat et fu defendu dune part et dautre de non traire. Les messages nyssirent desarmes et furent par devant le soudan quy estoit dedens .i. petit pavillion et tant tost con les mesages leurent salue a genoullons par .iii. fois si les aprocha vers luy et lor dist: Maves vous porte les cles de la Ville. Et les mesages respondirent que ce nestoit mie site que se doit rendre de ligier et que il venoient a luy por ly requerre aucune manyere de pitie pour le povre peuple et adons le soudan lor dist: Je vos feray tant de grace que vous me vudes les pieres soulement et enportes tout lautre et ysses et ales vos ent et se vous fai ge pour vostre roy qui est venu et qui est enfant si con je sus et autre chosse je ne vos feray. Et les mesages adons ly distrent que se ne poiet estre car la gent doutremer nos tereent a traytours et il dist: Donc vos en ales que je ne vos feray autre. Et sur ses paroles .i. engin estoit que les crusses governerent a la Porte dou leguat et ne say par quel aventure il traist et vint la piere si pres dou paveillon ou le soudan estoit et les messages que le soudan par bachelerie non volant maufaire si se leva en pies et mist sa main sur sespee et traist bien une paume et dist: A pors punais quy me tient que je ne vos taille les testes. Et Lesejay si ly dist: Sire Dieu nos en gart de soulier le fer de vostre espee au sanc des pors car siaus quy ont trait si ont fait que traytours mais vos les laires aler com siaus quy sont vos remanans. Et sen tournerent les mesages a Acre et comensierent puis lor labour de traire les uns as autres de manguenyaus et de se qui lavoient uze au faire come henemis.

494. La tour neuve que lon disoit la Tour dou roy si fu si menee que la frontiere devant chey en .i. mont par dedens le foce si que par de sus les pieres ne se poyeent passer dont les Sarazins firent saques petis de chanevaus plains de sablon et chascun home a chevau porta .i. sac sur le col de sa beste et le geta a Sarazins dou buscher quy estoient la en sel endroit; et quant vint la nut siaus prirent les sacques et les estendirent sur les pierres et planerent coumun pauvement et lendemain le mecredy a vespres passerent sur les sacs et prirent la dite tour quy avoit encore la moytie de la vote entiere devers la ville tout en pies et furent nostre gent main a defendre la tour et ne valut rien la defence que il la prirent; et myrent lenseigne dou soudan si que nos atorsames les engins et escandelyames a lanser a la tour; et lanserent et aucun tuerent ny ja pour ce ne la guerpirent et nostre gent quant il virent la dite tour prise se labourerent vendifiement de marain encure quy sapelle chat et mirent gens par dedens que siaus Sarazins quy avoient pris la tour ne peussent passer avant.

495. Cant la tour fu enssi prisse con je vos devisse la gent furent mout esmaies et tout le plus monterent lor femes et leur anfans sur mer et quant vint lendemain le jeusdy il fist un mout mautens et fu la mer si grose que les femes et les anfans qui estoient montes aus vaussiaus ne le porent soufrir et desendirent en terre et tournerent en lor mayssons.

496. Et quant vint le jour dou vendredy avant jour une nacare souna mout fort et a son de selle nacare quy avoit mout oryble vois et mout grant les Sarazins asaillierent la cite dacre de toutes pars et le leuc dont il entrerent premier si fu par ceste maleite tour que il avoient prise et vos diray la maniere coument il veneent.

497. Il vindrent tous a pie quy furent tant sans nonbre; et par devant veneent seaus quy porteent grans targes hautes et apres veneent seaus quy jeteent le feuc gryzes et apres estoient siaus qui trayoient les piles et seetes enpenees si espessement quy senbloit pleve quy venist dou siel et nostre gent quy estoient dedens le chat labandonerent. Sur se ses Sarazins que je vos dis prirent .ii. vees puis que il furent entre les .ii. murs de la vylle cest a entendre entre les premiers murs et foces quy se dizoit la barbaquane et entre les grans murs et les foces de la site: dont les uns entrerent par une porte dune grant tour quy se disoit la Tour maudite et alerent vers Saint Romano la ou les Pizans avoient lor grant engins; les autres en tindrent lor chemin alant a la Porte de Saint Antoine.

498. Le maistre dou Temple quy estoit assa herberge et son couvent qui estoit a lor defence si com il senty la nacare souner sil sembla que Sarazins douneent aucun asaut et prist .x. ou .xii. freres et sa mehnee et vint vers la Porte de Saint Antoine tout par entre les .ii. murs et passa par la garde de lospitale et mena le maistre de lospitau o luy lequel mena aucuns de ses freres o luy; et vindrent a la Porte de Saint Antoine et troverent ses Sarazins venant a pie: satirerent a yaus et riens ne valut si con je vos ais devise et aucuns chevaliers de Chipre et de la terre et sergans a pie car Sarazins furent trop de gens. Et quant les .ii. maistres dou Temple et de lospitau furent venus la si poindans sur eaus si sembloit ferir sur .i. mur de piere; et siaus quy getoient le feuc grizes le getoient en si souvent et si espes que la fumee estoit si grant que lon ne veoit lautre a grant poine; et par my la fumee les archiers trayeent espessement les piles enpenees qui bleseent nostre gent et nos bestes trop malement. Et avint que par le feuc quil getoient fu pris dou feuc .i. povre valet engles si malement que son suvreseigniau fu alume qui not nul quy le secourust que il ot ars la chere et puis tout son cors et alumet ausi con se fust .i. chauderon de puis et la morut; et quant se le avint il estoit a pie que sa beste li fu tuee de sous luy. Et quant Sarazins avoient en poy demoure si leveent lor escus et passerent .i. poy avant et quant on lor pounoit de sus et il encaleent tantost lor escus et aresteent; et tout jour le jeter dou feuc et des piles ne sesoit de labourer et demoura seste ryote et sestu huitein jusques a tierce et en ce my leuc avint une grant mesaventure par laquele ses Sarazins qui si entroyent que je vos dis entrerent plus legierement et que toute la gent furent mescourages: lachaison si fu que .i. pilet vint vers le maistre dou Temple et au lever que le maistre fist de sa main senestre et nen avoit point descu fors son dart a sa mayn destre; asel pilet le fery sous laselle et li entra une paume de canne dedens le cors quant il vint au vent la ou les plates ne joinent point car ses ne furent mye ses curasses fiables ains furent curasse legiere darmer ligierement a .i. cry. Et quant il se senty feru au mort si se mist a aler et lon cuyda que il sen alast volentiers pour suy sauver; et celuy dou confanon le vy aler si se mist aler devant luy et adons toute sa mehnee le seguyrent et ensi come il sen aloit bien .xx. des crusses do Val despolite li vindrent au devant et ly distrent: A pour Dieu sire ne vous partes car la ville sera tant tost perdue. Et il lor respondy hautement que chascun loy: Seignors je ne peus plus car je suy mort; vees le cop. Et adons veyme nos le pilet clave en son cors; et sur cele parole il jeta le dart en terre et torsa le col et vost chair de la beste mais sa mehnee saillirent jus de lor bestes et le soustindrent et le deschevaucherent et le myrent sur .i. escu quy troverent la jete quy estoit pauves grant et lonc et le porterent a entrer par la Porte de Saint Antoigne et la troverent cloze et troverent une petite porte quy avoit .i. pont alant sur le foce en lostel de damoysele Marie quy jadis fu de messire Jaque de La Mandelee et la le desarmerent sa mehnee et ly taillerent les curases sur les espaules car autrement ne se post faire pour le cop que il avoit et puis atout ses espaulieres le mirent dedens un covertour et le porterent vers la marine cest asaver en la splage qui est entre la boucherie ou lon tueit les bestes et la mayson quy fu dou seignor de Sur. Et la aucun cry vint dever la Tor dou leguat que il esteent les Sarazins si que aucuns de sa mehnee se mirent en la mer pour avenir a .ii. barques quy estoient la que plus nen y avoit car la mer estoit si malement tempestouze et si grant ondes que barche ni poiet durer et pour ce furent mout de gens perdus; et aucuns autres de la maihnee dou maistre le porterent au Temple par laide dautre gent et le mirent par dedens la maizon non pas par la force qui ne voloient ovrir mais par un leuc le mirent dune court ou il getoient le fumier et vesquy tout seluy jour sans parler car puis que lon le mist de son chevau jus il ne parla fors une parole soule au Temple quy senty le brut de la gent quy foueent de la mort et demanda que se estoit et lon ly dist que gent se mehleyent et coumanda que lon le mist en pais et depuis ne parla et rendy larme a Dieu et fu entere par devant son tabernacle quy estoit lautier ou lon chantoit messe et Dieu ait larme de luy que grant damage fu de sa mort.

499. Or vous diray que avint puis quy fu feru: quant chascun sot de se quy fu feru et le vyrent porter si se mirent abandoneement a fouir chascun car Sarazins quy pasoient con je vos ai dit par la Tour maudite et alerent droit par Saint Romano et mirent le feuc o grant engin des Pizans et se mirent par la droite rue a aler as Alemans et prirent Saint Linart et mirent a lespee quanquil troverent devant siaus; et autres Sarazins conbatirent a la Tour dou leguat quy est sur mer et leverent les Sarazins dou fons de la mer au pie de la tour un trelis quy avoit cloees les pointes contre mont par se que chevaus ni poissent paser. Adons entrerent grant gent a chevau Sarazins se que messire Johan de Grill et messire Ote de Gualanson et la gent dou roy de France firent grant defence de quey il y ot ases nafres et mors; et messire Johan de Grely et messire Ote de Gualanson ne porent plus soufrir le charge des Sarazins et se despartirent dou leuc et se sauverent et fu messire Johan de Grely nafre.

500. Le roy Henry de Jerusalem et de Chipre quant il vy seste meschanse si vint au maistre de lospitau et vyrent bien que nul conseil ny secours ne valloit plus: si se saverent et monterent es gualees.

501. Saches que seluy jour fu oryble a veyr car les dames et les bourgoizes et damoizelles furent restondues et autre menue gens aloyent fouyant par les rues lor enfans en lor bras et estoient ploureuzes et esperdues et fouyeent as marines pour yaus guartetir de mort; et quant Sarazins les encontreent lon pernoit la mere et lautre lanfant et les portoient de leuc en leuc et les departoient lun de lautre et tel fes estoit que il estoient en tenson lun Sarazin et lautre pour la feme que elle estoit tuee par yaus; et aucunes fois estoit que la feme estoit enmenee et lanfant alaitant en estoit gete a terre que chevaus le fouloient et ensy estoient mors; et de tel dames aveent qui estoient groses et estoient si dreites en la presse quy moroient estaintes et la creature qui estoit en son cors aussi et teles avoit que son baron ou son enfant estoit malade au trait a lostel ou nafre quy le laisoient soul et sen fouoient et Sarazins les osioent tout. Se saches que Sarazins mirent le feuc as engins et as guardes que toute la terre alumerent de feuc; la plus grant partie de la gent homes et femes et enfans se mirent dedens le Temple et furent plus de .xm. persounes car le Temple estoit le plus fort leuc de la ville et estoit sur mer en grant leuc com .i. chastiau car il aveent sur lentree une haute tour et fort que le mur estoit espes massis .xxviii. pies et sur chascun canton de la tor avoit une tourete et de sur chascune des touretes avoit .i. lion passant grant come .i. buef de laton dore quy cousterent les .iiii. lions et lor et le labour .m. et .vc. bezans sarazinas et estoit une grant noblece a veir; et en lautre canton de vers la Rue de Pize et avoit une autre tour et de pres sele tour sur la Rue Sainte Anne avoit .i. mout noble palais qui estoit dou maistre et en la avant sur la maysson des nonains de Saint Anne avoit une autre tour haute ou estoit canapes et mout noble yglise et haute et si avoit une autre tour sur la mer mout ansiene que Salahdin lavoit faite .c. ans avoit en quei le Temple tenoit son trezor et estoit si sur la mer que les ondes y batoient; et autres biaus maners avoit dedens le Temple mout nobles de quey je ne fais mension ores.

502. Lospitau de Saint Johan estoit bien herberges des tours et de biaus palais asses mais il estoit au myleuc de la cite; et avoit .i. autre leuc quy sapeloit la Herberge en quei avoit .i. mout noble plasse mout longue et mout belle quy tenoit de longesse .c. et .l. canes et avoit mout grant propris de court; et la fu fait la feste dou courounement dou roy Henry si con vos aves oy devizer et yquei herbergoit le mareschau et le covent de lospitau.

503. Les Alemans avoient ausi mout bel hostel et mout noble tour quy estoit si groce et si belle come cele dou Temple et les Pizans et Venesiens estoient mout bien herberges de tours et de palaiss et dautres nobles maysons de chevaliers et de bourgois estoit la site plaine et bien fournie et verayement il avoit .i. chastiau grant et biau mais nen y avoit point de foces si ne fust dune part devers le bourc. Je ne vos viaus plus devizer mais elle est des belles et des nobles cites dou monde de son grant; et si estoit port et rivage de tous les gens quy veneent en Surie et fu grant damage de sa perdecion et ores viaus tourner a parfaire ma matiere. Toute la gent porent avenir au Temple; si se mirent layens; et le roy et tous les autres quy estoient reculis as guallees et as vaussiaus sy se partirent et firent velle et les tarides et naves de la caravane de Veneise se partirent ausi et le bon proudome patriarche et leguat frere Nicole si se recully sur une nave de Venessiens et .i. marenier le prist par la main et il eschapa et chay en mer et fu nee. Or ne sait on pas si celuy qui le prist par la main le layssast aler pour ce que il avoit mis en sele nave son aver ou se il ly eschapa de main pour ce que il ne le post tenir; mais en quel que maniere que ce fust le predome morut nee si con je vos dis. Et quant tous ses leins firent velles tous en une fes ensemble siaus dou Temple qui la sestoient recullis jeterent .i. mout haut cry et se partirent les vasiaus et alerent en Chipre et furent deguerpis la boune gent quy dedens le Temple cesteent mis come vos aves oy et saches que il y avoit .vi. leins armes de liglise et ... guallees dou roy et .ii. guallees de Jeneves quy firent mout de bien com chascun le fait car il recuyllirent les gens de la mer et les meteent sur les naves et sur les autres leins et estoit sur ces .ii. guallees .i. Jeneves quy avoit non Andre Peleau.

504. Or vous diray de la site de Sur qui estoit une des fortes cites dou monde: il avoit .i. bail en leuc dou roy qui avoit nom messire Adan de Cafran que sy tost come il vy les vassiaus a vele quy estoient partis dacre si vuda et abandonna la site de Sur et tous les autres chevaliers et riches gens; et les povres gens chaitis demourerent homes et femes et anfans que nen avoyent vaussiau ou recullir.

505. Or vous dyrons des gens quy estoient dedens le Temple: il y avoit le mareschau frere Piere de Sevry et freres dou Temple aucuns et aucuns autres freres quy gezoient layens nafres et chevaliers dou siecle aucuns et dames et bourgoizes et autres gens ases. Celuy jour quy se recuillirent layens vint au Temple frere Mahe de Clermont mareschau dou lospitau de Saint Johan et vy le maistre dou Temple quy estoit mort con je vos ay dit et retourna a la bataille et mena o luy tous ses freres que nul ne le vost abandoner et aucuns freres dou Temple y alerent et vyndrent en la place de la rue quy fu des Jeneves quy estoit place vude de maysons et la se conbaty vigourouzement le dit frere Mahe qui estoit maureschau au jour de lospitau et osist luy et ses compagnons mout de Sarazins et en la fin il fu mort luy et les autres come chevaliers preus et hardis bons crestiens et Dieus ait larme de yaus.

506. Saches biau seignors nul ne porroit dire ni conter le plour et la doulour quy fu seluy jour et la pitie des petis esfondres et esboucles des chevaus quy lor passent desus ni est home au monde que bien eust du ceur quy nen plourast a veir selle justize et pour ce su ge sertain que tout gent crestiens ploureent sel jor quy se virent car Sarazins si come lon a seu avoient eu depuis pite et ploureent.

507. Le Temple se tint .x. jours et le soudan fist parler a siaus quy estoient au Temple sil se voloyent rendre a fiance a yaus et li manderent dire quil se renderoient par enssy quy les feyssent condure a savete la ou il voreent aler; et le soudan lor manda otroyer et si manda layens au Temple .i. amirail quy mena o luy .iiiic. homes a chevau dedens le Temple: il vyrent tant de gent et de peuple et voleent prendre les femes quy plaiseent et ahontir si que les crestiens ne le porent soufrir et mirent main as armes et coururent sus as Sarazins et tous les tuerent et decoperent que nul nen eschapa vif et se mirent en volente de defendre lor cors jusques a la mort mais le soudan qui fu mout courouse de ce fait si ne mostra nul semblant et lor manda une autre fes que il savoit bien que par la folie de ses homes furent il mors et por lor otrage et que il ne lor savoit nul maugre et poieent issir seurement a fiance. Le mareschau dou Temple quy fu mout proudome bourgognon et avoit nom frere Piere de Sevry et autre fois le vos ais nome si eut foy au dit soudan et nissi a luy et demourerent a la tour aucuns freres quy estoient nafres.

508. Tant tost come le soudan tint le mareschau et les gens dou Temple et fist taillier les testes a tous les freres et les homes trestous; et quant les freres quy estoient dedens la tour quy nestoient mye si malades quy ne se peussent bien ayder oirent dire que le maureschau et les autres eurent les testes taillyes si se mirent en defence dont les Sarazins se myrent a miner la tour et la minerent et estancelerent et adons siaus dedens la tor se rendirent. Et les Sarazins entrerent tant de gens dedens la tour que les estansons quy le sousteneent faillirent et la dite tour chay et siaus freres dou Temple et les Sarazins quy dedens estoyent furent mors et meysmes au chair de la tour elle versa vers la rue et esckaka plus de .iim. Turs a chevau. Et enssi fu prise et delivre la dite site dacre le jour dou veredy a .xviii. jours de may dou dit an et la maison dou Temple .x. jours apres tout en la maniere que je vous ais devyse.

509. Or vos diray de la ville de Seete quy estoit dou Temple. Le grant coumandour de la terre quant il vy le maistre Guillerme de Biaujeu quy fu mort et il y a aucuns freres qui estoient eschapes as vausiaus quil alerent droit a Seete et se mirent dedens le chastiau de mer et troverent toute la gent quy estoient montes en une yhle en quey a .i. molin. Cestu coumandour de la terre quy se fist maistre dou Temple par lehlasion des freres que il avoit o luy et dedens; se manda le soudan un sien amiraill le Segay qui asega le dit chasteau de mer dengins et de se que il les post grever si les greva et prist la ville de Sayete quy les abitans avoient abandonnee et estoient montes a lihle et de lihle alerent en Chipre.

510. Le maistre novyau si avoit nom frere Tibaut Gaudy; si se vy assailly et pensa que a son comensement il ne abandoneroit mye le chastiau et eu conseil a ses freres et par lor volente proumetant leur quy lor manderoit secours et sen ala en Chipre; et quant il fu en Chipre se porta lahchement de mander lor secours dont il avint que les freres dou Temple quy estoient en Chipre amis des freres quy estoient a Sayete si lor manderent dire quy pensasent de tout abandouner car le maistre ne fayssoit nul semblant de mander lor secours nissum. Et quant siaus freres dou chastiau oyrent se si se furent mout mescorages et de lautre part Sarazins les aveent mout hastes et aveent gete frehches et par de sus sablon quy tenoit de terre de la rive de mer jusques au mur dou chastiau quy veneent par de sus apiestant et secha toute sele mer dont les freres eurent conseill entre yaus dabandoner et aler en Chipre et meysmes il se douterent que Sarazins ne mandassent de la Liche leins armes et ne poreent puisses partir a lor volente et por se une nut se partirent si coyement que Sarazins ne les sentirent point jusques a lendemain au jour.

511. Quant Sayete fu si abandonee con je vos devyse et les Sarazins prirent le chastiau si labatirent en .i. mont et estant le Segay a Sayete siaus de Barut ly manderent mesage et ly manderent quy lor fist asaver ques estoit sa volente ver yaus; et il lor manda quil aveent bone tryue au soudan et que il se tenissent a seur mais que il deussent faire feste de la prisse de Sayete et que quant il passeroit par yaus a laler ver Doumas quy ly venissent a lencontre. Et il le firent ensi que quant le dit Segay se party de Sayete il passa par Barut et nissirent dou chastiau de Barut et ly vindrent a lencontre pour luy henorer et pour ce qui lor avoit ensi mande con vous laves oy; et il come dehleau les fist tous prendre et prist la ville et le chastiau et fist abatre les murs de la ville et puis abatre tout le chastiau a terre.

512. Or saches que siaus dou Chasteau Pelerin quant il virent que tout fu perdu si virent bien que il nen aveent poier de defendre le chastiau; si labandonerent et alerent en lihle de Chipre et Sarazins depuis le firent abatre tout a terre.

513. Ensi con vos poes entendre fu toute la Surie perdue et la prirent et destrurent Sarazins ja soit se que devant furent prizes pluzors leus que je vos ay devizes. Ceste fois fu tout perdu que trestous crestiens ne tindrent .i. paume de terre en Surie.

514. Pres de ceste Surie est une ihle qui a nom Chipre mout riche et bone et bien plaintive de tous biens et a plussors bounes villes en ceste dite ihle que je vous noumeray. La site ou demourerent les chevaliers qui est chef des autres a nom Nicossie et est en ferme terre et lautre quy est sur marine a nom Famagouste et lautre sur marine a nom Limesson et lautre sur marine a nom Bafe et lautre sur marine est chastiau et borc clos de mur si a nom Cherines; et en ferme terre a .iii. chastiaus Dieudamour et Bufevent et la Candare.

515. Ceste ihle si est reaume et en estoit roy et seignor le roy Henry de Lezingniau de quey je vos ay parle dou roy de Jerusalem.

516. En ceste ihle de Chipre se recuillirent la gent quy eschaparent dacre et des autres leus de Surie et la furent a grant povrete et se aucun fu qui eust peu traire dou sien et aporte o luy si valut mains la mite por ce que les choses de vitaille encherirent mout et meismes les maisons qui se leueent a .x. bezans lune le mes monterent a .c. bezans lan et tous lor amis de Chipre les mesconurent ni fayzoient dyaus mension de mite et damiste aucune mais le roy Henry consillia et se fist metre a sodees les povres chevaliers et sergans dont il fist grant amone et grant bien et la rayne establirent et le roy amohnes ordenees a douner a povre gens.

517. Or aves oy coment le reaume de Jerusalem a este tout perdu et ma semble de metre a son livre les nons des sites et chastiaus de la Surie si con je les ay en .i. escrit quy de sus sont noumes.

518. La premiere site si se doit nomer Jerusalem quy est chef de tous les autres; la terre de Naples vous dyray pour ce que elle est pres de Jerusalem et la terre dacre et la terre de Sur et la terre dou Toron et la terre de Jafe et la terre descalone et la terre de Guadre et la terre de Safet et la terre de Sayete et Biaufort et la site de Sezaire et la terre de Bessan et le Crac de Monreal et la terre de Saint Abraham et la terre de Beliem et la terre de Gerycop et la terre de la Blanchegarde et la terre de Saint Jorge et la terre dou Ledde et la terre de Arsur et la terre de Saint Jorge dou Sabast et la terre dou Merle et la terre de Chastiau Pelerin et la terre de Cayfas et la terre de Caymon et la terre de Nazerel et la terre dou conte Joselin et la terre dou chastiau dou roy et Escandelion o sapartenanse et la terre de Belynas et Chastiauneuf et la terre de Barut.

519. Or aves oy les nons des terres et ores vos diray les servizes que chascune terre doit faire au reaume quant il est bezoing de chevaliers et de sergans.

520. A Jerusalem doit chevaliers .xli. et la barounie de la site de Jaffe et Escalone et de Rames et de Mirabiau et Yblin sont .c. chevaliers et la princee de Gualilee sont .c. chevaliers et la seignorie dou Crac de Monreal .lx. chevaliers et la seignorie dou conte Joselin doit .xxiiii. chevaliers et la site de Naples doit .lxxxv. chevaliers et la seignorie dacre doit .lxxx. chevaliers et la seignorie de Sur doit .lxxviii. chevaliers que .vclxviii.

521. Et ores vous diray la cantite des sergans que chascun doit doner de servise: le patriarche de Jerusalem doit sergans .vc. et le chapitle dou Sepulcre doit sergans .vc. et le Safet doit sergans .cl. et la latine doit sergans .c. et le vesque de Thabarie doit sergans .l. et la site de Jerusalem doit sur la gent de la ville sergans .vc. et la site dacre doit sergans .vc. et la site de Naples doit sergans .iiic. et la site de Sezaire doit sergans .l. et le vesque de Belien doit sergans .iic. et Yblin et Mirabel doit sergans .cl. et le vesque de Saint Jorge doit sergans .iic. et Arsur doit sergans .cc. et le vesque de Saint Abraham doit sergans .l. et larsevesque de Sur doit sergans .cl. et le vesque de Seete doit sergans .l. et larsevesque de Sezaire doit sergans .l. et Escalone doit sergans .cl. et le Ligon doit .c. sergans et le Gerin doit .xxv. Caifas doit sergans .l. et Thabarie doit sergans .l. que .iiiimlxxv.

522. Or vos ay retrait la doulourouze perte dacre et de toute la terre de Surie et les nons des terres et les servizes. Or nous vous retrayerons les aventures que depuis sont avenues.

523. Quant la nouvelle ala outremer le pape et toute la crestiente de la si en furent mout douloros de cuer lun des povres crestiens quy estoient perdus et lautre pour honte de la crestiente.

524. Le pape de Rome si fist tant tost armer .x. guallees en Ancone et les manda en Chipre pour garder lihle de Chipre et les povres crestiens quy ens esteent et ausi manda autres .x. gualees quy furent armes en Jene laquel chose fu grant confort contre lorgueul que le soudan avoit et son propos estoit de venir en Chipre.

525. Le roy Henry de Chipre quant ses gualees furent venues il fist armer .xv. guallees et toutes ses gualees ensemble alerent a .i. chastiau de Turs quy a nom le Candelor et prirent la tour quy est sur la mer et cuyderent prendre lautre et ne la porent prendre car les Turs si sorent lor venue et se garderent et se garnirent et ce par grant esfors darmes ne fust lon nen eust ja pris celle tour quy fu prize mais puis quil ne porent autre chose faire si abandonerent la dite tour et se partirent et alerent en Alissandre; et firent aucuns jours la devant et puis revindrent en Chipre.

526. Et quant fu lan de lincarnasion de Nostre Seignor Jehsu Crist .m. et .cc. et .xci. de lincarnasion le soudan de Babiloine quy avoit enssi destruite la crestiente de Surie que les gualees vindrent aseger son port dalissandre con je vos dis si en eut mout grant despit et douta et pensa que Chipre li poroit faire mal asses et por ce il asembla ses amiraus et lor dist que il voloit sans faille prendre Chipre et por ce il ordena .c. amiraus quy li deussent faire .c. gualees chascun amirau selon son poier dont les amiraus li otroierent con siaus que mout le doutoient. Ensi con vos aves oy voloit il destrure de tout la crestiente et le povre peuple quy estoit reset en Chipre mais Dieu quy est plain de mercy atourna le fait autrement et en tel maniere con je le vos diray.

527. Le soudan asembla .i. autre fes ses amiraus et lor dist: Biaus seignors je me suy apence que apres que je averay pris Chipre me covient faire une grant euvre pour quei je suy si et si veull que vous soies aparailles de sivre moy car je veus aler prendre Baudac et seir au siege de la Halife. Et quant les amiraus virent que il enprenoit si fors enprizes et si pereliouses si parlerent entre yaus de luy ossire car il ne pooient souffrir son orguell et ensy come il le penserent ensi le firent et se jurerent lun a lautre; et avint si come il estoient ales .i. jour a la chasse il ly coururent sus et le tuerent et seluy que premier le fery si fu Beidera quy estoit son oncle frere de sa mere et le fery si lahchement qui ne li fist nul cop mortau et adons le fery un amirau quy ot nom le Chin quy dist a Beidera: Tu nen as mye feru cop dome quy veulle estre soudan mais je ly dourais cop de bras dome. Et tant le fery quil le partua et fu ensi venge la crestiente des maus quy lor fist.

528. Sur se fait furent Sarazins en escandle car chascun voloit estre soudan et fu grant bataille entre yaus et en morut asses et en fu leve soudan Beidera que lendemayn lui et sa partie furent tues et fu fait soudan Cot Boha; et le Chin de quey je vous parlay quy tua le soudan si chassa cestu Cot Boha et ly toly la seignorie et osist tous siaus de sa partie et puis fu mort cestu le Chin et tous les siens et meismes le Segay quy fu grant amirau de la painime morut tue de male mort.

529. Ensi furent mors et destrus tous les amiraus persecutours de Jehsu Crist et ja soit se que Dieu soufry que nos fumes punis par eaus pour nous males euvres pour ce ne demeure que Dieu ne les puny dou mau quy nos firent et meismes vost Dieu punir le peuple pour les hontes que il firent a la crestiente de batre les yglizes et trayner les ymages quy sont fais en remenbrance de Dieu et de Nostre Dame; si lor manda Dieu grant charestie et grant famine quy nen orent onques tant et morut mout grant cantite de peuple et de la mortalite nassi si grant enfermete entre yaus que les plus riches en morurent asses; ensi prist Dieu vengansse des messcreans Sarazins.

530. Par my tout ses erremens vous veull je mostrer une raison quy se doit bien retraire et chascun je croy la aussi bien coneu si con je fay cest asaver que de puis que Acre et la Surie fu perdue la gent furent si malement changes de bon en mau que nul ne voloit amer a lautre ni servir ni secorre et si vis la noble gent si abaysses et si avilles que mension ne se faizoit de yaus et me fist si grant mau et pitie que je me dollee tout dont je meismes me mis a trover par rime sur lestat dou siecle qui est ores apres que Acre et Surie fu perdue la quelle rime que je ais trove lais mize dedens se livre si apres por ce que elle soit tous jours trovee et remenbree la quelle comense enssy:

Pour ce que je voy treschanger
Mout de choses de blanc en ner
A se tens dores ou je sus
Selonc les biens que jai veus

Je suy par .i. talant tremis
Descrire a rimes aucuns dis
Sur ce siecle et sur la saison
Qui fait son cors par mesprizon.

Tenir ne me peus a nul feur
Car trop me pese fort au cuer
Dou tens que je voy si contraire
A la franche gent de boun aire.

Et se nul dit que napartient
Doyr tel chose que provient
Facent rayson que .i. fabliau
Ont oy quy est fait noviau

Et ne layent pas a folie
Que maint prodome sestudie
Aucune fois et se tremete
Bones raysons en ryme a metre.

Quar en rimes et en chansons
Peut on aprendre samples bons
Que maintes fois peut avenir
Quaucun parfait peuent tenir.

Sur se ciecle coumenseray
Et aucune chose diray
Que a chascun devra sembler
Que que je diray est bien ver.

Puis quacre fu desheritee
Et toute Surie gastee
Est nostre siecle entalante
De bonte en grant mavaiste.

Et sil furent aucuns mauvais:
Or sont devenus plus punais
Quar selon ce qui mest avis
Lun a lautre nest plus amis;

Car rancure descorde haine
Entre la gent a fait rasine
Et amour diaus est departie
Et est ceme entre yaus envie;

Par coy il sont en grant debat
Por aver chascun meillor part
De se siecle et por tant monter
Que nul ne puisse estre a luy per

Et quil soient plus hennore
De son vizin et redoute
Et grant robes faire et vestir
Et les grans orguels maintenir.

Mais pour marier orfenines
Ou soustenir veves mesquynes
Ne verres a nul amacer
Deniers pour amohne douner.

Tes sont tout le plus de la gent;
Treschanges sont trop malement
Et ja soit ce que sans mesdis
Chascun en est bien avertys

Toute fois veul metre et metray
Et par rime vos mostreray
Que sens bonte et courtoissie
Fait orendroit mout poi daye

Ni par biau dire ni valoir
A peine a nul bien ny henor
Mais de blandir et de flatir
Peut on plus tost a bien venir;

Par saver estre en beveries
Dire mottes de rybaudies
Et lozenger et prezens faire
Tel gens peuent lor voloir faire

Et qui se seit asoutillier
Dun barat et engin mostrer
Et controver novel uzage
Seluy est tenu a sage.

Et quy se fera orgueillous
Et chascun dehue respons
Et sera baude et enbatant
Seluy est tenu a vayllant

Mais .i. simple home debonaire
Sans malisse et de bon afaire
Dun tel nen est fait mension
Mais est tenu pour un moton;

Car nuluy pour humelite
Ni por dire sens ny bonte
Ny par uzer de bone vie
A peine peut il aver vye;

Et pour ce vos puiss dire en some
Que poy voit on que nul prodome
Pour honte quil ait ny saver
En grant priss venir ni monter.

Mais siaus qui prestrent a uzere
Henores sont a ma mesure
Et acullis et bien aymes
Plus cun leau prodome ...

Et gent chaitis de vil nayssance
Sont acuillis des bons en dance
Et lor fait on henor et pris
Et des nobles gens accuillis

Pour aucuns deniers que il ont;
Mau dahe soit en my le front
Que tel gent pour ce henorera
For de tant con les conustra.

Dont vait le siecle a reculons
Quant lon tient les mavais por bons.
Bien fu ce tens profetise
Par la sebille en veryte.

Mais que que je die en la fin
Je counus bien par saint Martin
Que sil que argent nen avra
Ja bien acuilly nen sera;

Et pour ce a chascun son pencer
Dor et dargent bien amasser;
Por se quil nait dautruy envye
Ont lor consiense alargie.

Et si ne soleent pas faire
Les bones gens frans de bon aire
Ains uzeent de verite
De bonte et de leaute;

Mais vil gens ne font nule force
Se lor parole vait a lorce
Pour amaser or et argent
Et sur ce monter la bone gent.

Tel gens le siecle ont corronpu;
Grant perill est dahne cornu:
Ces ont cornes dor et dargent;
Hurter peuvent a toute gent;

Et se tous sont la creature
De Dieu; si nest mie droiture
Que tous somes en .i. degre
Par la volente de De.

Abraham si mist Ismael
Sous les pies dizac jovensel
Que en la dame engendre fu;
Ismael pour serf fut tenu

Quy bastard fu ne de la serve.
Mais nul orendroit ne conserve
Fors qui quy soit sil a deniers:
Pour ce sont les gens enpires.

Toute riens vait orres a rebours;
Gens devienent en tout le cors
Quy sont de tres vil estraiture
Si ont deniers hors de mesure.

Se poize moy ce Dieu mait.
Or vos ay de moy le voir dit
Car grant peche est de grans maus
Quant ahnes devienent chevaus.

Encores por deniers aver
Les uns vont les autres rober
Et lun a lautre terre prendre
Et crestiente par tout vendre.

Mout men poize de tel saison
Qui fait son cors contre raison
Que siaus quy sont de bien estrais
Sont abaysies par si fais trais.

Et partout vois raison faillir
Et verite de tout morir
Que se aucun a acarele
A home qui avra poier

De semonses ou prezens faire
De bons vins et de laytuaire
Seluy sera bien escoute
Et lautre sera rebute.

Toute rien vait de mal en pis;
Je ne say que autre vos dis:
Mais Dieu feray son jugement
Soies sertain tout autrement.

Or vous vyaus dire de clerzie
Que tous uzent de semonie
Que nul por bonte ny saver
Navra provende sans douner;

Ni benefisse de liglize
Nen avra nul en nulle guize
Ny baitier ni enterer
Se il nen est par don denier;

Et se nul ovre quiert de faire
Se il counussent que lafaire
Soit pour aucun povre mesdit
Si se faignent par aucun dit.

Mais pour aucun riche et manant
Tost sen vienent de maintenant
En chantant a presesion:
Tel est orendroit la saisson.

Saint Piere nen ordena mie
Que ensi le fist la clergie;
Mais comunal a toute gent
Sans demander or ny argent;

Et quant aucun en saint yglise
Devient parlat ou ait ofice
Tut en devient si orguillous
Que dun anel se fait .i. ours.

Preschours et Menors nont pas mains
Dorguel aucunes fois sertains
Mais deaus se peut sestu bien dire:
Le siecle seroit ases pire

Se il ne fussent sertement
Que par lor amonestement
Qui sevent bien dire et retraire
Mout de gens trayent de maufaire.

Des roys des princes et barons
De siaus ne fai ge mensions
Car chascun voit apertement
Coment font leur gouvernement.

Je suy sert que sans le mien dire
Chascun voit con le siecle enpire
Et se lon dit que doit on faire
Lon se doit de tous maus retraire

Et des orgueuls dou siecle eissir
Et Dieu henorer et servir;
Car quant vera au jugement
Tant varra fumier com argent.

De la saison ensi contraire
Con vos maves oy retraire
Ne soloit point en Chipre aver
Car bien le puis dire par ver

Cestoit le plus aize pais
Con seust de si a Paris;
La ou navoit nule descorde
Mais pais et amour et concorde.

Les uns les autres sentramoient
Leaute et foy se portoient
Nen avoient autre penser
Que faire feste et soulasser;

Frans estoient et de bon aire
Vers toute gens de bon afaire
Si avoient pais asseur
Nen avoient afaire a nul.

Par envye furent en apart
En grant discort et en debat
Dont il se sont mout amermes
Et damages et enpires;

Et ce sont mout entrehais
Les uns as autres ont maumis;
Si nen a mais entre yaus amor
Fors felenie et fors errour.

Dont le pais est enpires;
Grant damage est bien le saches
Grant perill est de lor discorde
Se Dieu ne met entre yaus acorde.

531. Or aves oy la rime que je trovay selonc le tens quy estoit adons et croy que siaus qui ont veu seluy tens si con je ais fait direent que elle parle bien et a droit et veryte; mais je laira ores ester ceste rayson et comenseray a dire se que je devray dire des aventures quy sont avenues puis que Acre fu perdue si con je vous ay retrait les autres choses avant.

532. Apres que Acre fu perdue avint en lan de lincarnasion de Crist .m. et .cc. et .xci. les Sarazins despaigne quy sont au destroc dou Maroc virent que le soudan de Babiloine avoit destruit la crestiente de Surie; si vorent ausi destrure lor vizins despaigne crestiens. Tout soit il chose que dun grant tens avant avoyent ordene les Sarazins de Surie aveuc siaus despaigne dennuer les crestiens les uns de sa et les autres de la; et quant siaus de la Surie eurent fait siaus Sarazins que je vos ais nomes si vostrent ausi faire et armerent .xx. leins guallees et saities et passerent mout de gens darmes par cel estroit dou Maroc en la terre dou roy despaigne par plusors veages; et quant il furent passes si asegerent une boune site de crestiens quy estoit dou roy de Castele.

533. Quant le roy de Castele le sot si arma .xv. guallees et fu amiraill messire Beneit Zacarie de Gene qui estoit a sel tens amiraill dou royaume de Castele. Le dit messire Beneit vint o ses .xv. gualees la ou les guallees des Sarazins estoient et lor douna chasse car il ne les post jondre et puis retournerent les gualees des Sarazins en lor leuc et passerent toute jour lor gent.

534. Le roy de Castele fist semondre sa gent a chevau darmes et asembla son host et en tant com il peut sa gent pour venir contre Sarazins; le dit Beneit Zacarie avoit ja doune chase as guallees de Sarazins et pris saities. Le leuc estoit stroit par la ou il paseent lor gens mais Sarazins virent que lor guallees estoient plus ligieres que selles des crestiens: si avoient grant baudour et passerent la gent dautre part non dounant cure de nos gualees.

535. Le dit sire Beneit Zacarie ja soit se que il fust .i. sage home de mer ou soutil toute fois avoit il en sa compaignie Jeneves plusours sages et soutils mareniers quy avoient sodees dou roy de Castelle et se conseilla a yaus de poer enginier les guallees des Sarazins; et entre mout de paroles dites entre yaus lor conseil fu de faire les bans de lor guallees si loins que .iii. homes peussent seir desus et les labourerent tost et hastivement et mirent de lor suvre saillant a voguer .iii. par banc quy se dit treseul. Et quant il eut mizes ses guallees a tel point ce lon vos dit il avint que .i. bien matin sire Beneit se mist a aler contre les guallees des Sarazins voguant mout lachement et les guallees des Sarazins si come il aveent use li vindrent a lencontre seurement; et quant sire Beneit vy que il esteent si pres quy traieent dabalestres et se fyoient en lor ligerese cy troverent la mercy de Dieu engines car piestant les treuseul mirent main a voguer et les dounerent chasse jusques a lautre terre dont Sarazins qui se virent pres de terre se lanserent en la mer pluysours et autres se defendirent et prirent toutes les .xx. guallees et de la gent furent tout mors et pris la plus grant partie et lor gens meismes de terre lor coururent sus et les tuerent; et lor gens darmes quy avoient asege la ville dou roy de Castele oyrent que lor guallees furent prizes si laisserent le siege et vindrent a la marine pour saver aucun confort de trover aventure quy sen peussent repairer mais aucuns diaus alerent au roy de Castele et lencontrerent a un grant host et ses Sarazins se reneerent et devindrent crestiens et menerent le roy de Castele et sa gent la ou les Sarazins estoient que le roy de venue les desconfy et mist tous a lespee sans mercy car le roy de Castele le fist volentier por asouager la pezance de son cuer quil aveit de la perte dacre et de la destrucion de povres crestiens de la Surie; mais nous lairons la raison de se que il nen y a plus que dire et si vos dirons dune autre aventure.

536. Vous saves coment je vos ais devise la guerre des Jeneves a Acre et puis la guerre vos ais dit coment les Jeneves eurent guerres as Pizans et les desconfirent con vos laves oy et se fu la plus grant partie pour achaison de la guerre dacre devant dite; et de puis de celle guerre dacre Venesiens despriserent mout les homes de Jene et souvent lor faysoient gourdesses et dautre part Jeneves dezireent mout daver guerre as homes de Veneyse por vengier ou croistre lor honte mais que le tort venist par les Venessiens et le ehemin dinfer quy bien savet que ne remaignet pour autre chose mais que .i. diaus le comensast si pourchassa la maniere tost si come je vos diray.

537. Il avint en lan de .m. et .cc. et .xcii. de Crist que .iiii. guallees de Venessiens veneent de Veneyse en Chipre et avoient les gens darmes autres .ii. gualyes en Chipre au servise de la maison dou Temple et venoit dedens .i. frere dou Temple quy avoit nom frere Guillerme de la Tour et mon seignor Phelippe de Yblin oncle dou roy Henry de Jerusalem et de Chypre venoit de otremer dedens ses .iiii. gualies et monta dessus en Veneisse. Or avint enssi que venant lor chemin il encontrerent .vii. gualies des Jeneves marchans quy aleent de Romanie en Jene et pour ce que il est usage sur mer des .iiii. guallees de Veneissens ne les vorent eschiver et asses lor pria messire Phelippe de Yblin deschiver les; mais il ne vostrent riens faire et toute fois Jeneves baisserent pour eschiver le mau come gens marchans qui ne querrent pas la bregue et estoient .vi. guallees car lautre aloit bien pres de terre pour descovrir qui ny eust autre guallee et les Venessiens quy estoient gens ases et deziroient la bregue et se fioient a se qui avoient la chourme de .vi. guallees sur ses .iiii. con je le vous ay dit et virent les guallees yssir de lor vee et cuyderent que il le faissoient de paour. Si pryrent baudour et mirent main a lor espees et les trairent nues criant contre les Jeneves: Or cest a dire nos vos avons de guain. Et quant les Jeneves virent se faire a Venesiens et que il estoient armes si armerent et alerent contreaus et a lasembler fu tue dun carriau frere Guillerme de la Tour frere dou Temple quy amenet ses guallees des Venessiens con je vos ay dit; et quant il furent jointes les uns as autres Venesiens furent desbarates et vencus et pris et aucuns y ot mort. Le chevetaine des guallees de Jene si fu messire Johanin Marozel et guarenty messire Phelippe de Ybelin oncle dou roy de Chipre et ja soit si que la vaissele dargent dou dit monseignor Phelippe li fu toute robee et quant a sele oure lon ne la post recovrer toute fois la manderent tout a son gre; et confecerent les Venesiens sur une ihle lor tort et outrage et en firent Jeneves de ce chartre de notaire et les laysserent aler et out en ceste maniere le traist mon seignor Phelippe de Yblin.

538. Le seigant an apres quy fu lan de lincarnasion de Nostre Seignor Jehsu Crist .m. et .cc. et .xciii. les Venessiens armerent en Veneisse .xxv. gallees et vindrent en Chipre por damager Geneves non regardant a tort quy vint de lor gent con vos maves oy dire por la prezence de se franc home et grant seignor messire Phelippe de Yblin ni mandant mesage en Jene mais de lor preupre volente et par desprizance vindrent ses .xxv. guallees de Venessiens en Chipre a Limesson. Et fu lor capitaigne Marc Mazille et abatirent les crenyaus de la tour de Jene quy est a Limesson et abatyrent la loge des Jeneves et prirent le baston point as armes de Jene et le trainerent lie dune corde par terre et firent grant menases a Jeneves si que nul Jeneves a Lymesson ne soza mostrer. Et se partirent de Limesson et vindrent a Salines et troverent la le roy Henry de Jerusalem et de Chipre; et le capitaigne de ses guallees defendy tart de nut et parla au roy et li douna letres que le duc li mandeit et parlant de plusors paroles le roy lor demanda coument se esteit quil esteent venus aveuc tant de guallees et il distrent que il se voloient venger de pluzours menus otrages que Jeneves lor avoit fait et le roy lor dist quy se gardassent que Jeneves nen armassent apres yaus. Le capitaine respondy que il esteent armes de tel gent qui ne doutereent .l. guallees de Jeneves qui les counusseent bien coument il sont les fis de siaus quy les desconfirent le tens passe; et ses paroles dist au roy en audiense de mon seignor Phelippe de Yblin et de plusors chevaliers et maihnees qui furent la et je Dieu le seit lai escrit se con je loi quy estee la.

539. Cele nut partirent les dites guallees de Salines et alerent ver Famagouste. Le chastelain de Famagouste si estoit messire Phelippe de Brie quy vint sele nut a la loge des Jeneves et dist au consele et a Geneves quy la se troverent que il pensasent deaus saver que se les guallees de Venesiens vereent a Famagouste et lor voloient maufaire que il ne les poreent guarentir. Et adons le consele amassa les Jeneves et par le conseill de tous se partirent de Famagouste et alerent a Nicossie et as autres leus et seste chose que le chastelain dist sauve son henour il ne deust aver enssi dit car selon la tenor dou provelige des Jeneves le roy les det sauver et guarder en son royaume a son poier ne il ne promist mie deaus defendre a lor poer ains lor dist tout de bout que bien lor en covenist.

540. Toute fois se partirent les Jeneves si come est sus dit et les guallees des Venesiens passerent outre et alerent a Layas en Ermenie et prirent une nave des Jeneves et la firent rechater pour .m. et .vc. bezans blans et leverent toutes les armes et trainerent les banieres de Jene par la mer criant guere et demourerent la achetant lor marchandies et chargant lor guallees; et les Jeneves de Laias sen fouyrent par les cazaus et dedens Laias lor fu fait aucune damage a lor chozes.

541. Dedens se messire Gille Doire fu a Famagouste lequel cestoit conbatu au caf a une gualee des Venesiens dun quy avoit nom Polet Dalfin et lavoyt prize sur se y defendre et puis la laissa aler et estoit revenu a Famagouste con vos oies et avoit oy et seu ce que les Venesiens avoient fait as Jeneves en Chipre et a Laias et devoit prochainement partir de Chipre pour aler en Jene et portoit o luy frere Nicole et son conpaignon freres menors quy alerent; et se party et ala et en son chemin encontre .xiiii. guallees de Jeneves quy aleent de Jene en Romanie et parla a yaus des gualees et lor conta les outrages que Venesiens avoient fait et fayssoient as Jeneves dont il en furent mout courouses et dirent que il lamendereent et firent retorner le dit Gille Doire aveuc yaus et les .ii. freres menors que il meneit et se vindrent en Costantinople et deschargerent lor bales et lor marchandie en terre et la recoumanderent a lemperour et sesforcerent et apareillerent darmes et de se quy lor sembla; et le baill des Venessiens de Costantinople sen vint en Pere a la ville quy est des Jeneves devant Costantinople et parla a ses seignors des gualees priant quy le layssasent aler avant diaus en Ermenie a lor gent saver sil poroit metre aucun bien et les Jeneves ne le vostrent soufrir et encores lor pria le dit baill quil le laissasent venir aveuc yaus en lor guallees pour metre aucun bien et les Jeneves en nulle guyse nen le vorent mener et se party et tourna en Costantinople.

542. Les Jeneves se partirent de lor vylle den Pere et furent .xv. guallees a conter la guallee de sire Gile Doire et menerent les .ii. freres menors; et en lor chemin venant ver Laias si encontrerent .ii. guallees dun leur Jeneves quy avoit nom Andre Pelau que il le remenerent aveuc yaus et furent .xvii. guallees et ausi troverent .i. autre Jeneves a un sien lein arme quy estoit mains de guallee et le menerent en lor conpaignie; et quant il furent venus au Courc il troverent .i. guallee de Chipre armee de gens de Surie Pizans et Venesiens gens hainos a Jeneves en qui avoit aucun quy avoient ofendu a Jeneves en la quele estoit messire Ote de Gualanson; et le dit messire Ote de Gualanson quy est .i. chevalier doutremer de grant renomee si parla as Jeneves et mout lor prea qui lor pleust quy peust aler aveque yaus pour metre aucun bien mais les Jeneves ne le vorent soufrir et li prierent que il deust alargir sa guallee loins des lor pource quil ne peust par aucune fois naistre aucun mau que ses guallees estoient gens quy lor aveent ofendus par le tens passe et pour samour ne les voleent grever. Messire Othe sen party deaus et vint en Chipre car il venoit de veir et parler au roy dermenie.

543. Les Jeneves furent a Laias et furent a la viste les uns des autres aveque les guallees des Venesiens dont les Jeneves lor manderent ses .ii. freres menors et lor manderent quy lor deussent rendre laver des Jeneves quy laveent pris; dont il ne vostrent riens faire et prirent les .ii. freres menors et les jeterent en terre aveque lor barque et ne les laisserent venir arieres a Jeneves et voguerent en lor gualees vers les guallees des Jeneves pour asaillir les et les Jeneves les eschiverent alant vers la Montaigne Negre quy est loins de Laias alant vers demy jour .xxx. milles et sorgirent lor ancres la et les Venesiens a lor gualees vindrent la et sourgirent et aresterent devant les guallees des Jeneves et furent les uns devant les autres tant con lor plost. Et se partirent les Jeneves et alerent a Laias et propozerent en lor conseil de Surie de porchasser les Venessisiens jusques dedens lor goulf de Veneise et distrent entre yaus que il esteent guallees chargees et pezantes et se aucun vent les departist il les perdreent toutes et sil voleent venir a la bataille qui les atendereent et saparaillierent et acrurent de gens de la terre et atendirent et se lierent ensemble pour ce quil estoient mains ases des Venessiens.

544. Les Venessiens si estoient a la pointe de Maumistre et estoient .xxxii. leins car il furent de Veneyse .xxv. gualees et le comun lor manda une gualee faire lor saver coment sestes guallees de Jeneves estoient partis de Jene et quy se deussent garder dyaus et de Romanie lor vindrent .iii. guallees et .iii. saities. Et eurent conseill les Venessiens de combatre a Jeneves car sil ne se conbateent et se delivreent deaus il lor vereent apres guaitant lor point de faire lor damage et pour ce lor valoit meaus le conbatre et propozerent de tenir lor antenes en poy hautes pour ce que se les Jeneves vozissent refuzer la bataille et se meissent a aler deveent adons faire velle de lor gualees et ataindre les et pour ce aveent il lor antenes hautes quil ny eust autre a faire que de tirer la poge; et ensi se mirent a venir vers le port de Laias la ou les Jeneves atendeent.

545. Quant les Jeneves les vyrent venir sy sarmerent et crierent a lor et les guallees des Venesiens les alerent envestir et les Jeneves esteent lies ensemble quy ne sozerent esparpolier pour ce quil esteent mains des gualees de Venesiens; et fu la bataille grant et fort de lanses et de pieres et de carryaus quy dura grant piesse dou jour; et en la fin furent les Venesiens desconfis et les Jeneves quant il se virent le meyllour si dehlierent lor gualees et prirent des gualees des Venesiens .xxv.; et .iiii. gualees et .iii. saities eschaperent et alerent en Veneyse et guaynerent adons les Jeneves toute la marchandie que les Venesiens avoient dedens lor gualees quy valut plus de .vc. mille bezans sarazinas; et en tel maniere avint a Venesiens seste grant mesaventure. Et ore je laray un poy a parler deaus et des Jeneves et si parlerons de se quy covient a parler des choses quy avyenent lun an apres lautre.

546. Quant vint en lan de lincarnasion de Nostre Seignor Jehsu Crist .m. et .cc. et .xciiii. fu ehleu pape frere Piere de Moron quy estoit reclus; fu apele pape Celestin. Il fu home de grant saintete et plussours gens dient que Dieu fist mout de miracles pour luy en sa vye et si ne vost onques chevaucher que ahne pour dignite nulle que il eust; ains vesquy mout homblement et si vesquy poy. Et vos diray que fu de luy estant il pape si con je vos dis et que il vy les gens escandeles et descordes entre la crestiente et meismes en la court de Rome et que il ne le poiet amender si guerpy le siege apostolial et retourna a sabaye; et furent les cardenaus en grant debat de faire pape. Or avoit .i. cardenal quy sage et artelliaus et mout entreprenant estoit et aveit este notaire en la court dou pape et mout avoit apris par coy il savoit ases et parla a pluzours des autres cardenaus as quels .i. a un il lor promist de faire les pape si li vossissent doner lor vois. Et lun de lautre ne savoit rien dont chascun por se il donerent lor vois et ly firent grant promesses; et quant vint le jour de la ehlasion il meymes se fist pape et furent les autres tous deseus. Cestu estoit avant Beneit Guaitan et fu nes dun pays quy a nom Anaigne.

547. Quant cestu fu pape il manda et fist venir a luy pape Selestin quy se fut degete dou pape et le fist tenir en garde que escandle coumensoit ja entre la gent et dyseent quil y avoit .ii. papes et que ce estoit chose quy ne fu onques et ne fu mais que pape ce fust degete; cestu pape Selestin vesquy poi et morut.

548. Cestu pape Boniface comensa mout a estiver et grever siaus de la Colone quy sont gent de grant lignage a Rome; et de se lingnage aveit .ii. cardenaus que lun avoit nom messire Jaque et lautre messire Piere les ques meteent sus au pape de lais fais et le pape meismes prehcha contre yaus et les dejeta jusques a la carte jenerasion de tous les benefices de sainte yglise. Et siaus de la Colone coururent sus a la gent dou pape et les deroberent de grant deniers de laquel gent la guerre comensa mout fort et le pape les asega en lor chastiau de la Colone et asega puis le chastiau quy a nom Palestin et est de siaus de Coulone qui est mout fort et prist lun chastiau et puis lautre; et les .ii. cardenaus se rendirent a sa mercy dont il les fist metre en garde mais de puis il senfouyrent en Gene et de la alerent en Sezile.

549. Pape Boniface tranlata pluzours perlas; entre les autres tranlata larsevesque Johan Turc frere menor et fu ne dancone et le fist arcevesque de Sardeigne.

550. Et fist arsevesque de Chipre messire Gerart le deen de Lengres quy demoura en Chipre .ii. ans et puis sen ala outremer.

551. En lan de seste incarnasion de .m. et .cc. et .xciiii. avint en Hermenie .i. grant escandle entre le roy Haiton et ses freres et vos diray coment fu lachaison.

552. Le roy Haiton ala a Tatars et laissa son frere Toros que estoit segont de luy en son leuc; et quant il revint des Tatars il mist sus a son frere que il li voloit tolir son royaume et chaisona de se fait plusors barons de son pais. Apres cestu roy Haiton sen ala en Costantinople et mena Toros son frere aveuc luy; et Senbat son tiers frere que il avoit laysse en son leuc se fist tanttost corouner dou royaume dermenie car Haiton a son tens ne se vost onques encorouner ains vesty labit des Freres Menors et se fist apeler frere Johan dermenie.

553. Quant le devant dit frere Johan entendy que Senbat son frere cestoit fait roy de son royaume dermenie si arma .ii. guallees et mena o luy son frere Toros et si vint en Ermenye; mais siaus dermenie lor defendirent lentree et frere Johan demanda pour coy lon le defendoit lentree de son pais et lon li dist que son frere Senbat sestoit encouroune et que il ne voloit qui deust entrer au pais. Et le dit frere Johan et son frere Toros vindrent en Chipre et de la sen alerent en Costantinople et de la se mist a aler a Tatars pour soy clamer de son frere Senbat; mais le dit Senbat fu avant de luy a Tatars et avoit espouze feme tatare pour avoir plus lor amiste; et ensi come il se revenoit des Tatars en son pais dermenie il encontra en son chemin frere Johan et Toros son frere quy aleent a Tatars: si les prist et mena aveuc luy en Ermenie et apres poy de jours il fist estrangler Toros son frere et fist crever les ziaus a Haiton quy estoit frere Johan mais si come a Dieu plost lun eull li remest que il vy de luy apres. Et quant il lor cart frere quy ot nom Costans vit que le roy Sembat avoit tue son frere Toros et lautre aveugle si en fu mout dolent et pour ce parla a plusors des plus riches dermenie et asembla gens et corut sus a Sembat et le desconfy et le prist et le mist en prison et delivra son frere Haiton quy estoit frere Johan. Quant Haiton fu hors il ne rendy pas bon gre a Costans quy le delivra ains le prist et mist en prizon et puis manda luy et Senbat a lempereor de Costantinople et tint sestu Haiton son royaume tout vestu de labit des Freres Menors tant que .i. enfant fu grant quy fu fis de Toros son frere segont quy avoit este estrangle; et la mere de sestu anfant fu suer dou roy Henry de Jerusalem et de Chipre. Cestu anfant le roy Haiton le fist encoroner dou royaume dermenie a son vyvant; et vos layrons a parler de luy et parlerons dun autre fait con vos orres.

554. A .m. et .cc. et .xcv. de lincarnasion de Crist fu grant remuement en Jene et en Veneisse car Venessiens voleent faire grant armement pour eaus venger dou damage et de la honte que les Jeneves lor aveent fait et Jeneves meismes satirerent de lautre part pour eaus defendre.

555. Le pape manda querre les plus sages de lor sites et se travailla mout de metre aucun acort entre yaus mais ne post et pour se se tornerent chascun en sa site; et comensa la guerre entre yaus mout forte et mout cruel si con vos entenderes.

556. Les Venessiens armerent .lxx. guallees et vindrent sodainement en Pere qui est une ville des Jeneves et est asise devant Costantinople et mirent le feuc dedens et lardirent sans autre damage que Jeneves aveent oy noveles dyaus et aveent trait tous lor biens et mis dedens Costantinople et meismes lor tarides il les esfondrerent et les laisserent aler a fons et puis dou partir des dites gualees si les leverent.

557. En lautre iste apres les Jeneves armerent .lxxx. gualees et entrerent en le goulf de Veneisse; et avoit de sus .ii. amirails: lun fu sire Thomas Espine de .xxx. gualees et lautre fu messire Guande Damar des .l. gualees. Et furent entre le goulf de Veneysse et y demourerent tant que le bescut lor comensa a faillir et furent au conseil si que sire Thoumas Espine si conseillet datendre pour ce que honte lor seroit se Venessiens nisseent et il fusent partis avant; et lautre amirail sire Guande Damar disoit que il se voloit partir en toute guyse et aler en Sardeigne; si que les .ii. amirails furent a vylaines paroles et se party messire Guande a .l. guallees et sen ala en Sardeigne et sire Thoumas Espine quy nen avoit que .xxx. gualees nen oza demourer et se party et vint en Sezille et se mist en .i. leuc quy a nom la Catune.

558. Les Venessiens apres poy de jours nissirent de Veneize et vindrent au leuc ou les Jeneves les aveent atendus et troverent que il estoient partis et prirent baudour et vindrent en Sezile et troverent sire Thoumas Espine a ces .xxx. gualees et li dounerent chasse mais Thoumas Espine i avoit ligieres gualees et se partirent.

559. Les gualees des Venessiens firent le tour de la Sezile et en pareil leuc prirent des Jeneves naves qui devoient charger de fourment bien .xvii. et ensy ressut le comun se damage.

560. Quant vint lautre yste apres le comun de Jene arma .c. et .lxxvii. guallees et .xx. barques de parescalmes et vindrent en Sezille et a Messine et armerent .xxv. guallees que il laysserent a garder Jene pour les Pizans et fu amirail de ses .xxv. guallees messire Manuel Zacarie et dou grant armement fu amirail messire Aubert Doire quy fu jadis capitaine de Jene. Et quant se grant host se party de Jene manderent letres au coumun de Veneysse que il estoient partis de Jene .c. et .lxxvii. gualees et alerent a Mesine et sil avoient volente de faire aucune raison quil venyssent la et partassent lor cartulaire car il lavoient porte le leur aveuc yaus; et puis quant il furent venus a Messine si lor manderent par .i. courier quy ala de Poille a une autre si faite letre.

561. Les Venessiens lor firent le repons et lor manderent dire que il estoient venus esforsement volentiers pour ce que Veneyse ne poroit entendre si tost a armer tant de gualees et pour ce sembloit que il ne voleent mye la bataille mais sil fucent venus ou vozissent venir comunal quil fussent nissus et nistreent bien a la bataille pour eaus. Dont les Jeneves sen tornerent en Gene atout lor grant armement quy fu mout noble et grant si come siaus quy les virent le dient que tous les grans homes de Jene a preuve les uns des autres armeent lor gualees bien aornees de pluisors coulours et trop em pais et repos alerent et tournerent.

562. Et quant vint en lan de .m. et .cc. et .xcviii. de Crist les Jeneves armerent .lxxxiiii. gualees et nyssirent de Jene et vindrent entre le goulf de Veneise et leur amirail fu .i. vaillant home artillious et de grant cuer quy avoit nom messire Lanbe Doire; et en lor veage les assailly .i. si mau tens que .viii. gualees se partirent de lost et les geta le mau tens que .viii. gualees en Poylle de quey lor mau vint pour lor profit car il prirent plusors vausiaus de Veneyse quil neusent pas pris et les autres .lxxvi. gualees traverserent le goulf et alerent vers lesclavonie en .i. ihle quy a nom Escursle et la atendirent les Venesiens.

563. Le comun de Veneyse quant il vyrent bien que Jeneves estoient venus si armerent lor guallees quy furent .xcvi. gualees et devoient avoir autres .xiiii. de Jarre; et fu lor amirail .i. grant home de Veneyse quy avoit nom Calo Dandle et se vindrent ses .xcvi. gualees a la viste des guallees de Jene; et se fu par un samedy de setembre a .vi. jours entrant que fu la vegile de la feste de Nostre Dame mais la feste si devoit estre le lundy et pour achaison de la feste selle nuit dou samedy les gualees de Jeneves en chascun de lor escaloine alumerent une chandele pour henor de la Vierge Marie si que les Venesiens les virent bien et quant sire Lanbe Doire amiraill de Jeneves vy que sa gent firent se leminaire si demanda por quoy se estoit que il fayzoient se luminaire. Si li fu dit que il le faizoient pour la feste de Nostre Dame quy sera doumain le dimenche; et il manda comandant de gualee en gualee quil deussent estaindre les chandeles que la feste de Nostre Dame nen estet mye le dimenche qui estoit demayn mais la sera le lundy: Averons la bataille demain a nos henemis et les vequerons et ferons feste de Nostre Dame et por la victoire que nos averons. Et son dit fu profecie car enssi fu. Et adons furent estaintes les chandeles toutes dont les Venesiens si firent grant merveilles de se que il avoient veu si grant luminaire et puis estayndre si tost: si cuyderent par ce que les Jeneves fussent partis et de lor fanon quy alumeit encores faizeent rayson Venesiens que ce estoit une lanterne quyl avoient laysse sur aucune barque pour sembler as Venesiens que il fussent encores au leuc et avereent en tant espasse daler. Et pour saver de se aucune verite si manderent .i. leur Venesien quy a nom Menegue Esclafon en .i. colonbet que sacosta as gualees des Jeneves et les vy de loins toutes rengees et vint si pres que il loy que les uns dizeent as autres: Ves tu acheter se que je guaigneray doumain. Et autres dizet: Quant sera jor pour faire seste bataille. Et Menegue tourna et dist a lor amiraill coment les gualees sont encores en leur leuc et as paroles quil avoit oy deaus il nesteent mie gens de fouir que il pensast daparailler ses batailles et ordener son fait.

564. Quant vint lendemain matin le dimenche il saprocherent les uns as autres et sabalestrerent ases; et Venesiens eurent conseil de ferir sur la mite des guallees des Jeneves et averont tost desconbre sele mite et lautre mite apres avra poier a yaus; si se meteront en desconfiture. Et tout ensi come il le deviza fist que atout lor gualees quy furent .xcvi. feryrent sur la mite des gualees des Jeneves quy ne furent par tout que .lxxvi. gualees que les autres .viii. se partirent dyaus par mautens con vos laves oy avant et nen estoient encores revenus; et donerent les Venesiens si grant charge sur la mite de lost de Jeneves quy desconbrerent .xiii. gualees de Jeneves. Et lautre mite des Jeneves qui virent que lor gualees aveent si grant charge et que nul nen estoit venus conbatre a yaus si tailerent lor goumes hastivement et laysserent lor ancres en mer et vindrent ferir sus les Venesiens et ne fouyrent mye si con Venesiens firent rayson et en tel maniere furent les Venesiens au myleuc des Jeneves et fu la bataille mout mourtau con chascun peut crere bataille que quy chait si est mort; et ses morurent et arme et encores crestien lun contre lautre; et en la fin Venesiens furent desconfis malement et perdirent .lxxviii. gualees et eschaperent les autres quy furent .xviii. et sen alerent en Veneyze.

565. Adonc eut en Veneyze mout grant doulour et si ot ausi grant paour car aucuns saparaillierent dordener lor defensses dengins et dautre qui lor covenoit doutant que les gualees de Jeneves ne vozissent venir. La des Jeneves vos diray quy firent de toutes les gualees de Venesiens quil guainerent: il en traistrent se quei lor plost et puis les ardirent toutes et fu pris lor cappitaine sire Carlo Dandle quil morut apres alant en Jene dune contine. Et furent pris plusours gentils homes de Veneise et grant cantite de menues gens qui furent bien .xvim. persones sauve les mors et autres quy alerent en terre des Esclavons qui ne sont pas bien des Venesiens; et saches que Jeneves seroient bien ales en Veneyse mais il douterent pour la part contraire quy estet en Jene des Grimaus quy esteent Guelf et pour ce vindrent en Jene tost.

566. Il avint que les Pizans quy encores estoient en Jene en prizon virent que lon vost metre les Venesiens aveuc yaus en lor prison: si ne les vorent aculir en nulle maniere. Si covint que lon les pouveast daucune plase et furent en prison poy de tens.

567. Or vos diray si que .vi. gualees de Jeneves firent que le comun arma; et fu amirail sire Guavin Tartaro: il ala en Veneize en lihle de Saint Nicolas qui est port de Veneize et mist lenseigne de Jene et congnia monee et y fu tant que les Venesiens leurent a grant honte et a despit et armerent .viii. gualees. Et les .vi. gualees partirent et yssirent hors dou goulf et les .viii. gualees des Venesiens lor alerent apres jusques hors dou goulf; et les .vi. gualees de Jeneves retournerent aryeres a lihle de Saint Nicolas et furent aucuns jors et se partirent et firent damage a plusors Venesiens par la Poulle et se tornerent en Jene et toute fois je ne vos sais mie bien dire se ses .vi. gualees se que je vous ay devyze que il firent avant la desconfiture des Venesiens ou apres mais bien firent que je vos ay dit si con chascun bien le feit.

568. Dieu par sa grant mizericorde quy desfait le poier dou diable en .i. moument les acorda ensemble en bone pais et en bon amor.

569. Ceste pais fu faite et acordee et dounent en seurte les uns as autres .ii. bones sites de Lonbardie que je ne vos sais nomer; et fu sire Thoumas Espine pour le comun de Jene et sire Romecorin de la Camajor por le coumun de Veneise et Dieu par sa pitie les mainteigne en bon amor et bone pais.

570. De tout ensement partist Dieu tous les biens ensemble que Pizans firent lor pais au comun de Jene et lor donerent les Pizans .cm. flourins dor et relenquirent le juge de Chinerc de Corse le quel vint puis a la mercy dou coumun de Jene quy le tienent en prison avec Pizans et Venesiens et morut apres le dit juge de Chinerc.

571. Quant vint en cel an de Jehsu Crist .m. et .cc. et .xcviii. les Jeneves se conbatirent dedens la site de Jene les uns as autres pour les pars que lon dit Guelf et Guiblin; et furent de la part Guelf les Grimaus et autres lingnages et de la part Guybelin furent seaus despine et Doire et autres lingnages. Et furent les uns de sa et les autres de la et dura selle guerre plusors jours et se failly poy qui ne mirent lor site a destrure quy est une site mout belle et mout ryche et la ou se treut mout de sages homes; et en se fait si failly malement lor sens que pour maintenir tel parties se veullent destrure la quele choze me semble il estoit euvre dou diable; et tout ensi sont entaches de seste malete par toute Touscane et Lonbardie et Sezille et Poille et la terre dou Principaut et Calabre et se coumence a estraindre entre la clerzie quant est par volente mais non pas as armes palezes; pourquei de seste bataille quy avint en furent mors gens ases dune part et dautre et en la fin les Guelf furent vencus et se partirent de Jene une grant partie deaus especiaument tous les Grimaus quy se recuilirent dedens aucunes gualees quy prirent dou part de Jene et alerent en Provense et prirent .i. chastiau quy a nom Maunegue le quel est de ryviere de Jene et dou comun et la tindrent lor siege les Grymaus et lor aydeours aucuns quy furent de lor part et roberent et prirent pluysors Jeneves et lor vausiaus se est a saver de lor contraire part et traiterent et pourchasserent a lor amis quy deveent courre vers Gene par terre et yaus courreent par mer a .vii. gualees armees et ordenerent se fait en .i. jour matin et ensy come il lordenerent si le firent mais il vindrent de nuit en la site de Jene par mer et frirent de dens le port a demy nut.

572. Les Guiblins furent as armes et il lor furent encontre et la plus grant partie dou peuple lor fu en aye et siaus quy deveent ayder les Grimaus aucuns lor defaillirent et pour ce de ligiere chaison et quy furent poy si furent les Grimaus desconfis et aucuns y ot mort dune part et dautre et pris furent aucuns et mis en prison et en la parfin fu fait pais entre yaus et furent delyvres de pryson et rendirent le chastiau au coumun.

573. En ce dit en de lincarnasion de Crist .m. et .cc. et .xcviii. fu une guerre entre le roy de France Phelippe et le roy dengleterre Odouart qui voloit marier son fis a la fille dou conte de Flandres; et fu en laye dou roy dengleterre pour son pourchas le conte de Flandres et par ses deniers quy li douna. Et le conte a tout son poier si fu en laye de messire Odoart roy dengleterre car le dit conte fu mau dou roy de France a quy se dit mariage nen playsoit mye: si avoit fortraite la fille dou conte de Flandres et la tenoit en son poer.

574. Le conte de Flandres manda Robert son fis au roy de France qui li deust rendre sa fille dont le roy de France ne le vost faire; et pour ce mist le conte de Flandres pluisors contes en selle guerre et furent pluysors barons de la terre de la partie et de laye dou roy dengleterre. Et par tel maniere comensa selle guerre de ses .ii. puissans et haus seignors que de puis vindrent a bon acort et paiss tost par la volente de Dieu Nostre Seignor; et ores vos diray dune autre guerre qui avint.

575. A .m. et .cc. et .xcix. de lincarnasion de Nostre Seignor Jehse Crist Federic quy tenoit le royaume de Sezille si arma .xl. gualees et yl meysmes fu de sus chevetaigne et seignor et sire Conrat Doire citain de Jene si en fu amirail et le roy Charle si fist armer autres .xl. gualees et fu chevetaine le roy daragone frere de se devant dit Fedric car il sestoit acorde aveuc le pape et aveuc le roy Charle et avoit jure maintenir la guerre contre son frere Federic et contre siaus de Sezile.

576. Les anfans dou roy Charle furent a ceste bataille le duc et le prince et Rogier de Lorin quy avoit este amiraill de Sezille si fu amiraill des gualees dou roy Charle; dont fu lasenblee de ses gualees qui fu entre yaus et fu grant la bataille et furent mort de la gent asses dune part; mais en la fin la gent dou roy Charle guaaignerent et furent desconfis les gualees de Federic et furent pris pluzours et fu pris sire Conrat Doire et prirent la gent dou roy Charle une ville quy a non Cataine et autres chastiaus.

577. En se dit an aparut une estele quy levoit a laube dou jour et avoit une longue coue et se levoit dou levant et aloit droit vers demy jour et fu veue en seste maniere bien .viii. jours au mois de jenvier.

578. Et en cest meismes an vos diray que le royaume dermenie estoit en trop mal estat et a grant meschef par les Sarazins quy avoient mout espresse et ly avoient pris les Sarazins aucuns chastiaus cest a saver la Roche Guillerme et un chastiau quy a nom Kalat el rom et Selvendegar et une cave qui a nom le Pertuis quy est mout fort; et puis entrerent au plain dermenie et prirent .i. chastiau qui a nom Betil et manderent lor baylis a la vylle de Layas qui est sur mer; ensi seignorierent presque toute la terre dermenie.

579. Haiton le roy dermenie se tenoit as montaignes a grant doute et a grant meschef ni nen ozet aprocher vers le plain et en la fin les Tatars de quey il se tenoit home ly firent aye si come je le vos diray; mais je vos viaus devizer des Tatars aucune raison por ce que vos saches lor comensement et coment il vindrent.

580. Vous saves coument je vos ay devise avant en se livre de Halaon quy prist Doumas et Halape Haman et La Chamele et que .i. sien amiraill quy ot nom Cotboha prist Sayete de Surie et coment Sarazins les desconfirent devant Thabarie en .i. leuc quy a nom Hamelielot.

581. Les Tatars sont gens qui sont Meinhles pour ce que il sont dun pais quy a nom Mehlie quy siet sur la mer ocseane et lor pais est enclos de mout hautes montaignes dever mer et devers terre et dit on que Alyssandre le Grant estoupa .i. estroit pas dont lon poiet issir de lor pais et venir en autre terre et pour ce les enclost Alyssandre que il ne puyssent issir tant que .i. vaillant home de yaus quy a nom Checan quy fu de grant enprise issi de lor leuc par sa vigour et par sa soutillanse; et fu sur une haute montaigne et regarda les nobles sites quy estoient abitees en tour la terre et avoit o luy acuns autres de sa gent menes la asquels il parla et lor dist que ses terres quil veet ly sembleent plus belles et plus delitables a demorer que lor pais nestoit. Meismes desendirent par de sa jus de selle montaigne et vyrent passer la gent de selle contree quy lor sembloit trop noble gent et richement vescus les quels fouyrent de siaus quant il les virent si lais et ausi petis ziaus quil furent tous espaventes; et apres se si repairerent en lor leuc et conteerent les autres Tatars se que il avoyent veu et fu creu de quant que il lor dist cestu Checan.

582. Les Tatars vivont sans pain car de pain ne saveent que se estoit et mangeent char sest a saver quant un chevau ou .i. ahne ou .i. chien moreit il le mangeent mais lor vie estoit de lait de saryze et de berbis et derbe sauvage et de voletures: or et argent et fer et autre metal nen aveent point.

583. Quant seluy Checan vy se quil avoit veu si con je vous ays retrait si yssi hors et tous siaus quy le vostrent sivre; et furent si grans gens a chevau san seles que lon ne les peust aver nonbres. Si se mirent a aler ver le levant en un pais quy sapele le Hata; et ses gens dou Hata pour la grant multytude de si grant gent come il vyrent se rendirent a yaus et firent lor comandement dont ses Tatars se tindrent la quy est un pais grant et large et bien delytable et en selu leuc aprirent les Tatars a conoistre les robes a vestir et plussors vyandes a manger et conoistre lor et largent et les armes de fer et autres armeures et de seles et de mases et de curasses a la maniere de selle terre que orendreit se dient tatarezes.

584. Les Tatars troverent seles gens de seles terres a lahches et mole gens as armes et delitouzes a lor vivre quy les prizerent poy et pour ce plus seurement chevaucherent par la terre et conquyrent une site quy a nom Hausa qui est mout grant a levant et si ois que marchans conterent a mon seignor le maistre dou Temple quy laveent veue que elle estoit grant .ii. jornees de lonc et de large; la tint son siege cestu Chequan et sa gent et la morut il pres dune fontaine par une serpent ou par aigue quil but dune fontaigne car il fu trove mort pres de la fontaigne et de serpent. .Iiii. fis demourerent: lun ala ver le Marmajour quy ot a nom Bareque et conquist jusques en Hongrie; et les autres .ii. conquirent autres provinces et lun diaus quy ot a nom Halaon sy vint vers nos parties. Et si laira des autres et vos diray de sestu Halaon ce qui fist en son tens a son coumensement.

585. Cestu Halaon saprocha de Baudat qui est chef de toutes les terres des Sarazins et la ou lor halife tient son siege qui est en leuc de Mahomet et son vycaire entra vers les Sarazins et le guerrea plusors ans et guasteit et ardeit et abatet toutes les apartenanses de Baudac.

586. La halife vy que les Tatars laveent si espreisse et damage et guaste ses terres: si sodea plus de .cm. homes a chevau de seles contrees et les tint .i. grant tens et Tatars ne firent lors nul semblant de venir plus avant dont la halife congea toute celes gens darmes quil a sodees; et quant il se furent partis de Baudac Halaon a tout son host vint dreit devant la site de Baudac et lasega mout pres et sele nut meismes firent les Tatars une trenchee entour la dite site de Baudac et firent entrer dedens selle trenchee aigue dum flum qui firent venir quy avyrona tout en tour la site de Baudac que nul ne post entrer ny issir.

587. Quant halife vit se il nen ot adons poer de mander pour chaser gens darmes ni autre secours et fu mout espavente car il fu chaitif et feble de cuer et de povre valour et sa gent meismes esteent chaitis en fait darmes et couars et gens quy aveent use les delis et les ayzes: si ne porreent ayder par force darmes dont le halife ot conseil a ses amiraus de se que il deveit faire et siaus li conseillerent de mander mesages a Halaon roy des Tatars pour traiter pais. Et Halaon parla au mesages et saparsut et conut que halife et siaus de Baudac esteent a grant mechef et lor otrea tout se que le message requist de pais que le halife yssist de hors parler a luy et que il aveit grant volente de luy veyr; dont la halife ly dona fey et issy a luy et mena o luy pluissors de ses grans amiraus dont Halaon bouta de sa gent de dens Baudac et quant il eut grant poier de sa gent de dens Baudac Halaon adons prist la halife en persone et les amyraus quy vindrent o luy et pry la site et fist fondre lor par dedens la goule dou halife pour ce que il laissa lor a despendre a sa defence de luy et de sa terre et si avoit ores tout perdu et lor et la terre; et sont ores.

588. Cestu puyssant Halaon roy des Tatars apres que il ot conquis Baudac il chevaucha et ala en Turquye et prist la site dou Coine et prist Sezaire la grant que lon apele Caiserie et toute la terre de Turquie entrusques a la mer.

589. De puis sen vint as Aigues Froydes et prist une site quy a nom le Mausel et saprocha depuis de nos parties et prist Halape et Haman et La Chamele et Doumas si con je vos ay retrait avant se dedens se livre et coment les Sarazins desconfirent les Tatars a Tabarie que Halaon avoit laisse en son leuc quant il tourna en sa terre; et ores vous diray les heirs que de sestu Halaon nyssirent.

590. Halaon apres se que il fu repaires en sa terre ne demoura guaires que il morut; et fu fait seignor en son leuc Abouha son fis et apres Abouha fu fait Arguon fis dou dit Abouha.

591. Cestu Argon ama mout les crestiens et plusors fois manda au pape et au roy de France trayter coment yaus et luy puissent de tout les Sarazins destruire; dont il avint que seluy Arguon manda .i. sien frere qui ot nom Mangodamor contre Sarazins et se conbaty a yaus au plain de La Chemele et desconfist la plus grant partie et si se mist a retorner cuydant aver tout guaigne mais les Sarazins se ralierent apres et desconfirent les Tatars tout ensi con je le vos ay retrait avant de se et vos ais dit en quel an il vint.

592. Cestu Manguodamor puis quy retorna morut en brief terme et apres poi de jours morut Arguon roy des Tatars et demoura son fis apres luy quy fu roy des Tatars et si ot nom Cazan.

593. Cestu Cazan au comencement de sa seignorie fist mout de maus as crestiens dou levant et fist abatre les yglises des crestiens et ama mout Sarazins et il meismes fu Sarazin. Les Tatars sont ydolastres et de puis quil esteent abites de Sarazins tous les anfans quy naysseent de puis deveent estre Sarazins.

594. Cestu Cazan ne layssa mye pour ce que il estet Sarazin qui ne pensast tous jours de grever le soudan et les Sarazins et pour ce manda sovent mesages aus roys crestiens et les metet en boune esperanse de coure sus a soudan et mout sescuzet des yglises que Sarazins aveent abatues des crestiens de sa seignorie et dizoit que se avoient fait .ii. de ses grans amiraus quy esteent Sarazins et estoient freres et haieent mout les crestiens; mais si come a Dieu plost ses .ii. amiraus mesfirent de pus a Cazan qui lor fist trencher lor testes et ne post on saver pour coy il le fist mais je croy que se fu euvre de Dieu car pus qui furent mors les crestiens dou levant furent plus a repos et meymes Cazan lor fu plus debonaire et si coumanda as crestiens de faire lor yglises.

595. Or vos avons dit coment les Tatars yssirent et coment les freres se partirent et coment seluy qui vint vers nos parties eut nom Halaon et tous siaus quy de luy issirent lun apres lautre jusques a cestu Cazan de quy je vos parle quy fu seignor de pus que Surie fu perdue et que Ermenye fu en aussy mal estat con je vos ay dit. Et ores vos diray des homes et des heremens de se dit Cazan et de la bataille quil ot o les Sarazins.

596. Une chose avint adons quy hasta mout la venue de Cazan: il avoit .i. sien amirail en Turquie chevetaine de par luy quy avoit nom Selemiche le quel estoit monte a si grant orgueul quy ne voloit rien faire pour Cazan son seignor; et Cazan lavoit mande querre pluzours fois et il nulle fois ne voloit aler; et por ce Cazan ly manda .i. grant host pour coure ly sus mais quant le dit Selemiche vit sel host venir contre luy si en ot mout grant paour et sen party et ala a Domas et requist au soudan de Babiloine quy ly aydast de gens darmes pour conbatre encontre sele gent; et le soudan le fist volentiers et ly dona .m. homes a chevau quy furent de la terre de Halappe et passerent par Ermenye et le roy dermenie ne loza contredire pour ce que il nen avoit le poier.

597. Ensi ala sel ost en Turquie. Quant les Tatars qui la estoient venus virent que Selemiche avoit amene Sarazins encontre yaus si en furent mout courouses et toute fois se conbatirent a yaus et les desconfirent de venue; ni les Sarazins ne les ozerent ataindre et se mirent a foir par les hautes montaignes dermenie esparpoulies et les abiteours des montaignes quy sont tous crestiens ermins virent sel host des Sarazins ensi desconfit quy ne saveent tenir vee: si sen apersurent et les asaillirent et corurent sur eaus et les prirent et osistrent presque tous.

598. Quant Cazan entendy que le soudan de Babiloine avoit ayde son enemy Selemiche et manda sa gent corre de sur la soue si en fu mout courouse et pour ce fist semondre sa gent hastivement et se mist a venir as partyes de Halape.

599. Et en lan de lincarnasion de Crist .m. et .cc. et .xcix. fist le soudan de Babiloine semondre sa gent hastivement et les asembla et se mist a paser par la Berrie cest a entendre par le dezert et vint a Guadres quy est lentree de la Surie a venir de Egipte et la ot le soudan sertaines novelles que Cazan sen venoit et pour ce chevaucha avant et vint par ses jornees a Domas. Sestu soudan dont je vos parle si estoit mout jeune de aage de .xxv. ans et avoit nom Melec el Mensour quy prist Triple et fu frere de lautre soudan quy prist Acre quy avoit nom Melec el Essraf et ja soit ce que en Babiloine furent fais pluzors soudans en poy de tens tant con sestu fu anfant toute fois en la fin cestu fu fait soudan.

600. Cazac cestoit ja venu as parties de Halape et tant saprocherent les uns des autres Sarazins et Tatars que il sentre virent et pensa chascun de lor bezoin faire con fil quy estoient henemis.

601. Cazan ausi ordena sa gent et deviza ses batailles mais toute fois sa gent nen estoient mye encores joins a luy ne il ne cuydoit avoir la bataille jusques a lendemayn et toute fois si se mist a aler vigourousement encontre Sarazins ace de gens come il avet si que lasemblee fu mout grant des .ii. parties et les Sarazins quy venent armes sur chevaus covers a curases et a chapiaus de fer et se flatirent lanses sur fuautre sur les Tatars sa les vos rozerent pres de .iiii. archees en deryeres et en abatirent plussors par les cos des lanses.

602. Quant le roy des Tatars vy sa gent ensi resortis dou champ et les Turs si vigourousement enbatre entre yaus et myaus montes et myaus armes que sa gent et douta que sa gent ne perdissent le cuer de combatre et se meyssent en fouye se sapenssa dune grant enprize que gent a chevau ne soleent pas faire en bataille car il mist pie a terre et coumanda a toute sa gent ausi au faire aussi lisses de lor bestes si que les Turs ne se porent enbatre entre yaus. Et les Tatars adons mirent main as ars des quels il sen aydent myaus que Sarazins et traistrent as Turs mout espessement et tant en nafrerent et osistrent de Turs et de lor chevaus quil covent les Turs resortir et entant furent venus la gent dou Cazan quy faizeent lariere guarde. Cazan vit sa gent aprocher et la gent sarazine resortir si coumanda a monter sur lor bestes; et monterent tous et se flatirent vigourousement sur les batailles des Sarazins et a sel point furent desconfis les Sarazins que onque puis ne firent defence nulle. La chose dura trusques a la nuit et pluzours en tuerent et se la nut ne fust plus en eussent tue.

603. Quant le soudan fu desconfit en seste bataille se fu a .xx. jours dou mois de delier dou dit an de .m. et .cc. et .xcix. de Crist il se mist a fouyr as parties de Domas et la se herberga a une partie de son host mais la nen oza il demourer car la paour li estoit si entre au cuer de luy et de sa gent que il cuydeent tous jours que les Tatars lor fussent a lor espales.

604. Le soudan sen party de Doumas a my nut et se mist a fouir vers les parties de Guadres sans tenir route ni come roy mais qui miaus. En seluy chemin lor avint une grant meschanse que il eurent tant de pleue et tant de froit si come est au mois de delyer que pluzours dyaus morurent de mezaise et perdirent ausy mout de lor chevaucheures.

605. On dit que le soudan entra en Babiloine a .xv. chevaucheors soulement car de sa gent fu perdue en la bataille grant cantite de gens et siaus quy eschaperent fouyrent pluissors par des chemins les uns sa et les autres la et de siaus quy vindrent aveuc le soudan si furent mors de froyt et de mezaise con je le vos ais dit; et aucuns fouyrent vers la maryne des quels vos dirais ce que il lor avint: et il alerent au Crac vissin de Triple et puis a Giblet et entre seste gent qui estoyent .iiiim. avoit .iiii. amiraus dont lun avoit nom Saindamor quy apres fu bailly et roy des amiraus et lautre ot nom le Hanimy et le tiers si fu Douveydar et lautre ne vos sais nomer. Et quant les vilains de la terre de Triple et de Giblet quy sont tous crestiens virent venir ses amiraus et lor gent desconfis si lor corurent sus que de tous les .iiiim. nen eschaperent que les .iiii. amiraus et entor de .iiic. ou .iiii. en lor compaignie par force de chevaus pour ce que il furent bien montes.

606. Cel grant ost estoit yssu de Babiloine a si grant orgueull et a si grant boubans si furent homes par sert .lxxm. a chevau des ques la plus grant partie estoient sur chevaus covers et armes de curasses et de bons chapiaus de fer des quels ont mors en la dite bataille entor de .xxvm. et le remanant fu mout bezillie et ala a nient et par les marines et par autres leus ou il se myrent pour entrer en Babiloine et meismes de siaus quy entrerent en Babiloine puis que le soudan y entra morut et asses dyaus pour les travaills que il eurent par les vees.

607. On treut que pluissours ans avoit que sel host de Babiloine navoit este desconfit ains avoit este victorious contre ses henemis et pour ce estoit il monte a si grant orgueul quil ne prizeent nul gent dou monde.

608. Or furent a tel esfrey que neis en Babiloine nen estoient il pas aseur car pluyssors de yaus sen foirent as vasiaus au flum et autres sen aleent a les plus parfons dezers dont pluizors de nos gens crestiens marchans quy estoient en Alixandre et en Damyate quant si vint qui tehmonioient ceste choze que Cazan eust conquis toute Babiloine.

609. Or vos diray de Cazan et des Tatars ses gens quant il eurent desconfit les Sarazins: Cazan se herberga au champ de la bataille et lendemain mist a sivre les desconfis non pas mout esforceement car ses bestes estoient mout travaillees dou grant vegage quil avoient fait et de la bataille et de la soufraite quil avoient eu derbage et tout fois il chevaucha apres les Sarazins jusques a Guadres et puis se mist vers Domas concuillant et destruyant les Sarazins.

610. Le roy dermenie quy fu Haiton et se dizoit frere Johan de Freres Menors con je vos ais autre fois dit si fu en ceste chevauchee et par luy fu fait grant damage as Sarazins en toutes manieres que il les post ennuire et damager.

611. Cacan quant il eut desconfit les Sarazins se retorna en son pais et laissa a Domas .i. sien amiraill en son leuc quy ot a nom Molay qui ot o luy .xm. Tatars et .iiii. amiraus. Or aveit .i. grant amirail de Babiloine quy ot a nom Capassac et .iiii. autres amiraus o luy; si estoient fouys de Babiloine as Tatars .i. an avoit pour paour dou soudan quy les devoit prendre et tuer et ses aveent mout atisse le fait des Tatars contre Sarazins et estoient venus aveuc eaus et por se fait si ce teneent a sertains que le soudan les haiet mout. Et Cazan avoit layse ses .iiii. amiraus Capassac et les autres .iiii. aveuc Molay a Domas quant il tornay a son pays. Dont il avint que cestu Capassac et ses conpaignons demorant a Domas aveuc Molay si eurent grant paour dou soudan et pour les malefaites que il ont faites si con je le vos ai devizes et manderent a lor amis en Babiloine quy trayterent lor pais au soudan dont le soudan lor pardona et si lor manda fianse; et adons se parti Capssac et les autres .iiii. amiraus sans se que Molay seust riens et alerent en Babiloine.

612. Quant Molay vit que Capssac et les autres ses conpaignons estoient fouys et ales en Babiloine si douta mout rayson et pour ce il se party et sa gent et sen torna en son pais. Or vos ais tout retrait les erremens dou Cazan et coment il desconfist lost des Sarazins.

613. Saches que de lhost de Cazan quy fu .cm. homes a chevau nen y ot perdu en sele bataille que vos aves oy que tant soulement .c. homes tatars a chevau.

614. Et apres que Cazan fu partis aucuns crestiens de Chipre estoient ales a Giblet et a Nefin et en seles terres de seles marines les quels vous nomeray: Guy conte de Jaffe et messire Johan dantioche et lor chevaliers; et de la cuyderent aler en Ermenie quy estoit a lost des Tatars. Cazan sen estoit retornes: il se mist a revenir et ly avint bien au conte quil trova a Giblet une gualee de Jene dun quy ot nom Jaque Davogaire quy avoit pris et saizi Giblet et pour son comun et pour luy. Mais Cazan se fu retornes; les Sarazins de seles contrees se rasemblerent et vindrent envers Giblet dont la guallee et les autres petis vaussiaus recuillirent le conte nessire Johan dantioche et les autres crestiens et furent au recullir assailis des Sarazins que pluisors crestiens tuerent et nafrerent et se revint en Chipre le conte Guy de Jafe et messire Johan dantioche et la gualee des Jeneves et les autres crestiens.

615. En lan de .m. et .ccc. de lincarnasion de Nostre Seignor Jehsu Crist le roy Henry de Jerusalem et de Chipre et le Temple et lospitau armerent .xvi. gualees et .v. saities et aucuns panfles et partirent de Famagouste a .xx. jours de jungnet. Et fu chevetaine de la gent darmes messire Raimon Visconte et amiraill des gualees fu messire Bauduyn de Pinquenin: il alerent en la terre de Giblet en .i. leuc quy sapelle le Resit la ou est un des bouches dou flum quy sapelle le Nil le quel desent de Babiloine; et la troverent .v. gualees armees de Sarazins les quels .v. guallees se mirent a monter contremont le flum. Si tost com il vyrent nostre armement et nos gens furent au conseil de monter apres yaus ou non et lor conseill fu si lonc que apres les cuyderent sivre et se fu nient car il se furent mout aloignes dont nostre gent mirent pope en terre et dehchargerent lor chevaus quy furent .c. et chevaucherent et alerent une liue et troverent .i. cazau qui a nom Lagidie et le roberent et pryrent le leuc. Et estant nostre gent la vindrent entor de .xl. homes a chevau sarazins et nozerent aprocher a nostre gent et nos gens se tornerent as gualees; si virent .i. enseigne de Cazan sur nos gualees et laveent mize les mesages de Cazan les quels Cazan avoit mande en Chipre au roy et monterent de sus nos gualees et pour selle enseigne de Cazan .iiii. Tatars quy esteent aveuc les .xl. Sarazins a chevau que je vos ais dit que lon les avoit mis la aussi come en prisson si vindrent ferant des esperons a nos gualees. Nos gens les resurent tous et lor bestes et secoururent le grant meschef ou Sarazins estoient par la grant perte que il resurent par la perte de Cazan.

616. Les gens partirent dou Ressit et vindrent au port dalissandre et entrerent par de dens le port des Sarazins car nul crestien nen y ozet entrer nulle fes car les Sarazins le gardeent mout por ce que il ne voleent que les crestiens le coneussent: nos gens la troverent mout bon port.

617. De puis sen partirent nos gualees dou port dalissandre et sen vindrent au port dacre et troverent en tour de .xxx. homes a chevau et bien .iiic. sergans a pie. Nostre serganterie desendirent et sen conbatyrent as Sarazins ses que je vos ai dit et les desconfirent et tuerent aucuns.

618. Et de puis sen partirent nos gualees dou port dacre et se vindrent toute la marine jusques a lihle de Tourtoze et saprocherent a la vylle de Tourtoze et la troverent .c. homes a chevau et dessendirent a yaus et les Sarazins ne sozerent conbatre a nostre gent; et nos gens ferirent sur yaus et Sarazins se mirent a fouir dont nos gens ataindrent .vi. que il abatirent et tuerent et de la sen partirent et vindrent a Maraclee lendemain.

619. Les Ospitaliers desendirent en .ii. panfles et plusours sergans en lor conpaignie et entrerent au Mareclee et les sergans entendirent a derober la ville et a manger et a bevre; et quant les Sarazins sapersurent quy estoient hors de la vylle que nos gens nen aveent mande en terre que .ii. panfles et que les gualees estoient loins ancrees si se flatirent sur les Ospitaliers et les chasserent trusques a lor panfles et tuerent de nos gens bien .xx. sergans et .i. chevalier; et de Mareclee sen partirent nos gens et corurent en Chipre.

620. En se dit an vint en Chipre .i. mesage de par Cazan roi des Tatars quy dist que Cazan devet venir en sel yver et voloit que le roy et tous les Frans alassent atendre sa venue en Ermenie dont le roy et sa gent firent lor atir.

621. Dont le seignor de Sur en sel meismes an quy estoit frere dou roy Henry de Chipre segont avoit nom messire Aumaury de Lezingniau et estoit conestable dou royaume de Jerusalem si passa au mois de novembre en .i. ihle quy est de Tourtoze et quy est pres de la ville de Tortouze aler au port bien demy liue mais a aler de lihle droit a la terre si a mains de chemin et mena gens a chevau o luy .iiic. et le Temple et lospitau en eurent bien autant ou plus et puis que il desendirent en lihle alerent en la vylle de Tourtoze et la desendyrent et y furent pluissors jours mais quant il vyrent que Tatars demorerent trop a venir et que Sarazins orent grant asemblee de gent pour courre lor sus il retornerent en la dite ihle de Tortoze.

622. Et quant ce vint au mois de fevrier .i. grant amyraill des Tatars quy ot nom Cotlesser vint bien a .xlm. homes a chevau as parties dantioche et la ou il vint manda querre Haiton roy dermenie quy estoit frere Johan des Freres Menors le quel ala a ly et mena o luy messire Guy deyblin conte de Jaffe et Johan seignor de Giblet. Et quant il furent devant Cotlesse il lor dist coument Cazan sen venoit mais grant enfermete lavoit pris au chemin de grans vens et de grans frois que il avoit eu par son chemin et que pluyssors de lor bestes estoient mortes. Cestu Cotlesse courut toute la terre de Halape entrusques a La Chemele et se torna en son pais sans plus faire.

623. Et quant messire Aumaury seignor de Sur et Temple et Ospitau et les autres bones gens quy estoient en la dite ihle de Tortoze si oirent dire que les Tatars estoyent retornes si orent conseil de retorner en Chipre et se retornerent con se soit choze que avant lor retor Sarazins sasemblerent et vindrent devant la ville de Tourtoze pour maufaire dont nostre gent hardeerent et abatirent et tuerent aucuns Sarazins et soufrirent nos gens de grant mezaizes.

624. A .m. et .ccc. et .i. de lincarnasion de Nostre Seignor Jehsu Crist le pape Bonyface manda en France ses mesages a messire Charle frere dou roy de France Phelippe quy fu biau roy et ly manda pryant de venir a luy et ly manda proumetre de faire mout de biens et henors; dont messire Charle quy avoit espouze la fille de lempereor de Costantinople cuyda que le pape le vozist mout ayder et recovrer le dit enpire que Gres tenoyent et pour ce ala il a luy o .vic. chevaliers de haubers de France par Lonbardie et par la Toscane et quant il fu venus a Rome le pape et tous les cardenaus lacuillirent mout henoreement et le pape ly dona la seignorie dancone et de Romargne.

625. Le dit mon seignor Charle frere dou roy de France ne sejorna guaires o le pape et sen ala en Toscane en la site de Flourence ou il fu acuillis mout henoreement et ly ofrirent .vic. homes a chevau; et les autres sites de Toscane ly ofryrent henors et servizes ases et le dit messire Charle party de Touscane et sen vint a Naples de Principat ou le roy Charle estoit et la fist son acort de passer en Sezille et aveuc luy pluzors barons de France; et passerent au mois davril. Et lairay a parler de yaus car je vous vyaus dire .i. grant contens quy avint dou pape et dou roy de France.

626. Ce fu en lan de lincarnasion de Nostre Seignor Jhesu Crist .m. et .ccc. et .iii. pape Boniface fist siter le roy de France si fort quil venist ou quil mandast; et si vos diray le comencement de lachaison quy fu que le roy de France se fist arester .i. perlat si que le roy ni vost aler ni mander. Donc le pape fist rapeler tous les preveliges et dons que lyglise de Rome avoit fait a ses ancessors et encores fist pape Boniface siter tous les perlas et abes de France quil venyssent au jor moty a ly.

627. Dont le roy de France fist defendre par tout sa terre que nul ne deust traire hors de sa terre ni or ni argent sauve monoie.

628. Quant les perlas oirent seste defence si virent bien que il ne poreent aler a Rome si grans come il soleent et quil ne sereent pas si bien veus aler a mains vudes et meysmes virent que le pape les travaillet daler a Rome sans grant nesisite. Si ordenerent jour de parlement tous les bons clers et tous les nobles barons de France et firent entre yaus .i. parlement les clers et les barons et par comune volente ordenerent de mander .i. mesage au pape pryant ly quil deust rapeler sa sentense pour eschiver les grans escandales quy porreent estre entre la court de Rome et la courone de France.

629. Quant le pape entendy la mesagerie il fu plus enginies que devant et fist citer le roy en persone et dist au mesage .i. vesque de France petit de persone et menu et chauve et sage et counussans quy tranluteroit le roy de France de son royaume et feroit autre roy en son leuc quy gouverneroit le royaume de France myaus de luy et obeyreit miaus Sainte Yglize que il ne faizeit et que aimereit et douteret Sainte Yglize con ses ansestres avoient fait.

630. Se dit evesque mesage respondy pour le roy de France et dist que il estoit bien si puyssant seignor de poier passer ausi bien et myaus ses menasses con siaus ont passe legierement et passeent les menasses quy lor a faites et quy sont maindres dou roy de France. Sur ce le pape fu mout corouse ver le vesque et ly dist quil se tenist en pais et ly fist lever lanyau de son deit et le despoza de son evesche; et le dit vesque respondy au pape quil ne fayzeit force de son evesche car il estoit au roy de France quy estoit si puyssant seignor que bien li porra satifaire le damage quy li faizoit a .cm. doubles dont le pape se courousa mout encontre luy et le fist arester en persone mais apres par la priere des cardenaus aucuns si fu delyvre et pour ce meysmes quil estoit message; et sen torna en France dont le roy de France ly fist uzer de son evesquee par force et ly fist autres biens ases. Et enssi fu a cel tens grant escandle entre le pape et le roy de France; et si vos layra a parler de se et vos retrayray une autre grant malaventure quy avint as crestiens de Surie.

631. Il avint en se dit an que le soudan de Babiloine manda au royaume dermenie .iiiim. Sarazins turs quy coururent toute Ermenie jusques a la maistre site qui a non Sis laquelle a mout fort chastiau la ou le plus de la gent se recuillirent et se failly poy que le roy Haiton dermenie ne fu pris car il fu pris et eschery de gent; et Dieu laida quil eschappa et se recuilly de dens le chastiau de Sis.

632. Les Sarazins mirent le feuc de dens la site de Sis quy est mout grant et y demourerent .xii. jours et virent bien que au chastiau il ne poreent maufaire et sen partirent et tornerent en une site quy a nom Halepe loins dermenie .iiii. journees.

633. Le roy dermenie veant se damage que Sarazins ly firent si manda son frere as Tatars mostrant le damage que Sarazins ly aveent fait car Cazan roy des Tatars atout un mout grant host estoit en siaus jours en Turquye et avet entendement de venir sel yver en la Surie contre Sarazins.

634. Or vos vyaus dire ce quy avint dune petite ihle quy est devant la site quy a nom Tortouze en Surie que les freres dou Temple teneent.

635. Le soudan persecutour des crestiens si fist armer entre gualees et sayties .xvi. et les manda a Triple de Surie a .i. sien amirail quy avoit nom Sandamour avoit este crestien fis de crestiene et de crestien et fu ne a une terre quy avoit nom Corgie et avet mande au soudan quy li mandast ces gualees; et fist monter sus gens darmes ases et sen vint terre a terre a Tertoze et fist son ordenement et passa en la dite ihle quy est pres de terre a mains dune mille; et quant les freres les virent venir si les douterent mout car il nen aveent nules gualees si ne fust tarides.

636. Dont il avint que les Sarazins desendirent en lihle de .ii. pars et aucuns des Templiers poindrent a yaus et les reuzerent en la rue de mer et fu la bataille mout aspre; et tant jeterent Sarazins de piles darc quy mahaignerent les chevaus et nafrerent pluysors freres si que par vive force les freres si se mirent sur .i. toron qui est en lihle et quant Sarazins les virent si aloignes dou rivage si desendirent tous de lor edyfisses quy esteent gualees en terre et se mirent dedens les edefisses quy esteent en lihle et les sergans archiers a pie suriens se defendirent mout vayllaument et tuerent mout de Sarazins mais se ne valut riens que gens a chevau freres et autres nen ozerent plus venir avant et esteent mout ehlongnes.

637. Les Sarazins sesforcerent mout et sespandirent par tout lihle et manderent mesages as freres dou Temple quy se deussent rendre a fiance et quy les conduereent la ou il vorreent de la crestiente et les Templiers dounerent fe a lor malice et se revindrent par latrait de frere Hugue de Dampierre et essi furent les Templiers et lihle pryze quy est devant Tertouze.

638. Les Sarazins firent trencher les testes a tous les sergans suryans pour ce que il firent grant defense et grant damage as Sarazins et les freres dou Temple furent menes en Babiloine hontouzement. Ensi avint de lihle de Tertouze con vos aves oy; et ores tourneray a retraire vos les herremens dou pape au roy de France.

639. Vous aves oy coment je vos ais retrait coument le pape site le roy de France en persone et coument il rapela tous les preveliges et grases que lyglise avoit done a ses ansesours et ala lor fait tant avant que le roy de France lacuza de .xii. articles mout vylains et le pernoit a prover que par le plus petit de siaus articles il ne poiet ne devet estre pape.

640. Dedens ce avint que le pape ala en Anayne et quant fu la le roy de France pourchassa tant que la gent danaigne le prirent en persone et le roy de France manda sa gent la quy eurent le pape en lor garde et le menerent a Rome et fu si garde que nul ne poiet parler a luy que par conge des gens dou roy de France; et en sel estat si morut et fu fait pape en son leuc frere Nicole prechor quy fu lonbart et nory en Veneyze le quel vesquy poy de tens et morut; et fu fait pape Climens quint a lincarnasion de Crist .m. et .ccc. et .vi.

641. En ce dit an avynt .i. grant contens entre le roy de France et le conte de Flandres et lachaison si fu que le conte de Flandres voloit doner sa fille au fis de messire Odouart roy dengleterre dont le roy de France ne le vost consentir et fist le roy de France prendre la damoizele fille dou conte de Flandres et la tint en son poier.

642. Dedens se avint que le duc de Bourgoyne et le conte de Bar et le conte de Flandres se revelerent contre le roy de France et mut une grant guerre dont les Flamens mirent a lespee et tuerent tous les bayllis dou roy de France et le roy de France ala aseger le conte de Bar et sur ce le conte de Bar vint a sa mercy et le roy de France ly pardouna.

643. Le roy de France manda sodeer sergenterie pietaille a lanses longues et as aubalestres et si manda le conte dartois et gens a chevau et contes et barons de France pluyssours et vyndrent en Flandres.

644. Les Flamens quant il le virent venir si firent .i. foce sec entour yaus que les Frances ne porent passer vers Flamens que par .i. estroit pas dont il avint que la gent pietaille a lanses longues passerent outre et le conte dartois les fist retorner.

645. Les Flamens quant il virent si grant gent contre yaus si en eurent grant paour et aveent fait chevetaine sur yaus le conte de Nemur nevou dou conte de Flandres et se dit conte et les Flamens manderent .i. mesage au conte dartois le quel ot nom Piere le Roy qui fu mout sage et bien parlant et ofryrent au conte dartois de venir a sa mercy et dou roy de France a son plaizir sauve la vye deaus et de lor femes et de lor enfans. Et le conte dartois ne les vost resevoir que dou tout a la mercy et au gre dou roy de France et les Flamens ne sozerent metre; dont le conte dartois se mist luy et sa gent a chevau aler avant contre Flamens et Flamens lor vindrent encontre et les reuzerent et espresserent tant que il firent flatir les Fransses dedens sel foce sec et en tuerent tant a lor gre quy furent desconfis de tout et fu mort le conte dartois et mout de haus barons de France de quei fu grant damage.

646. Enci aus jours et a sel tens le conte de Flandres estoit en prizon dou roy de France quy sestoit mis a la mercy dou roy de France par la manterie de mon seignor Charle frere dou roy de France quy le mist en prison a Pontoyse ou il morut; et ausi meismes le duc de Bourgoine et le conte de Bourgoine vindrent a la mercy dou roy de France et lor pardouna.

647. Quant selle mesaventure avint a la gent de France il y ot mors gens a chevau .vim. des plus nobles et des meillors de France.

648. La nouvelle ala au roy de France quy en fu mout dolens et courouse et fist asembler .i. grant host de gens a chevau et a pie et ala meismes son cors en Flandres; et avoit le roy de France pence de grever Flamens ausi par mer et pour ce il ordena par .i. home de Jenne quy ot nom Renier de Grimaut vaillant et prou et entreprenant quy li fist venir priveement menestraus de labourer guallees et mareniers et en fist .vii. guallees et les armerent ses Jeneves a lor maniere et fu lor amirail le dit Renier de Grimaut et alerent damagant les coques des Flamens si come vos ores.

649. Le roy de France quant il fu en Flandres il asega une site quy a nom Lihle et les Flamens se defendirent vayllaument; et fu la bataille mout mortal car ly roy de France a lasemblee fu abatu de son chevau et fu a pie entre ses enemis quy lasaillirent mais il se defendoit de tel maniere que il aveit une espee en la main a quil feroit son cop estoit si fort et si grief que tant tost estoit mort estendu a terre car le roy de France estoit grant de cors plus que .i. grant home nestoit bien .i. paume quy est plus dun bras et aveit les os plus gros que chevron et estoit de cuer prous et hardy come lion et si nestoit cheval si haut ne si fort quy ne le feist pleer desous luy et avoit si grant forcheure de cuysse et de janbes que ses pies estoient pres de terre a un paume quant il chevauchoit et fu si biau de vysage et si blanc et si blont que a son tens ne fu au monde plus biau de luy et siaus qui lont veu sevent bien que ensi est la veryte com je vous ay devise. La bataille fu mout grieve et mout perelyouze dune part et dautre; et fu le roy de France a pie par .ii. ou .iii. fois que son chevau ly fu mort desous luy et puis que il fu remontes avint si come le dit roy de Franse estoit en terre .xxiiii. chevaliers pour son cors garder sur .i. leuc hautet: si vint .i. haut home de la part de Flamens quy estoit seignor dou Cuc et senbaty sur le roy de France et le fery dun bordon par my le cors mais le roy fu si bien armes que le cop ne le fist nul mal et tant tost fu le seignor dou Cuc mort et depesses par piesses. En la fin Flamens ne porent souffrir ny durer la bataille et furent desconfis de tout et le roy de France prist la site de Lihle de dens laquelle site fist faire .i. mout biau chastiau et fort et ordena de sa gent par dedens le dit chastiau pour luy garder et pour aver la gent de la site plus a son coumandement. En tel maniere avint de selle bataille come vos aves oy par terre.

650. Or vos viaus dire des guallees dou roy de France et de son amiraill Renier de Grimaut coument il esplaiterent et se quil firent.

651. Le dit amiraill se mist a ses gualees par siaus leus ou il cuyda ou ques devoient passer quy aleent et veneent en lor veages et tant les atendy que il les encontra tout ensemble a caravane car les Flamens aveent oy de ses gualees et pour ce les Flamens aleent ensemble con vous lentendes; et si tost com il virent les dites gualees tant tost sarmerent pour yaus defendre et siaus des gualees quy sont vausiaus con set chascun bien remuans ligiers daler et venir a lor volente. Si vindrent les qouques bien armees et enchastelees en tel guyse quil furent pres ausy hautes con les coques et se conbatirent ensenble mout asprement et les coques quy ne sont mye vaussiaus de riens ni ne poieent secourre lune a lautre si furent a grant meschef et tant alerent ses guallees en tous ses coques asaiant de bataille chascune que il prirent .xxiiii. a tout lor charge et entre tant con ses furent prisses le vent se mist en tel signal quy fu mout boun pour les autres cuoques et firent velle et sen partirent mout damages et nafres.

652. De dens les .xxiiii. coques quy furent prizes avoit mout de grant richesse que tout fu dou roy de France; et fu Renier de Grymaut pour seluy guain mout hennore et fait chevalier et ly douna le roy mout biau fie.

653. Or vos diray dou conte de Flandres quy estoit a la prizon dou roy de France mais il chevauchoyt partout la ou il ly playssoit.

654. Il avint .i. jour que il vint devant le roy de France et ly prya de luy laisser alere en Flandres pour veyr sa terre et sa gent dont il en avoit grant dezir et le roy ly demanda quy seurte il avoit de luy quil deust revenir. Le conte respondy que il non avoit seurte que sa foy; et le roy laissa aler le conte sur se. Il ala a Flandres et vy sa terre et ses amys quy li conseillerent de non retorner plus en prisson mais il ne le vost croire et tint sa promesse et sa foy et retorna a son seignor le roy de France en la prisson de Pontoize la ou il morut veil de .c. ans.

655. La pais fu faite de Flandres quant la site de Lihle fu prize tout a la mercy dou roy de France et a son gre; et ja por ce que il avoit resseu si grant damage il ne rendy a nul mau guerredon. Et or vous layrai de se et vos diray dune autre aventure.

656. Quant vint en ce dit an de .m. et .ccc. et .iii. de Crist a .vii. jours dou mois daoust avint en lihle de Chipre .i. crole mout grant et mout durable tel que lon ne le senty en nostre tens si grant; et quant en Chipre Dieu mercy il ne fist nul damage mais en Candie quy est en Crite et a Rodes fist mout grant damage et morut mout grant gent et fu sentu par tous les leus dou monde con les marchans lont reconte. Ores vos lairay de se et vos diray que avint en Chipre.

657. Le roy Henry de Jerusalem et de Chipre apres la mort dou roy Johan son frere si avoit autres .iii. freres maisnes de luy et a seluy quy fu aihnes des autres quy ot nom Aumaury a seluy fist il don dune site quy a nom Sur quy est en Surie et le fist aussi counestable dou royaume de Jerusalem et tout soit se que Sarazins tenoyent prize au jour la terre de Surie toute fois il ly fist se don par ce que il estoit renomee de seignor et estoit marye a la seur de Haiton roy dermenie le quel dame eut nom Yzabiau et lala espouzer en Ermenie.

658. Lautre frere quy ot nom Guy fu marie a la dame de Baruth quy avoit este feme de Hanfre de Monfort quy fu frere de mon seignor Johan de Monfort seignor de Sur et dou Toron; et a cestu Guy le roy Henry dona la conestablie dou reaume de Chipre mais il ne vesquy guayres et morut et laissa .i. fis et une fille quy eust de seste dame de Barut sespouze; et le fis ot nom Huguet et le roy son oncle le norry entour luy.

659. De puis la mort dou dit conestable le roy Henry fist counestable messire Haimery quy fu son frere le maisnes de freres.

660. Le roy avoit .ii. oncles de la rayne sa mere que lun fu nome messire Balian dyblin quy estoit seneschau dou royaume de Chipre et lautre qui fu maines sy ot nom messire Phelippe dyblin; et avint si come a Dieu plost que le seneschau morut et fu fait seneschau dou royaume de Chipre le dit messire Phelippe son frere. Ores vos ay devise les freres et les oncles por ce que vos puisses myaus entendre les herremens de lor afaire que vos entenderes devizer si avant.

661. Le roy Henry en seluy tens nen uzoit ny faizoit nul estroit conseil que par messire Phelippe dyblin son oncle le seneschau et de tous les autres se tenoit eschif; et tant usa le roy en tel maniere que par lor porchas de lenemy dinfer lenvie crut entre yaus si avant que messire Aumaury seignor de Sur enprist a estre gouvernor dou royaume de Chipre et asenty la volente des chevaliers et trova la plus grant partie de son assent.

662. Et quant vint en lan de lincarnasion .m. et .ccc. et .iv. messire Aumaury seignor de Sur frere segont dou roy si enprist tout tronc a estre gouverneour dou royaume de Chipre et avint que .i. chevlier quy a nom Hue de Presterone fist une semonce au seignor de Sur et a plusours de Chipre et furent le matin as bains et en la dite semonce: si ordenerent de faire gouvernour le seignor de Sur et tout se que il fayssoient estoit retrait au roy le quel ne le poiet crere ains respondoit quy ne lozereent faire.

663. Et quant vint lendemayn de seste semonse quy fu a .xxvii. jours davril par .i. mardy messire Aumaury seignor de Sur fist asembler en .i. sien hostel tous les vauvassors et chevaliers quy post avoir pour soy ordener a gouverneour et coumanda que la porte fust close et que puis que aucun chevalier entrast quil ne peust yssir; et fu le conseil entre yaus. Et enssi come il estoient au conseil messire Phelippe dyblin oncle dou roy si estoit che le roy le quel avoit seu ceste choze quy se faizoit si come lon le fist asaver a son cazau Lamino; et quant il entendy que il estoient asembles che le seignor de Sur si sen party dou roy et entra che la rayne sa seur et li retraist se fait et la rayne tant tost chevaucha et messire Phelippe lamena destre a lostel dou seignor de Sur et le seignor de Sur nissy hors dou conseill et vint soul a la rayne sa mere. Donc la rayne le rampona et ly dist: Aumaury ques euvres sont sestes que vous faites contre le roy qui est vostre frere et vostre seignor. Et le seignor de Sur respondy a la rayne sa mere que se que il faizoit si estoit pas les euvres de messire Phelippe diblin. Et messire Phelippe diblin quant il oy se charge ly respondy que ses euvres aveent tous jours este bones entre le roy et luy; et le seignor de Sur ly dist que il li mosteroit prochainement ses euvres; et la rayne quant elle les oy ramponer lun a lautre si fist partir messire Phelippe dyblin son frere car elle douta que les paroles nen engroissicent entryaus et messire Phelippe se party soul sans conpagnie por ce que les sergans ne laysseent nul chevalier yssir pus que il fust entre con vos aves oy et demoura la rayne soulle dont le seignor de Sur la fist aconpaigner a ses chevaliers quy estoient de sa partie et encores le roy ne savoit rien de tout se fait; et quant messire Phelippe diblin retorna che le roy il sasist pres de luy et ne le vost riens dire lafaire.

664. Le seignor de Sur retorna au conseill et tant parlerent ensemble quy le firent governeor dou royaume de Chipre et monta a chevau le dit gouverneor et toute la chevalerie o luy et vindrent a lostel le roy et par .i. escrit ly distrent ses paroles que vous ores; et celuy quy dist ce si fu messire Hugue diblin quy fu frere dou conestable Phelippe diblin quy morut estoit et fu la parole en se dite:

665. Nous sire soumes venus par devant vos et vos faysons asaver que pour ce que vous estes mezaise de vostre cors et ne poies mye bien entendre a gouverner le royaume si come il covient et meismes pour mout de riotes quy sont avenus a nostre tens de vos a pluzors gens et espessiaument avec les Jeneves nos pour ce avons ordene et fait par court governeor vostre frere monseignor Aumaury seignor de Sur. Sur ce le roy respondy enssy:

666. Que vos voles dire que par ma maladie vos aves fait gouverneour il eut a nos ansestres .i. roy quy fu mezel ni ja pour ce ne fu fait nul governeor a son leuc et se vous dites dou contens et de la riote des Jeneves je lais fait par le seignor de Sur et se vos aves fait le seignor de Sur governeour tous mes homes ne li ont pas jure.

667. Le seignor de Sur respondy et dist enssi: Trestous mont jure et sil y ait nul quy ne viaut jurer il me jurera et seluy qui ne vorra jurer je li meteray se bordon par my le cors a ly et toute sa generasion jusques au tiers degre. Et se party le dit governeor et nyssy de hors de la chambre dou roy et fist crier le banc par la terre a son nom come de governeor et par tel maniere fu il gouverneor et aucuns chevaliers ly jurerent que puis ly furent a lencontre coume vous orres si apres en se livre.

668. Le dit governeor en son comensement si douna au coumun de Veneize franchise au royaume de Chipre par grase. Et si vous lairra a dire dou governeour jusques a une autre fois et vous diray une autre aventure por ce que elle avint au tens de cestes choses qui avindrent en Chipre.

669. Il avint que depuis la perte dacre que le maistre de lospitau de saint Johan frere Johan de Viller fu mort et fu fait apres luy maistre frere Eude dou Pin quy vesquy mout poy et morut; et fu fait maistre apres luy frere Guillaume de Vylieret provensal quy fu priour de Saint Yglise.

670. Cestu maistre si eut .i. nevou jeune frere de lospitau le quel il fist grant comandor. Cestu coumandour estoit nome frere Fouque de Villeret qui fu large et courtois et mout liberal et fu de si bon portement en sa baillie quy ce fist mout amer et prizer des freres et dautres gens et si come aventure avient que le maistre son oncle si morut et les freres de la maizon firent maistre sestu frere Fouque grant coumandour a lincarnasion de Crist .m. et .ccc. et .v.

671. Et quant le maistre fu afermes il enprist une prise com je vous dirais.

672. Il y a un ihle quy sapele Rodes quy est de lemperour de Costantinople la quelle est en la crois de la mer et voizin de la Turquie mout pres et pres de lihle de Chipre et est au chemyn de siaus quy vont en la terre de Egipte et siaus de seste ihle de Rodes estoient consentans a passer par yaus les vaussiaus charges de marain et de fer et de garsons grifons et femes quy se porteent a vendre as Sarazins de Babiloine et meismes siaus de la dite ihle de Rodes porteent cestes meymes marchandies souvent as Sarazins.

673. Frere Fouque de Villeret maistre de lospitau au coumensement de sa maistrerie vost avoir gre de Dieu et los et henor au siecle: si enprist daler prendre ceste dite ihle de Rodes et pourpensa que il defenderoit a passer les marchandies que je vos ay dites de sus quy aleent as Sarazins et poroit ausi meismes sousmettre ses vizins de la Turquie a la crestiente. Et pour coumenser lenpryse quil vos dit manda querre de Famagouste .i. grant home de Jene quy a nom sire Bonyface de Grimaut le quel vint au maystre au Colos .i. cazau de lospitau pres de Lymesson et la parlerent et ordenerent lor afaire si come il lor sembla qui couvenoit a sel bezoin quil avoient enprise et entre pluyzors con siaus quy furent pris entryaus et pluyssors paroles meysmes dites la chose fu a ce condute et fermee quil firent lor armement et monta le dit maistre et ses freres sur le dit armement et alerent a Rodes; et en lor venue prirent terre par force et asegerent le chastiau de Rodes et ly donerent grant bataille dengins et dautres chozes et estant au siege de se dit chastiau de Rodes avint chose si come aventure avient que un autre chastiau quy a nom Filerme quy est loins de la mer et Grifons laveent garny de sergenterie et de vitaille et avoit venu en lor aye Turs de la Turquie des quels il avoyent mis .iiic. de dens cestuy chastiau de Filerme et avint ensy que le chastelain de se dit chastiau baty .i. sergant grifon quy eut honte et despit et sur son cors vint as Ospitauliers en lost quy estoit devant Rodes com vos aves oy et lor fist entendant et promist de rendre le dit chastiau que je vos ays nome de Filerme dever sele partie dont il guaitoit se il les voleent prendre.

674. Cestu home nyssi de nut de sa plasse que nul ne le senty et fu si con je vos ais dit entre les Ospitalliers; et estoit ja grant piesse de la nut dont le maistre et les freres manderent gent darmes a pie et lor dounerent fey et alerent o luy et le dit home monta en sa plasse la ou il guaytoit et les Ospitalliers et lor sergans monterent apres luy de la ou il monta et prirent le dit chastiau par seluy leuc et myrent a lespee les .iii. Turs sarazins quyl troverent layens et les autres homes et femes et enfans se mirent as yglizes pour sauver lor vie.

675. Ceste enprize de se chastiau si conforta mout les Ospytaliers et acrut lor cuer en plus fort asaillir et metre en avant lor bezoigne ja soit se quil demourerent plus de .ii. ans a prendre le car le chastiau estoit mout fort et avoit bones gens darmes dedens selonc gens gryfons quil esteent et meysmes lospitau ne le voleent si fort grever quy se desfeyst et meysmes pour ce que siaus de dedens esteent crestiens mais en covenable maniere firent lor poer de prendre le et por ce dura tant le siege; et quant Dieu vost que la bezoigne fust delivre por le bien de la crestiente por ce que les marchandies nen alassent as Sarazins si con je vos ay devize si manda une aventure con je vos devizeray.

676. Il avint que lenpereor avoit reseu letres et .i. mesage que siaus de Rodes ly manderent et ly aveent mande quy les deust secourre de vytaille et darmes: dont lempereor lua une nave dun Jeneves et la charga de fourment et darmes ases et lor manda par se dit home que siaus de Rodes ly aveent mande; et quant la nave fu as aigues de Rodes si ot si fort tens quele ne post prendre a Rodes et dautre part il troverent .xii. galees armees: de Provensas .iiii. et Saido Doire une; Lanfranc Seba quy se nemoit la pennate jeneves si eut une et de Vingneull jeneves .i. autre et lospitau avoit arme les autres de Chipre par parties et dautres leus si que la dite nave se layssa courre en Chipre et vint au port de Famagouste; et sur ce .i. chevalier de Chipre quy eut nom sire Pierre le Jaune et avoit .i. lein arme de lospitau et vint de Rodes en Chipre et estant au port pres de sele nave le marchant jeneves seignor de la nave douta que sele saitie ne preist lome devant nome quy estoit de Rodes et revenoit a Rodes: en seste nave avoit ases de vitaille et armes que lenpereor mandoit si le vost metre en terre a Famagouste pour estre plus seur et ensi come il estoit a la barque un des mareniers le conut de siaus de la saitie de Pierre le Jaune et voguerent vers la dite barque ou il estoit et le prirent et piestant sire Piere le Jaune le mena au maistre de lospitau a Rodes dont pour paour de mort sestu pourchassa et trayta vers siaus de Rodes dizant leur de par lenpereor et par mout dentreseignes quy lor dist que siaus dou chastiau se rendirent a fiance dyaus et de lor biens. Et fu le dit chastiau en la main et au poier de lospitau portant les cles au maistre siaus dou chastiau et par covenanses devizees que lor biens lor demourerent a la fiance de lospitau et estant lor homes si come il esteent de lemperour de Costantinople. Les Ospitalliers lor tindrent bien lor covenances et adons apres les resurent a lor homes mais il les myrent a herberger hors de la forteresse dou chastiau et se herbergerent au bourc; et se fu en lan devant de lincarnasion de Crist .m. et .ccc. et .vi. et quant il lasegerent fu a .m. et .ccc.

677. Le maistre et les prodes homes freres de lospitau rendirent grases a Dieu et a la virge Marie de se bien et hennor quy lor avint et labourerent le dit chastiau et lesforserent de toutes pars et acuillirent mout de bounes gens quy veullent a Rodes venir pour anger le leuc et mouteplier le et de puis ont sous mis de lor obediensse pluyzours leus de la Turquie quy lor dounerent truage; ni onques nen ozerent les mauvais marchans passer de la ny charger en Turquie ni marain ni melout ni autre choze pour porter en Babiloine. Et se nul si met a aler lospitau a ces gualees: si les preignent et les robent la que chose tourne a grant bien a la crestiente et enssi le porvea Dieu pour le miaus.

678. En ceste maniere manda Dieu grace au noble maistre de lospitau et au prodes homes de la mayson que il furent par ce leuc en grant lyberte et en grant franchise et en lor seignorie par eaus et hors de la sugesion de autre seignorie et Dieu par sa grant grace les y teigne en bounes euvres. Amen. Or veus revenir au fait dou seignor de Sur quy se fist governeor.

679. Il avint ensi que le dit governeor ne layssa nul chevalier user ni chevaucher o le roy si ne fust messire seneschau son oncle et aucuns autres chevaliers que je vous noumeray: messire Johan de Giblet de la Surie quy se dizet Arneb et sire Lois de Nores et sire Rolant de la Baume et sire Balian de Mongezarvy et autres .ii. Estant se fait en ceste maniere pluyssours chevaliers de siaus meymes quy eurent jure au governeor si furent en lor cuer mout repentant de ce fait et le governeor sen aparsut et les eut couneus et mout agaitoit de prendre les a point sur ceste coulpe; si avint en se mileuc que le gouverneor vost que le roy otreast par sa court que il estoit governeor par son gre et en voloit de ce faire chartre pour soy escuzer as rois de la la mer de la force que il avoit fait au roy. Le roy en nulle fin dist que ne le fereit et que il se laireit avant tout desmenbrer et le gouverneor leut mout a grief; et monta atant seste regringne que le seignor de Sur governeor vost asaillir et prendre le roy par force en son hostel et sarma le seignor de Sur governeor et tout les siens et vindrent au confanon leve et aus chevaus covers en tous lostel dou roy. Et si ot a sel tens .i. apostan des Jeneves en Chipre quy estoit a Nicossie quy vynt en persone et tous les Jeneves de Nicossie par son coumandement o luy a confanon leve; et estoit lapostan sur .i. grant chevau que le gouverneor ly douna en don. Sestu aposte avoit nom Jaque Pansan et au tens pace par le roy avoit este damage et pris en persone par le visconte de Famagouste et mene trop hontozement en la prizon des larons; et por ce fist il se quy fist de venir as armes contre le roy con se soit chose que il en fu blahmes et repris en Jene.

680. Le roy quant il vy que lon le venoit asaillir et prendre en son hostel si fist asembler se quy post de gens en son hostel et y fu mon seignor Phelippe de Yblin son oncle seneschau dou royaume quy fu arme luy et les autres et le roy meismes son cors fu arme et dist que il voleit yssir pour saver quy li veroit encontre. Les gens dou gouverneor a pie et a chevau estoient renges et armes par la rue de lonc en lonc par devant lostel dou roy mais la rayne qui avoit de tout se grant dolour et freres Prechours et Menors et dautres religious vindrent au roy et sagenoullierent devant luy et meysmes les damoyseles ses seurs li vindrent devant a faire li prieres de non yssir encontre le governeor et firent tant que il repaira et fu fait lacort en tel maniere que messire Phelippe diblin seneschau dou royaume qui estoit oncle dou roy et dou gouverneour et tous les chevaliers et vales et sergans quy sestoit mis dedens la court dou roy en saye quant il fu aseges deveent venir a pie en cors san sainture en lostel dou seignor de Sur governeor et cryer ly mercy; et le dit governeor lor devoit pardoner et saver vye et menbre et non prison de pain et daigue et quy lor devoit rendre lor fies; et ensy con ceste covenanse fu devizee tout ensy fu fait.

681. Messire Phelippe du Yblin seneschau ala a pie mais non pas en cors et le vesque Guy de Famagouste ly aloit de pres jusques a lostel dou gouverneor et apres luy dune bone piesse dou jour alerent tous les autres chevaliers valles et tricoples et sergans a pie et en cors sans saintures si con vos laves oy devizer.

682. Et quant il furent venus en lostel dou governeor et sa prezence il lor pardona et delivra a qui il vost et mist en prizon siaus que il vost; et je vos noumerais acuns et vos dirais les chevaliers:

683. Messire Haimery de Milmars et messire Renaut de Saisson et messire Jaque de Floury chevalier dacre et messire Johan Babin et messire Anciau de Brie et messire Johan layze et messire Hugue dagullier et sire Simon dagulier et sire Hugue Beduyn et sire Gerar de Bries et sire Thoumas de Bries et autres chevaliers que ennu seroit de tout nomer. Et si furent aussi .ii. valles arestes: Thoumasin dyblin et Berthelin Mahe. Or aves oy les noms de siaus quy furent pris et maumenes pour ayder le roy lor seignor.

684. Et quant vint lan apres quy fu de lincarnasion de Crist .m. et .ccc. et .vii. messire Bauduyn dybelin pour ce quy li sembla maufait a aler tant avant contre le roy si con le governeor mostroit si ne se vost ... [un feuillet du ms. manque ici] ... acuylly par tout si ly manda .i. sien mesage atout le fermau et quant le roy Hayton vy le fermau si le baiza et le mist sur sa teste et sur ses ziaus et desendy fiablement et si mena o luy le petit roy son nevou que je vos ai dit.

685. Si tost con cestu grant seignor tatar le tint et aucuns autres chevaliers o luy qui estoient dacre lun ot nom Gille Antiaume il cuyda venir a son entendement et ly requist de par le grant Cazan le reyaume dermenie. Haiton li respondy que il nestoit mye siens ains estoit de sel anfant son nevou quy avoit nom Livon. Se grant seignor tantost sans nul respit coumanda a sa gent de luy ocirre; dont sa gent le depeserent as espees et tous les chevaliers et autres quy estoient o luy. Et quant lenfant Livon le petit vit que lon tuoit son oncle et les autres si fouy entre les tentes des femes des Tatars pour sauver sa vie mais riens ne ly valut que les Tatars lalerent prendre et le traistrent des femes et ly taillerent la teste quy estoit enfant quy navoit pas .x. ans daage.

686. Quant ceste chose avint les freres dou roy Haiton Hoissin et Alinah se tindrent fort lor leuc et lor chastiau; et quant ses Tatars virent quy ne porent rien esploiter a lor entendement si repairerent mout repentis et en grant paour que Cazan ne lor feist mal si come il lor fist si con vos orres.

687. Quant est de Hoissin et Alinah freres de Haiton mais ses .ii. Hoissin et Linah furent nes dune ventree mais Hoissin nyssi premier si vost Hoisson que Alinah fust roy et seignor mais Alinah quy regarda a liaute et a rayson ly dist que la hautece venoit miaus a luy pour se quy nissy premier dou ventre de lor mere avant de luy; et enssy tint Hoisson le royaume dermenie en son poier et apres se fist encorouner.

688. Et de la mort de lor seignor et frere le roy Haiton furent mout dolens et de lenfant le petit roy lor nevou et puis que il eurent ploure et fait lor doulor a lor usage et enterer leur cors le dit Hoisson roy dermenie manda Alinah son frere a grant can Cazan des Tatars soy conplainant de la mort de lor frere et de lenfant lor nevou que sa gent aveent mors sous sa fiance venant a son comandement par la prezension de son fermau.

689. Le roy Cazan seignor des Tatars tint se fait mout a grief et a grant dehleaute et fist venir seluy sien chevetaine de selle gent que il avoit mande por la Turqie guarder et ala faire sel fait dou roy dermenie con vous laves oy et si li fist tailler la teste et a tous les autres quy aveent feru de lor espee a tuer les .ii. devant nomes Haiton roy dermenie et lenfant le petit roy Livon; et se revint Alinah en Ermenie.

690. Baron Hoissin quy estoit roy dermenie se tint le royaume saizi et tenant or avoit il encores .ii. freres en Costantinople que lun si ot nom Sembat seluy quy sestoit fait roy et avoit fait estrangler son frere Toros et asorber de ziaus Haiton lor frere aihne quy estoit roy et lautre frere avoit nom Dendin lequel Dendin navoit guaire que il estoit mort et estoit une lor seur feme de lempereour de Costantinople et estoit en vye encores.

691. Dont sestu Sembat quant il oy la mort de Haiton se party de Costantinople et vint en Chipre quy avoit sa seur feme dou seignor de Sur governeor et fu en Chipre aucun jour et puis ala a une gualee en Ermenie et manda son mesage a son frere Hoisson quy li rendist le royaume car il estoit aihne de luy et a luy venoit de raisson; et Hoissin ly manda que il avoit creve les ziaus au roy quy estoit son frere et son seignor et avoit fait estrangler lautre frere et que par ses heuvres estoit il traitre et que traitre a nul leuc de droit ne doit tenir terre et a que a luy venoit le dit royaume le quel tenoit et teroit tous jours. Cestuy Sembat oy ses respons et vit bien que il ne poret ensy espleiter et se party et tourna en Chipre.

692. Le roy Hoissin le fist aguaiter et espier et fist armer .i. lein mains de gualee et manda .i. sien feel Geneves des grans homes de Jene quy ot nom sire Baude Espine desus le lein pour atendre ensi come il yreit en Costantinople. Sire Baude y ala et latendy grant piesse en selle mer par la ou il saveit que il deust passer mais le dit sire Baude si fu malade et vint a Rodes et la si trova sire Sadon Doire quy est un autre grant home de Jene et parla a luy de se fait et ordena o luy que le dit sire Sadon atendy sestu Sembat en vees.

693. Dont il avint que le dit Sembat puis que il retourna dermenie en Chipre si se mist dedens une gualee dun Jeneves quy a nom sire Jeany de Guyzolfe quy alet en Costantinople; et alant en lor vee si troverent sire Sadon Doire avec sa galee et sacosterent fiablement lune guallee a lautre et se parlerent et en la fin sire Sadon dist que il voloit aver la persone de Sembat en toute maniere dont sire Jouanyn de Grizofle dist que il ne ly douroit en nule maniere et sire Sadon dist que il le prendereit par force. Sire Joanyn de Guizofle quy ne le post defendre pour ce que sa gualee estoit mal armee et nen avoit mye tant de gens con selle de sire Sadon si monta sur la dite gualee a gens darmes et prist le dit Sembat et le mist en sa gualee et lenporta en Ermenye au roy dermenye Hoissin son frere; et sire Baude Espine quy estoit venu de Rodes en Chipre malade resut une letre de sire Sadon par .i. sien enfant par laquele letre ly fist asaver coment la bezoigne estoit parfaite et que Sembat estoit pris et le menoit au roy dermenie. Et tant tost sire Baude quy estoit a Famagouste lua .i. panfle et larma et se mist dedens tout malade et sen ala a Layas en Ermenye et apres se qui fu party dune lieue fu seu a Famagouste ce fait et sil fust en poy demoure il fust este pris. Et ensi avint de seste bezoigne; et le roy Hoissin et son Alinah prirent cestu lor frere Sembat et le tindrent en prizon et dedens se Alinah morut soudainement car il estoit travayllie mout en chasser et sur son travaill manga lait quy est mout froit et subitement ly prist un mau dont il morut piestant et de luy fist mout grant deul le roy Hoissin. Dont il avint depuis la mort de ce sien frere que gualees vindrent de marchans venesiens entre les quels gualees vint un grant home de Veneysse quy eut nom sire Nicolet Morissin mesage en Chipre et en Ermenie au quel le roy Hoissin dermenie livra sestu sien frere baron Sembat quy le mist sur les gualees et alant les dites gualees en lor chemin quant il furent en poy loins de la de Chipre le dit Sembat morut sur mer de maladie. Ensi remest au roy Hoissin le royaume dermenie sans nul contredit. Or vos veus retraire une autre aventure quy avint si con vous entenderes.

694. Il avint en se dit an de .m. et .ccc. et .vii. de Crist si con je vos ais dit que pape Nicole morut lan passe et fu fait pape en son leuc Clemens Quint le quel se tint en Avingnon et a Bordiaus et ne vint a Rome nule fes tant con il fu pape. Cestu pape avoit mande querre a luy frere Jaque de Molay maistre dou Temple et fu fait apres maistre Tibaut Gaudin et tiers apres frere Guillaume de Biaujeu maistre quy morut tue a la prise dacre si con vos laves oy si aryere en se livre.

695. Cestu frere Jaque de Molay maistre dou Temple quant il fu outremer se porta mout escharsement vers le pape et les cardenaus car il sestoit mout eschars hors de rayson et toute fois le pape le resut a mout biau semblant et en se myleuc le maistre ala a Paris et en France et requist dou trezorier dou Temple son aconte et trova que le trezorier avoit preste au roy de France une grant cantite davoir que lon dit .iiiicm. flourins dor mais je ne say sil furent mains. Et se couressa le maistre mout fort contre se trezorier et ly leva labit et le chassa de la religion dont il vint au roy de France quy fu mout courouse de se que par sachaizon ly fu leve labit et manda .i. haut home de France au maistre priant luy pour amor de luy ly deust rendre labit et que ce que il devet a la mayson il le rendra volentiers; dont le dit maistre ne vost riens faire et respondy autrement que il ne deust a la priere de tel home come est le roy de France. Et quant le roy vy que il ne vost riens faire pour sa priere si manda priant au pape que il mandast de par luy au maistre dou Temple de rendre le mantiau de labit dou Temple au trezorier et le dit trezorier en persone porta la dite letre dou pape au maistre dou Temple quy ne fist riens pour le pape ains dient que le maistre jeta la dite letre au feuc quy alumoyt en une cheminee.

696. Le roy de France leut mout a grief et quant vint dedens aucuns jours apres le pape requist le maistre et vint de Paris o luy dont le pape ly requist que il ly donast la regle de sa religion dou Temple par escrit et le maistre la ly douna et la lut. Et depuis a este parle entre la gent de tantes manieres de la religion dou Temple que je ne say quy verite je puisse escrire fors tant que les choses quy sont avenues publiquement puis je bien escrire que apres que lon dit que il fu examine par sages et par les religions lescrit de lor regle furent desposes et desfait lor religion et .xxxvii. furent ars a Paris et dient siaus quy les virent ardre que tant con il ardoient crieent a haute voys que le cors dyaus estoit dou roy de France et larme estoit de Dieu.

697. Et meysmes au derain le maistre et le comandour de Guascougne si furent menes a Paris par devant tout le peuple la ou il y ot asembles plus de .lm. persones et y furent .ii. cardenaus de par le pape quy firent lire .i. escrit de lor regle par le quel escrit sestendeit que il laveent coneu et gehi de lor bouche; mais marchans quy se troverent la dient que le maistre si torna vers le peuple et dist bien haut que tout ce que sel escrit dizeit estoit faus et que il tel chose nen avoient dit ni ghei ains estoient bons crestiens. Et sur seste parole .i. sergant le fery de la paume sur la bouche quil ne post plus dire et fu trayne par les cheviaus en une chapele et le tindrent tant la que il fu bien tart et que le peuple fu amerme et party de la plus grant partie. Et adons le dit maistre et le coumandour de Gascoigne furent mis en une barque et pases en lihle quy est de dens le flum et la fu le feuc alume et le maistre lor pria quil y sofrissent a dire ses oryssons les queles il dist a Dieu; et puis se livra a faire de son cors lor volente. Et ensy seaus le pryrent et le mirent au feuc et fu ars et le Dieu tout puissant quy seit et conut les choses sacrees sil seit que il fust innocent de sel feit que lon lor mist sus luy et les autres quy furent ars sont martirs devant Dieu; et se il sont tes quy layent deservy il ont este punis mais je puis bien dire tant que a laparant je les ay coneus pour bons crestiens et devos en lor messes et en lor vie et especiaument le cors de mon seignor le maistre quy fu frere Guillaume de Biaujeu en mout damohnes grans et larges que il faizeit a pluzours bounes gens priveement et a laparant come chascun le seit quy lont veu. Mais je vos layray a parler de seste rayson et vos diray une autre aventure quy avint en Chipre trop male pour la quele est creu et monte grant descort quy peut tourner a grant peril dou pais.

698. Il avint en lan de lincarnasion de Jehsu Crist .m. et .ccc. et .ix. que le seignor de Sur governeour fist prendre son oncle mon seignor Phelippe de Yblin seneschau dou royaume de Chipre quy estoit a son cazau Lamino et le prist messire Haimery counestable dou royaume de Chipre quy estoit aussi son nevou et le mena a la maryne dou dit cazau et la le fist monter en une gualee armee et fu mande au roy dermenie qui le tint la en sa garde.

699. Ensement le dit gouverneor fist prendre messire Bauduyn de Yblin et metre en une saitie armee et le manda en Ermenie luy et autres chevaliers quy sont si desous nomes: sire Heimery de Mimars et sire Jaque de Flourin et sire Hugue Beduyn et si fu sire Estorgue Pedot et sire Guillaume Rousel et sire Nicole de Saint Bertin et sire Phelippe de Giblet et sire Jaque dartusse et sire Jaque Coste et sire Thoumas de Biaufort. Tous ses chevaliers furent mandes en prizon en Ermenie pour ce quy ne voleent obeir le coumandement dou dit gouverneor.

700. Le seignor de Sur gouverneor quant il vy que le roy son frere ne ly vost otroier en nule maniere dou monde quy fu sire et gouverneor de par luy pour ce quy se peust escuzer as seignors de la la mer si vost mander mesage au pape et au roy de France a soi escuzer de ce quil avoit fait et que pour le myaus fu la chose ordenee selonc lestat en qui le roy estoit. Et manda a ceste mesagerye sire Johan de Brye et .i. autre chevalier sodeer quy ot nom Johan Lombart; et furent au pape et troverent la le roy de France et par devant le pape et le roy de France chargerent le roy Henry de laydes maladies et de laydes countenanses les queles il nestoient pas en luy sans faille mais ensi fu la parole entre la gent que ses mesages aveent dit et dit on que le pape et le roy de France ne donerent mye fei a lor dit et ne lor firent pas bon respons et pour se se partirent subitement de court et retornerent en Chipre.

701. Et apres le seignor de Sur gouverneor se mist de tout a faire dou pis que il post et manda a la dame de Sur sa espouze au roy dermenie a porchasser et trayter coment sil vozist tenir le roy Henry son frere ... [ce dernier feuillet est dechire] ...


Source.

 


This text is part of the Internet Medieval Source Book. The Sourcebook is a collection of public domain and copy-permitted texts related to medieval and Byzantine history.

Unless otherwise indicated the specific electronic form of the document is copyright. Permission is granted for electronic copying, distribution in print form for educational purposes and personal use. If you do reduplicate the document, indicate the source. No permission is granted for commercial use.

© Paul Halsall, September 1998
halsall@murray.fordham.edu